首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 約瑟歌
約瑟歌
卷期：第163卷 本次： 日期：1898/10 刊名：台南府城教會報 頁數：79
篇名：約瑟歌 [ Iok-sek koa ]
作者：
  顯示 : 漢羅 全羅 並列  

約瑟歌
1898.10 163卷 p.79-80
(接前卷第72面。)

42.Hit 時逐人家己認罪，反悔前非這時機會；大家就將事實分訴，實在照款難推半步。
43.約瑟看了心肝不忍，大聲啼哭真正難禁；Hit 時相認，我是約瑟；逐家gông-ngia̍h心大感激。
44.約瑟安慰眾兄莫恨，上帝差伊埃及地面；備辦thang 救埃及通國，續到在地迦南本族。
45.就kap眾兄相抱chim嘴，啼哭傷心實在有愧；差in轉--去老父通知，所疼ê子約瑟是伊。
46.法老聽知約瑟兄弟，吩咐poaⁿ請老父迎接；Beh 賜好物兼賜土地，享受好報約瑟老父。
47.眾子轉--去老父講起，雅各m̄ 信心無歡喜；忽然看著車馬來到；本身活動若水直流。
48.向前盤過到別示巴，獻祭上帝保庇全家；暝間異像上帝顯明，雅各聽聲liam-piⁿ近前。
49.上帝本身出聲安慰，雅各通家得著富貴；准伊骨頭koh歸本所；親目看見約瑟地步。
50.經過無久入埃及邦，總算人數6、70人；約瑟隨時備辦車馬，去到歌珊迎接老父。
51.父子真久m̄-bat 相會，大家chim嘴啼哭加倍；約瑟liam-piⁿ去見法老，父兄家眷攏到通報。
52.就chhoā 老父入去王宮，法老隨時稱伊牧長；約瑟尊趁法老王命，供給父兄並無欠用。
53.Koh過幾年雅各致病，約瑟聽知chhoā 子來見；名瑪拿西kap以法蓮。代先提起做子起見。
54.雅各替子2人祝福，Hō͘ 伊後日享迦南國；Hit時續召眾子進前，後日情形一概解明。
55.Che 是雅各12支派，老父替in祝福告誡；續講無久伊beh返本，埋葬塚地Hek-lâng Hut-lûn。
56.雅各病重欣慕向望，舉枴敬拜三位一體；雖然真老熱心kiuⁿ-khîⁿ，至死不變善終容易。
57.Hit時吩咐代誌叮嚀，ÀN 頭氣斷去享天庭；雅各出外算年17，共享147實。
58.Hit時約瑟憂悶慘傷，就用香料抹父身中；約瑟就去見法老王，請令送屍迦南埋葬。
59.趁父命令Hek-lâng塚地，雅各安葬攏總照例；送葬明白埃及回歸，兄弟真驚穩當受虧。
60.約瑟安慰眾兄好意，早前所做m̄ 免提起；報應是在tī 主上帝，M̄ 是靠我現時權勢。
61.約瑟無久壽數beh到，吩咐骨頭toà 轉in兜；兄弟宗族上帝眷顧，後--來穩當chhoā lín 出土。
62.伊toà 埃及93年，頭尾攏得上帝保庇；享受100連11歲，流傳芳名代代無退。
63.今勸列位相kap來想，莫學雅各眾子歹樣；大家謙卑著相尊敬，才免後日受歹報應。
64.騙人就是欺騙家己，無合上帝真ê道理；著求聖神感化扶持，贊咱一生趁伊教示。
65.著學雅各熱心信主，並無厭siān永永久久；應該專心致志欣羨，若準看見上帝現現。
66.約瑟模樣逐人著看，行孝行好攏無貧憚；一生信主銳志堅固，親像黃金lok tī 火爐。
67.咱受聖神極大恩典，好膽經過重重試煉；遇著對敵贊咱較贏，到尾穩當上去天城。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461