Tui-tō-toān
1914.11 356 koàn p.2-3
Lîm iàn-sîn kì.
Liāu kun Sam-tiōng, jū-miâ Tō-siu, Chiū-sī goá só͘-thiàⁿ só͘ ǹg-bāng ê hiân-iú. "Gú ûn ti tē bo̍k jio̍k su," ké-soeh kóng, Chai ha̍k-seng ê khoán-sit, to̍k-to̍k sī sian-siⁿ. Tuì Bêng-tī 30 nî, Kàu-sū-hoē chhiáⁿ goá ji̍p Tiong-o̍h chō͘-kàu, i chiū sio̍k tī jī-liân-seng, hit-sî chha-pu-to 13 hoè, chu-chit chhang-miâ, iā hùn-chì khîn-tha̍k, chin him-bō͘ Hàn-ha̍k, kìⁿ-nā só͘ khó ê lóng sī saⁿ-miâ-lāi.
Tī Tiong-o̍h tha̍k kàu chut-gia̍p, hit-sî Huì Sian-siⁿ ū chhiáⁿ i pang-chān kà chi̍t nî kú, āu-lâi li̍p-chì beh chò thoân-kàu ê kang, chiū ji̍p Sîn-ha̍k-hāu, sî-kan-lāi khîn-khîn káng-kiù ta̍k hāng ê ha̍k-būn, sî-kan-goā chin jia̍t-sim pò͘-tō, chin hó kháu-châi, tha̍k kàu chut-gia̍p jiân-āu koh khì Tang-kiaⁿ ji̍p Bêng-tī-ha̍k-īⁿ chò sì-liân-seng chut-gia̍p liáu koh ji̍p Chó-tiū-tiân Tāi-ha̍k, khó-sioh tha̍k bô loā-kú kū-sî ê náu-pēⁿ koh khí, chiū tńg-lâi Tâi-oân hioh-khùn. Kàu chit pang koh khì Ji̍t-pún tiāu-ióng, bô phah-sǹg khì Tāi-pán ê hái-bīn sé-e̍k, káⁿ-sī bô la̍t thang siû, chiah hō͘ chuí tū--sí, kin-nî 29 hoè.
Chiàu lâng teh khó-liân i tuì sè-hàn tha̍k-chheh kàu-taⁿ, teh pī-pān beh chò kàu-hoē ê lō͘-ēng, taⁿ kap sè-kan soah, chiū i ê châi-tiāu ha̍k-būn lóng toè chuí lâu khì; kàu-hoē iā khiàm chi̍t-ê jîn-châi, án-ne khiok ū-iáⁿ, m̄-kú Siōng-chú ê chí-ì chin ò-biāu, hō͘ lán bē-ē chhek-to̍k--tit. Kiám-chhái Siōng-chú lîn-bín i ê náu-pēⁿ, ài soah i ê kan-khó͘, só͘-í chá-chá tiàu i tńg-khì hō͘ i hióng-siū éng-oán ê khoàⁿ-oa̍h, án-ne khiok iáu khah hó, tio̍h o-ló Siōng-chú ê hó ì-sù. Chá-chêng Khóng-chú ū chi̍t ê ha̍k-seng sèⁿ Gân miâ Hoê; Khóng-chú o-ló i tek-hēng chin hó, kài thong-o̍h ê gâu tha̍k-chheh, ū pang-chān ông ê châi-tiāu. Put-hēng chia̍h kàu 32 hoè chiū koè-sin, che iā sī hō͘ lâng siūⁿ bē hiáu-tit. Liāu kun Sam-tiong ê cho-gū iā sī chhin-chhiūⁿ án-ne.
Chóng-kóng Liāu kun ū 3 hāng thang chò chheng-liân ê bô͘-iûⁿ: 1.Ū khiam-sùn ê tek-hēng. 2. ài hiàn-sin chò Chú ê kang. 3.Chhang-miâ koh hèng-tha̍k.
Phí-jîn ū chih-tio̍h i ê lēng-heng ê phoe ài goá khì Sai-lê hù chhe-jī sàng-chòng, goá chin ài thé-thiap, khó-sioh iû-piān chó͘-tòng, kàu chhe-jī mê chiap-tio̍h phoe, sǹg sī koè-sî lah, taⁿ bô thang koh kìⁿ i ê bīn, tio̍h siá kuí-kù lâi piáu su-tē ê chêng.
