Káu ū tì-sek
1897.11 152 koàn p.86-88
Lūn káu chò lio̍k-thiok, ū tì-sek koh ū gī, che sī chèng-lâng só͘ chai . Kīn-lâi bat thiaⁿ-kìⁿ káu ū kuí-nā chân kàu-gia̍h thang hián-chhut i ū tì-sek .
(1)Tī Eng-kok Kam-tok-tiúⁿ só͘ chhī ê káu,miâ-kiò " Kéng-chhéⁿ," siông-siông toè i-ê chú-lâng kàu Lé-pài-tn̂g. Chú-lâng ji̍p-khì kóng tō-lí, káu chiū tiàm mn̂g-goā khùn teh thèng-hāu, chú-lâng chhut-lâi káu chiū toè boé-āu kap i tò- khì ; ta̍k-pái sī án-ni , m̄-bat sió-khoá ê chhò-gō͘ . Ū chi̍t-ji̍t Kam-tok teh kóng tō-lí , tha̍k Iok-hān ê phoe , chiông-tiong ū nn̄g kù kóng , Goá si̍t-chāi kā lí kóng, tio̍h kéng-chhéⁿ . Hit-tia̍p káu thiaⁿ-kìⁿ , lia̍h-chò sī teh kho͘ i-ê miâ , liâm-piⁿ iô-boé ti̍t-ti̍t ji̍p-lâi khiā tī tâi-piⁿ . Tn̂g-lāi teh chē ê lâng khoàⁿ-liáu lóng kî-koài i .
(2)Tī Hoat-kok ê lâm-pêng ū sió hiuⁿ- siā siat chi̍t-keng siān-tông, teh kiong- kip hō͘ 20 lâng chia̍h ê gia̍h . Sàn-hiong lâng nā kàu e-hng-tǹg ê sî, chiū 20 lâng lóng chū-chi̍p tī thang-á goā . Tī- hia ū tiàu iô-cheng-á, nā thiu , cheng- siaⁿ tín-tāng , lāi-bīn ê kha-chhiú chiū phâng chi̍t poâⁿ ê pn̄g beh hō͘ chi̍t lâng chia̍h. Chi̍t-chiah káu hūn-cha̍p tī sàn- hiong lâng ê tiong-ng, chiū siūⁿ lâng chia̍h chhun-ê hō͘ i chia̍h bē pá . I khoàⁿ- kìⁿ thiu-cheng-ê kìⁿ ū thang chia̍h , chiū cháu-khì kā cheng-á soh hō͘ cheng tân, lāi-bīn lâng lia̍h-chò sī khah bān kàu ê sàn-hiong-lâng teh-beh lâi chia̍h, chiū koh phâng chi̍t poâⁿ chhut-lâi ; chóng--sī thang-á sè-ê, kan-ta ē iông-ún hit ê poâⁿ, só͘-í bô khoàⁿ-kìⁿ káu . Káu in-uī án-ni chiū ū thang tit-tio̍h chia̍h, toā-chhuì nauh-chia̍h kàu pá . Kuí-nā pái chhin- chhiūⁿ án-ni , lāi-bīn ê lâng chiah chai sī káu , chin kî-koài hit chiah káu ê tì-sek ; tuì hit-tia̍p ta̍k-ji̍t hō͘ i chia̍h, lóng bô khiàm-khoeh . Che sī káu ē tit-tio̍h chia̍h iû-goân sī oá-khò tì-sek . Hit-hō bô tì- sek ê lâng tio̍h chai thang kéng-chhéⁿ .
(3)Ū chi̍t lâng khiā-ke tī kang-piⁿ , chhī chi̍t-chiah káu chin toā-chiah , kā i hō- miâ kiò-chò Iok-á. In-uī chit lâng khiā-ke tī kang-piⁿ , só͘-í m̄-chún i- ê sè-kiáⁿ ka-tī chhut-khì hoe-hn̂g ê goā- bīn sì-kè kiâⁿ, kiaⁿ-liáu ē poa̍h-lo̍h kang tū-sí. Ū chi̍t-ji̍t mn̂g bē-kì-tit koaiⁿ, i-ê sè cha-bó͘-kiáⁿ beh cháu chhut-khì mn̂g- goā, lóng bô lâng chai; hit chiah káu tuì hoe-hn̂g ê mn̂g cha̍h-teh, m̄-chún hit ê gín-á chhut-khì. Nā-sī káu toā-chiah pūn-chhiâng, beh cháu chìn-chêng uî gín-á ê sî , e-tio̍h hit ê gín-á poa̍h-tó, chiū ēng chêng-kha ji̍h i-ê saⁿ , m̄ hō͘ i peh- khí--lâi ; káu chiū tó tī gín-á ê sin-piⁿ , ēng chi̍h chīⁿ i-ê bīn kap chhiú , ì-sù sī beh chiàu-kò͘--i thèng-hāu i-ê chú-lâng lâi .
Hit-sî ū lâng tuì hia koè , thiaⁿ-kìⁿ gín- á teh-háu ê siaⁿ , koh khoàⁿ-kìⁿ káu tī sin- piⁿ , phah-sǹg káu teh chhòng-tī i , chiū kia̍h chhoê-á beh koáⁿ hit chiah káu . Chóng-sī káu m̄-nā m̄ cháu , hoán-tńg khui-chhuì haⁿ beh lâi kā--i. Hit lâng khoàⁿ káu m̄-kiaⁿ--i , chiū khì kiò in lāu-pē lâi ; in lāu-pē chi̍t-ē lâi , khoàⁿ-kìⁿ án- ni, chiū chai káu sī teh chiàu-kò͘ i-ê gín-á . Chiū kiò hit chiah káu ê miâ kóng , " Iok-á ! án-ni chò chin hó , taⁿ thang ji̍p- khì . " Káu thiaⁿ i chú-lâng ê chhuì liâm-piⁿ ji̍p-khì . Tuì án-ni thang chai hit chiah káu ê chīn-tiong , koh ē sūn-thàn i-ê chú-lâng .
(4)Ū chi̍t-chiah káu thiaⁿ-kìⁿ lâng teh kóng, Ah! chiū hián-chhut kiaⁿ-hiâⁿ ê khoán. Hit chi̍t-ji̍t lâng-kheh kàu, chú-lâng kap i kóng-oē, soà kóng-khí hit chiah káu ê sū, lâng-kheh thiaⁿ-liáu, m̄-sìn; chiū tiâu-tî kóng-chhut ah--jī ! Khiok bô sím-mi̍h toā siaⁿ, chóng-sī káu í-keng chhin-chhiūⁿ ū thiaⁿ-kìⁿ, liâm-piⁿ bô an-jiân ê khoán-sit. Lâng-kheh koh- chài kóng, Ah ! chiū m̄-káⁿ tó, peh-khí- lâi khiā . Lâng-kheh tē saⁿ-pái koh kóng-khí , Ah ! Káu chiū iap-boé chhut-khì, chhin-chhiūⁿ put-chí kiàn-siàu. Lâng-kheh khoàⁿ án-ni, chiah mn̄g chú- lâng hit-ê iân-kò͘. Chú-lâng chiū kā i kóng, Chêng-ji̍t chit-chiah káu bat kā chi̍t-chiah ah khì chia̍h, hō͘ lâng toā- siaⁿ hoah, hiâm i , in-uī án-ni chiū bô bē kì--tit ; só͘-í hoān-nā thiaⁿ-kìⁿ lâng kóng-khí, Ah ! chiū gî-ngái lâng sī teh hiâm i , án-ni kiàn-siàu cháu-khì piⁿ-á . Taⁿ nā-sī káu iáu-kú bat kiàn-siàu, lâng nā chò m̄-tio̍h , iáu-kú m̄-chai kiàn-siàu , che beh àn-cháiⁿ-iūⁿ leh ?
(5)Chá-chêng ū chi̍t ê cha-bó͘-gín-ná , toè in lāu-bó khì thàm chhin-chhek , in lāu-bó ji̍p chhù lāi teh kóng-oē, cha-bó͘- gín-ná , tī goā-bīn kap káu teh thit-thô , chiong in lāu-bó ê bō-á tì tī káu ê thâu- khak ; bô phah-sǹg hit chiah káu, thiaⁿ pa̍t chiah káu teh puī ê siaⁿ, chiū chhut- khì goā-bīn; cha-bó͘-gín-ná kiaⁿ-liáu in lāu-bó ê bō-á phah m̄-kìⁿ , kín-kín toè i chhut-khì . Káu koè chi̍t ê sè-pán ê kiô, cha-bó͘-gín-ná bô siông-sè khoàⁿ ia̍h toè i koè-khì , kha ta̍h thu̍t poa̍h lo̍h kiô ē , hō͘ chuí tū kàu ba̍t-ba̍t ; ka-chài hit chiah káu khoàⁿ-kìⁿ , cheh-sî siû lo̍h chuí , tuì gín-ná ê saⁿ kā ân-ân,thoa chiūⁿ hoāⁿ-téng , bián tit i tū-sí .
Chiah ê í-goā, bat ū lâng kà káu the̍h-phoe, bé-mi̍h , khan chheⁿ-mê chò- hì , phah-la̍h bô m̄ lóng thàn lâng ê ì-sù .
(6) Bat ū chú-lâng kah i-ê káu khì bé bah , tī lō͘--ni̍h tú-tio̍h pa̍t chiah káu , beh kā i chhiúⁿ bah khì chia̍h , i chiū chhut-la̍t cháu tò-khì , chiong bah kau hêng i ê chú-lâng; liâm-piⁿ tò-chhut-lâi chhoē hit chiah beh kā i chhiúⁿ-bah ê káu , chhoē tio̍h chiū chhut-la̍t kā i kàu chin siong- tiōng .
(7)Káu ē thè chú-lâng the̍h-phoe, sàng- ji̍p phoe-kio̍k siat tī lō͘-piⁿ ê phoe-siuⁿ- lāi . Ū chi̍t ji̍t chú-lâng ēng kuí-nā tiuⁿ phoe kah i kā-khì hē tī hit--ni̍h , i chiū kā chi̍t-tiuⁿ tò-tńg-lâi; chú-lâng the̍h- khí lâi khoàⁿ , chiū-sī phoe-lông ê goā- bīn bô liâm phoe-phiò ê iân-kò͘. Chú- lâng chin kî-koài .
Che lóng sī thang kàu-gia̍h hián-bêng káu ê tì-sek . Sam-jū-keng ū kóng , "Ke ē pò thiⁿ-kng, chhâm-á ē thò͘-si, káu ē chiú-mn̂g." Lâng nā m̄ ài tha̍k-chheh, bô ha̍k-būn, bô tì-sek, tian-tò m̄-ta̍t tio̍h mi̍h , kiám m̄ sī chin kiàn-siàu mah ? Só͘- lô-bûn ông ū kóng, " Seⁿ kiáⁿ nā ū tì-sek, lāu-pē chiū hoaⁿ-hí , seⁿ kiáⁿ nā gōng, lāu-bó chiū hoân-ló . " (Chim-giân 10 : 1.) In-uī tì-sek iâⁿ-koè pó-ge̍k , kim gîn bô thang bé. Chit-hō chin ê tì-sek sī sím- mi̍h leh ? "Kèng-uì Iâ-hô-hoa chiū-sī tì-sek ê kin-pún, lī-khui pháiⁿ chiū-sī chhang-miâ . " (Chim . 1:7 ; Pek . 28:28 .) Só͘-í lán tio̍h tû-khì , ū khoàⁿ-kìⁿ kap bô khoàⁿ-kìⁿ ê ù-oè. Kèng-uì Siōng-tè lâi chiâⁿ-sèng, Che chiàⁿ-sī chin-si̍t ū tì-sek. Taⁿ siat-sú lán bē-hiáu kèng-uì Iâ-hô-hoa, lâi thàn I-ê chí-ì, chin-chiàⁿ pí káu ê tì-sek teh sūn-thàn chú-lâng khah-su. Chiàⁿ tio̍h hùn-chì lâi chìn- pō͘ tī ta̍k-hāng ê tì-sek.
