陳雲程小傳
1914.10 355卷 p.7
陳雲程傳道是同安屬，金敦鄉ê人，出世tī A.D. 1852。伊3歲ê時父母有移居來台灣，企起tī Gō͘ -khó͘ -khiⁿ庄長成，伊21歲ê時有去做偕牧師ê學生，後來伊就做傳道，toà tī幾若所在ê拜堂，án-ni做工有26年久，以後有歇兩年外，到華牧師到台灣ê時，伊有來教示伊ê土音，對hit-tia̍p有接續教宋醫生ê土音，也有幫贊醫館佮女學堂ê工，koh常常傳道理，對hit時伊ê身體捷捷有抵著破病，就boē會koh擔當較濟e工程，後來伊有受派去傳道理tī士林街ê禮拜堂。伊有抵著心臟病就忽然暈去不止久才知人，對án-ni身體就koh較衰lám,不得不著歇工，來靜養身體，hit年伊抵抵是60歲，有做工tī教會內37年ê久，對án-ni伊就 chhoā伊ê家後過海去福州，佮伊ê大子企起，tī hia四月日久，伊ê病愈重無起床。有Bí-pō͘-hoē ê牧師、長老捷捷來探--伊，續替伊祈禱，koh常常有聚集伊ê教會來家內禮拜，以後誠十日ê中間人有較爽快，就想beh倒來台灣，無扑算煞hō͘伊感著真傷重，就tī A.D.1914，3月27號安然善終。伊有享壽62歲，有埋葬tī閩邑南關外辭生里，鵝頭鳳嶺教會ê墳地。 |
