o̍h Pe̍h-oē-jī
1916.10 379 koàn p.8-9
(Sòng Bo̍k-su-niû kì)
Kà kap o̍h Pe̍h-oē-jī ū hó hoat-tō͘ iā ū m̄ hó hoat-tō͘. Hó hoat-tō͘ m̄-nā ē hō͘ ha̍k-seng khah khoài se̍k koh ē chiâⁿ hó kàu-io̍k chéng-chéng ê bo̍k- tek, chhin-chhiūⁿ hō͘ gín-ná o̍h sūn- thàn, tì-ì kap choan-sim. M̄-hó ê hoat- tō͘ m̄-nā hō͘ gín-ná chin oh se̍k, koh ē hō͘ in o̍h bô thàn, bô tì-ì, kap pîn-toāⁿ.
Tī Chú-ji̍t o̍h kà pe̍h-oē-jī ê èng-iōng sī beh hō͘ ha̍k-seng thang bat Sèng-keng, āu-lâi tī Sèng-chheh pan lâi káng-kiù Siōng-tè ê kà-sī. Chiah ê ha̍k-seng chē-chē tī in chhù bô siū kà-sī, chí-ū chi̍t lé-pài chi̍t pái nā-tiāⁿ. Só͘-í kà ê lâng tio̍h chin chhiat-ì ho͘ in lâi khah khoài chìn-pō͘ bián-ti̍t kan-ta sô. Taⁿ tī ē-té kì chit ê kà-hoat hō͘ tāi-ke lâi chham-khó.
I.Kà Tâi-lâm ê jī-bú (chi̍t pún chi̍t chiam).
Bo̍k-tek: hō͘ ha̍k-seng jīn-jī. Pī-pān jī-bú tô͘ tiàu tī ha̍k-seng ê bīn-chêng, chò-hoé kà. Kí tô͘, liām chi̍t jī chi̍t jī hō͘ in thiaⁿ, kiò in liām kàu se̍k. Ū sî kiò ha̍k-seng khí-lâi ka-tī kí jī tī tô͘-ni̍h, pa̍t lâng tio̍h chù-sîn khoàⁿ ū tio̍h á m̄ tio̍h. Í-keng kà kuí-nā jī kàu se̍k- se̍k, chiah hō͘ ha̍k-seng khoàⁿ ka-tī ê jī- bú lâi jīn hiah-ê. Sian-siⁿ tio̍h sûn, lō͘-boé chò-hoé khoàⁿ tô͘ lâi liān-si̍p.
II.Kà Ē-mn̂g ê Pe̍h-oē jī-bú (chi̍t pún chi̍t chiam).
Bo̍k-tek: hō ha̍k-seng ē jīn im kap tàu-kù. Í-keng ē hiáu jīn-jī thang ēng Ē-mn̂g ê jī-bú lâi chò tho̍k-pún. M̄-bián tuì thâu, khah hó tio̍h tuì tē-jī bīn ē-té hiah ê pat-im lâi o̍h khí. Che tio̍h ha̍k-seng suî lâng khoàⁿ i ê chheh. Chóng-sī nā ū o͘-pâi, ha̍k-seng iáu-boē lâi ê tāi-seng, sian-siⁿ thang ēng ìn-pán jī lâi siá só͘ beh kà-ê tī o͘-pâi, iû-goân chiàu téng-bīn ê hoat-tō͘ lâi kà. Chit ê jī-bú nā tha̍k se̍k, ha̍k-seng chiū ē hiáu tàu-kù.
III. Kà-tō Būn-tap(Chi̍t pún saⁿ chiam).
Bo̍k-tek: hō͘ ha̍k-seng tha̍k ē khah sūn, iā ē chai ì-sù. Chit pún Chin-tō Būn-tap ū thang khó-chhú sī (1) Jī chin bêng, kù té-té, ū chia̍p-chia̍p teh liū, bô liâm-piⁿ oāⁿchheⁿ-ê. (2) ēng mn̄g ēng ìn hō͘ tha̍k ê lâng khah khoài chai ì-sù. (3) Tuì chit pún thang chiām-chiām bat tō-lí.
Tio̍h tì-ì hiah ê bé-chí, liân-oe̍h, toā pún-jī, tiám-kù, hō͘ ha̍k-seng chai-iáⁿ. Nā m̄-ài lóng-chóng tha̍k iā thang tiah chām.
iáu ū kuí-nā hāng tì-ì:
(1) Nā-sī chi̍t pan ê tiong-kan ū saⁿ-kuí-ê khah ē, chóng-sī iáu-boē ē kham-tit chìn chi̍t pan ê chu-keh, tio̍h siat-hoat lâi pang-chān i ē tit koè pa̍t pan, m̄ bián thèng-hāu kàu nî-tō͘.
(2) Nā ū lâng chin ham-bān toè bē tio̍h, tek-khak m̄ thang ta̍uh-ta̍uh hiâm; khah hó tio̍h khoàⁿ ū sím-mi̍h hiaⁿ-tī á-sī chí-moē thang ke kà i bián- tit hō͘ i sit-chì m̄-ài lâi. (Thài 18:5,6).
(3) Kan-ta jīn-jī kap tàu-kù bē ē poê-iúⁿ lêng-hûn, só͘-í ta̍k pái teh kà ê sî khah hó tio̍h poah 10 hun kú ēng khah khoài bêng ê si á-sī Chú-ji̍t Sîn- liông hit chat lâi kà, á-sī soat-bêng Chú ê lâi-le̍k hō͘ in tuì sè-hàn ē chai thang chiū-kūn Chú.
(4) Bô lūn sím-mi̍h lâng, sui-jiân bô lâi ji̍p Chú-ji̍t o̍h, iā thang chiong chit ê hoat-tō͘ khì gián-kiù.
(5) Jī-bú tha̍k liáu bô liâm-piⁿ tha̍k si sī in-uī hit tiong-kan ū-ê khah chhim ê ì-sù, khah hó tio̍h iû chhián ji̍p chhim, chóng-sī teh lé-pài ê sî nā hian ka-tī ê si-chheh khí-lâi khoàⁿ, chiū ná ē hiáu-tit bián lēng-goā kà.
