周添佑ê批
1896.10 139卷 p.76
舊年屬咱教會兩個少年人有hō͘日本ê 朋友請in去日本讀冊。從中一個是tiàm tī 澎湖馬宮ê陳清江；一個是周添佑，就是傳道先生周步霞ê後生。現今in兩人tiàm tī 東京讀冊，所費攏是日本ê朋友擔當。
近來阮有接著添佑ê批；今將伊ê 消息印tī 下底：
我tī 8月8日就是拜六有去Yokohama ( 橫濱 ) chhoē 細村先生。禮拜日tī hia禮拜，hit間拜堂是倚tī 海墘名叫「海雁教會」。Hit暝昏有koh聚集，總--是無猶原tī hit所在；是tī 別所在，名山手共立女學校；有5、60人tī hia聚集。Teh禮拜ê時細川先生有教我吟台灣ê詩kap讀聖冊hō͘ in聽，後--來koh讀日本ê聖冊猶原像it 章。後--來in中間有一人peh--起來講，tuì hit e昏beh一禮拜久，逐暝昏到hit間學堂做祈禱會，一、替台灣ê教會kap百姓祈禱。一、替日本祈禱。án-ni hō͘ 咱thang大大感謝上帝。到拜一我就koh 倒--轉來東京。「前這東京也有差一個傳道--ê 去台北傳道，伊ê 姓「Ka-oai」 )。這近日koh聽見伊tī- hia有破病，總--是向望伊緊緊好thang做主ê工利益toà tī 台北ê日本人。現時我有平安。」 |
