Chân-jím ê Tâng-ki
1907.11 272 koàn p.85-86
(Tiuⁿ Chheng-chùn kì--ê.)
Lūn Tiong-lō͘ ê kàu-hoē, tuì siat kàu-taⁿ oá ū 8,9 nî kú; chêng bô pài-tn̂g, só͘ chū-chi̍p chiū-sī hiaⁿ-tī ê chhù:iā bô thoân-tō, sī Toā-o̍h ê pêng- iú lûn-liû teh lâi lé-pài; kàu kin-nî Kàu-sū phài goá lâi toà. iā bô tiúⁿ-ló, chí-ū chi̍t-ê chi̍p-sū; chit-ê kàu-hoē sī sio̍k Tâi-lâm ê chi-hoē, lī Tâi-lâm-siâⁿ 2 phò͘ tn̂g-tn̂g, sio̍k Hōng-soaⁿ-thiaⁿ koán; oá tī Kong-soaⁿ ê só͘-chāi. Muí lé-pài khah siông ū 60 goā lâng lé-pài. Kàu kin-nî chiū khí chi̍t-keng pài-tn̂g, khai chheng-goā-kho͘, sì-uî ê chng-thâu lóng chai. Hiān-sî iā ū chē-chē lâng ài lâi khoàⁿ. iā ū sin thiaⁿ ê lâng lâi-lâi khì-khì.
Kî-tiong lī Tiong-lō͘ oá 6 lí, ū chi̍t chng miâ Ka-tang-kha, ū 3 lâng lâi sin thiaⁿ, in-ê miâ chiū-sī Toā-chhêng, Hoê-siūⁿ, Lí Choâⁿ. In lâi thiaⁿ 2 lé-pài, chiū tú-tio̍h in chng-tiong ê tâng-ki,chiūⁿ-tâng, lóng bô koè kū-le̍k 9 goe̍h 10 ji̍t chiū beh sio in ê chhù, kóng in khì ji̍p kàu; taⁿ i m̄ koán in 3 lâng khì ji̍p kàu, tek-khak beh sio in-ê chhù, tuì hit- tia̍p in chiū m̄-káⁿ lâi lé-pài.
Kàu kū-le̍k 9 goe̍h 7 ji̍t chiū-sī lé-pài-ji̍t, hit ē-po͘ goá chiū khì chhoē in, khó͘-khǹg in tio̍h koh lâi; in kóng, Pu̍t beh sio goán ê chhù. Goá chiū kā in kóng bô-iáⁿ, nā chò ū-iáⁿ chiū-sī lâng sio, pu̍t bē sio. āu-lâi tâm-lūn khó͘- khǹg kàu ji̍t beh lo̍h, goá chiū koh tńg- lâi kàu Tiong-lō͘ chia̍h ê-hng; chia̍h pá bô loā-kú chha-put-to oá 9 tiám cheng in ê chhù chiū hō͘ hoé sio khì. Chin-chiàⁿ toā khó-lîn. In-uī hiah-ê lâng sī sàn-hiong, koh lóng bô the̍h poàⁿ hāng mi̍h chhut--lâi. Sim siūⁿ liáu put-chí kan-khó͘, goá chiū thàm-thiaⁿ khoàⁿ sī án-choáⁿ sio.
Ū lâng kā goá kóng, sī tâng-ki pàng-hoé. I chiong hiuⁿ chat hoé-chhâ kā i hē tī chhù-téng ê hm̂-chháu sio. In chhù-chú iā chai sī tâng-ki pàng-hoé, chóng-sī m̄-káⁿ kā chhut-só͘ kóng. āu-lâi goán ū chham-siông tek-khak tio̍h siat-hoat, tú-hó chip-sū ū tng chòng-teng thoân-tiúⁿ, hit-tia̍p chip-sū ū kap kuí-nā ê hiaⁿ-tī khì lia̍h hit-ê tâng-ki, kā i lia̍h ê sî ū kā i kóng, kah i tio̍h poê, nā bô beh lia̍h hō͘ Chhut-só͘. Hit- tia̍p i ū jīn, iā ìn beh poê 20 kho͘. āu lâi lia̍h hō͘ Chhut-só͘; Chhut-só͘ chiū tiàu in-ê pó-chèng, kap hō͘ hoé sio chhù ê lâng; khó-sioh hō͘ hoé sio-chhù ê lâng kiaⁿ tâng-ki ē koh-chài hāi i, soà m̄-káⁿkóng sī tâng-ki sio, kóng sī sio chháu- sap tò͘--tio̍h. Pó-chèng iā-sī kiaⁿ án-ni; iā thè tâng-ki pó bô-sū .Liân-āu phah- phah pàng i khì, kah i hit keng chháu ê pu̍t-biō tio̍h pàng-hoé sio, m̄-thang koh chò tâng-ki. Hàiⁿ ah ! Hiān-sî iáu ū chit hō lâng oàn-hīn tō-lí án-ni, si̍t-chāi chin thang hoân-ló. Taⁿ chhiáⁿ lín tio̍h thè chiah-ê kàu-hoē kiû Siōng- tè; hō͘ chiah-ê lâng ē tit-chhéⁿ-gō͘, chai in pài pu̍t ê chhò; in-uī Siōng-tè tek- khak ē iâⁿ ta̍k téng ê sîn-bêng. (Khoàⁿ 10 goe̍h 20 hō ê Chú-ji̍t Sîn-liông).
