Kám-in ê Sim
1909.10 295 koàn p.79-80
A-pek-lia̍p-hán khah-iâⁿ tuì-te̍k liáu- āu, chiū chiong só͘ cheng-toa̍t ê mi̍h cha̍p hūn thiu chi̍t hūn hiàn hō͘ Be̍k- ki-sé-tek, chò kèng-hōng ê lé-bu̍t. Che sī hián-bêng A-pek-lia̍p-hán ū kám-in ê sim in-uī Siōng-tè chō͘ i tek-sèng. Lâng nā chin chai Siōng-tè ê jîn-ài chū-jiân ài hiàn lé-gî lâi piáu-bêng kám-siā ê khiân-ì. Tuì lâng teh hiàn lé-gî ê khoán-sit, chiū thang khoàⁿ chhut hit ê lâng si̍t-chāi jia̍t-sim teh ho̍k-sāi Siōng-tè á-bô.
Lūn A-pek-lia̍p-hán só͘ hiàn-ê khó- kham chò chèng Sìn-tô͘ chìn-hiàn ê kui- lē. Lūn Hi-pek-lâi lâng ê sán-gia̍p, he̍k- sī tuì chhân-hn̂g, he̍k-sī tuì cheng-seⁿ, he̍k-sī tuì chiàn sèng só͘ tit-tio̍h châi- bu̍t, éng tio̍h seng cha̍p hūn ta̍h chi̍t hūn hiàn hō͘ Siōng-tè, āu-lâi chiong kî- û--ê lâi ka-tī ēng. Lūn in ka-tī ēng hit káu hūn kó-jiân thang tit-tio̍h toā hok- khì, in-uī í-keng tāi-seng thiu cha̍p hūn chi̍t khí-lâi. Chāi in khiok siông-siông siūⁿ, nā bô án-ni seng thiu hit chi̍t hūn, tek-khak bē an-sim hióng-siū Siōng-tè sù in ê hok-khì. uī-tio̍h án-ni-seⁿ só͘-í in tio̍h siông-siông chhûn-pān khek-kí ê sim lâi pò-tap Siōng-tè.
Tio̍h khoàⁿ in só͘ chûn ê sim-ì chiū chai Siōng-tè ū tuì-tiōng á-bô. Lâng nā chhut tuì sêng-sim ì-ài lâi hiàn, Siōng-tè chiah hoaⁿ-hí chiap-la̍p; siat-sú nā bô hit hō si̍t-sim, sui-bóng ū hiàn iáu-kú Siōng-tè lia̍h-chò chhin-chhiūⁿ khang-khang. Lūn Hi-pek-lâi ê lâng chhin-kīn Siōng-tè lâi hiàn lé-mi̍h, chāi in lia̍h che chò ke̍k toā ê hok-khì; nā bē án-ni chò chiū éng lia̍h chò tē it lêng-jio̍k ê sū.
Taⁿ Hi-pek-lâi lâng ê hong-hoat thang chò lán chèng lâng ê bô͘-iūⁿ. Lán Ki- tok-tô͘ m̄ thang khah su in, tio̍h kì-tit Pó-lô bat hoan-hù Ko-lîm-to lâng kóng, Muí chhit ji̍t ê thâu chi̍t ji̍t lín chiah ê suî lâng chiàu i só͘ siu ji̍p lâi chek-hē. Lūn lâng muí nî ê tek-lī lâi thiu cha̍p hūn chi̍t khiok sī hó koà iông-īⁿ thàn ê hoat-tō͘. Sìn-tô͘ khiok bô hō͘ lu̍t-hoat pé-pa̍k; nā chhut tuì bián-kióng, bô sím-mi̍h kam-goān lâi hiàn lé-gî, Siōng-tè chiū bô hoaⁿ-hí kàm-la̍p. Chóng-sī nā chin-chiàⁿ sêng-sim ho̍k-sāi Siōng-tè, chiū hit hō bián-kióng ê khek-kí ē pìⁿ chò him-bō͘ ì-ài. Lâng nā chiong só͘ cheng-toa̍t ê mi̍h lâi saⁿ-pun, hit-tia̍p sim sī hoaⁿ-hí; chóng-sī nā chiong hit ê mi̍h ê siāng hó-ê lâi hiàn hō͘ Chú, sim iáu-kú khah hoaⁿ-hí.
Chiàu Hi-pek-lâi lâng só͘ thàn ê kui- lē, thang kà-sī lán chai tē it toā ê hok- khì sī tuì sim ē kam-goān hiàn seⁿ-chhut-lâi. Sī chhin-chhiūⁿ Má-lia̍p-ki kóng, "Tio̍h la̍p cha̍p hūn ê chi̍t hūn ji̍p tī khò͘-pâng hō͘ tiàm tī goá ê chhù tit-tio̍h hó mi̍h, chiong che lâi chhì Goá, thèng-hāu Goá phoà-khui thiⁿ ê khiah, chiong ū chhun ê hok-khì piàⁿ lo̍h-lâi hō͘ lí sǹg bē-tit liáu."