余先生離別ê批
1896.08 137卷 p.61-62
我所疼所欣慕ê 兄弟姊妹以及少年ê 朋友，請你准我對lín講起幾若句話。
照lín知先生娘來台灣不止愛toà tī lín chia ，iáu-kú有犯著重病到應該著倒去祖家，因為向望伊若toà tī 唐山會較勇健，英國ê 教會有派我徙去tī 汕頭較 內山ê 所在，就是客人ê 中間，tī hia做主ê 工。我離開台灣其實m̄ 是本意，算是姑不chiong，就是合tī 上帝ê 旨意。
我toà 台灣已經十數年，當chiah 久捷捷有佮lín交陪，是hō͘我ê 心歡喜到bē 顧--tit。lín常常疼痛我，對重上帝准我傳ê 教示，我應該著kā lín說多謝，我往往數念lín,亦雖然我ê 身無 thang 較久長tī chia ，iáu-kú我愛lín明明知我ê 神時時佮lín tī--teh 。 對我來台灣到今我獨獨有意思愛贊lín bat 主，也常常愛歸榮光tī 伊，我真正歡喜因為tī 這十數年ê 中間有看著台南ê 教會大進步，到這 tia̍p 有設法度不止齊備，亦我大大向望教會 thang漸漸興起，總是若愛得著這號這號ê 利益逐家，不論是男婦老幼，的確著盡伊ê 本分，亦時時著欣慕倚靠聖神ê 權能。除這以外實在無別路 thang進益。
咱toà tī 這世間是若親像出外。咱榮光ê 兜tī天--ni̍h。Tī hia 攏是福氣了了。咱tiàm tī地面上ta̍uh-ta̍uh 著著磨，也有時抵著試煉憂悶ê 事誌。iáu-kú咱決斷m̄-thang餒志放sak真理。的確著結連tī主。逐時著全全倚靠伊。若失落本份就bē免得受害，抑若無反悔實在beh永遠沈淪。我所疼ê 好朋友，請你准我求lín著脫離這個上大ê 災厄。 Tī 死後無thang 移易，所以對這陣著決意toè主，無hō͘甚物人甚物物迷惑lín ê 心。Che正是我迫切ê 話，我ê 全心所愛。因為咱ê 國tī 天--ni̍h,因為主beh koh來 審判眾人。亦因為咱thang向望hō͘主變化咱卑賤ê 身軀學伊榮光神靈ê 體，咱逐家著屬主堅固企在。（看腓立比第3章尾佮第4章頭）
願所疼所欣慕ê 會友做盡忠到路尾，就咱雖然tī這世間若無koh再相見面，iáu-kú thang 定定向望會得做夥聚集tī咱ê 救主耶穌基督ê 位前，thang相佮享受永遠無限量ê 福氣。心所願。余饒理寫--ê。 |
