Lī-ek chhin-mî-lâng ê kò-pe̍h
1894.08 113 koàn p.84
Thong Tiong-kok-lāi ê chhiⁿ-mî-lâng chha-put-to ū gō͘-cha̍p-bān chó-iū. Sì-nî chêng,Siōng-hái ê Chóng-hoē ū kéng-soán kuí-nā lâng thoè in siat-hoat , iā khǹg ta̍k-uī ê sian-siⁿ tio̍h kap hiah-ê lâng chīn-le̍k tàu-pān.
Lín í-keng chai Hú-siâⁿ-lāi kap Choân-chiu-siâⁿ hiān-chāi ū nn̄g keng o̍h hō͘ chhiⁿ-mî-lâng thang siū ta̍k hāng ê kàu-hùn . Ha̍k-seng muí-ji̍t chiàu-sî ēng-kang tha̍k-chheh iā kiam lio̍h-á teh o̍h kang-gē . Kū-nî Î-sian-siⁿ-niû tī Hú-siâⁿ chin chhut-la̍t lâi liāu-lí chit-chân sū. Khó-sioh i-ê seng-khu jiám-tio̍h phoà-pīⁿ , ko͘-put-chiong tio̍h tò-khì Chó͘-ke . I siông-siông thoè in tô͘-bô͘ kiù-oân, siūⁿ kàu ji̍t-āu ê tāi-chì; só͘-í m̄-nā kà in tha̍k-chheh siá-jī nā-tiāⁿ, koh kà in choè kan-kí thang ka-kī thàn-chîⁿ, lâi tō͘-khó͘, m̄-bián chiong-sin oá-khò pa̍t-lâng chhī.
Taⁿ in-uī sū iáu-bē chiâⁿ, goán ài chai tiàm Tâi-oân á-sī Tn̂g-soaⁿ ū hiaⁿ-tī á-sī lia̍t-uī sian-siⁿ, kam-goān siá-chhut chi̍t-phiⁿ lâi lūn-khí chhiⁿ-mî-lâng tio̍h choè sím-mi̍h tú-hó ê kang-gē, lâi ka-kī tō͘-chia̍h . Beh choè chit-phiⁿ lūn ê lâng tāi-seng tio̍h khì chhâ-khó kuí-nā hāng, chiah ū lō͘-ēng ; chhin-chhiūⁿ in pún só͘-chāi chhiⁿ-mî ê lâng-gia̍h ū loā-choē,in ê chêng-hêng ia̍h sī sím-mi̍h khoán,hiān-sî teh choè sím-mi̍h thâu-lō͘ , ta̍k-ji̍t thàn loā-choē . Koh , tio̍h siūⁿ ū sím-mi̍h iáu-bē ha̍k-si̍p ê kang-gē thang siat hō͘ in choè , iū-koh tio̍h kì hit-hāng kang-gē ê pún-chîⁿ loā-choē , chhut-sek loā-choē.
Lūn chhiⁿ-mî-lâng choè kàu-hoē ê kang chhin-chhiūⁿ tī I-koán-lāi á-sī koe-chhī tha̍k Sèng-keng , boē chheh , thoân tō-lí , goá iā sī ài chai hiaⁿ-tī ê ì-kiàn, tio̍h chiàu sím-mi̍h hoat-tō͘ khah-hó , tek-khak tio̍h ū lâng khan á m̄-bián.
Nā ū-êng ê ki-hoē,chhiáⁿ ta̍k-uī ê hiaⁿ-tī lio̍h-á lâi thé-thiap chit-chân tāi-chì , kàu 12 ge̍h chhoe-cha̍p-lāi uî-chí kià só͘ choè ê lūn thang hō͘ goán lâi phoe-phêng . Phoe-phêng liáu chhú tē-it miâ-ê beh siúⁿ i chhit ê gûn-chîⁿ , chhú tē-jī miâ-ê beh siúⁿ i gō͘-kho͘, tē-saⁿ-miâ saⁿ-kho͘. iàu-kín tio̍h tāi-seng chhâ-khó, āu-lâi ta̍k-hāng chiàu chhù-sū siông-sè lâi siá . Lūn ê toê-ba̍k chiū-sī :－
"Lūn kàu-hoē-goā ê chhiⁿ-mî-lâng,in-ê lâng-gia̍h, thâu lō͘,kap chêng-hêng ; koh , lūn chhiⁿ-mî bat-jī ê hiaⁿ-tī chí-bē , in ū sím-mi̍h thang choè chiū ka-kī oē thàn chia̍h , m̄-bián it-khài oá-khò pa̍t-lâng ."
Lūn tio̍h chiong pe̍h-oē-jī lâi siá, tio̍h lo̍h àm-hō, iā tio̍h ēng chi̍t-hong lāi-bīn chù-bêng bó͘-hō chiū-sī sím-mi̍h lâng-ê , tâng-chê kià hō͘ Kam Bo̍k-su.