謹慎所行
1915.10 367卷 p.8
三國冊記一chām關雲長保護in 2個兄嫂beh合曹操上京去，tī路裡曹操tiâu故意用一間房hō͘ in 三人住，意思是beh 紛亂in 君臣ê禮數。總是關雲長做伊點蠟燭出來厝外看冊到天光，攏無小可厭懶ê面色。曹操看見án-ne，那koh較敬重伊。
關雲長ê所做算是君子ê所行四正功明；攏無故意裝做。看三國冊ê人攏講伊是愛故意做君子ê名聲，才án-ne來閃避嫌疑，若是在關雲長ê意思就無án-ne講，因為關雲長所顧就是劉備ê面上，佮in 兄嫂ê德行，眾人ê濫糝講著m̄著伊攏無掛意。
照án-ne kā伊想，咱教會內ê會友若會照伊ê法度來行，有君子ê腳步kiám m̄是真好mah？見若有嫌疑ê所在，親像酒樓、戲園、花街柳巷、kiáu場，這攏m̄-thang去，m̄ kan-ta保全家己ê名聲，就咱ê主佮教會ê名聲koh較要緊著保全。聖經有講：「行所著行，有親像日時，莫得酒醉來放蕩；莫得好色，行邪ê事誌，莫得相爭，受氣，怨妒。」(羅馬 13：13)(翻譯) |
