家庭族譜
1918.10 403卷 p.12
(黃俟命記)。
咱若入無聽道理ê 人ê 家，就liâm-piⁿ會看見in ê 廳堂有濟濟木主，寫in 祖公父母ê 名，佮簡簡ê 來歷世系。可惜in 對重過頭，續用chiah-ê 來跪拜敬奉，為著án-ni就信主ê 人有除去。因為咱ê 聖教有教示人m̄-thang做像跪拜，總是咱kan-ta攏除去，祖公父母ê來歷世系咱攏m̄ 知，也無地thang 查考，án-ni也是無抵好。近來有人翕序大人ê 相來做紀念；m̄-kú濟濟無利便thang 翕相。 Koh 若kan-ta相，無略仔記載伊ê 來歷、世系，過兩三代也是攏m̄ 知。
Tī 幾若年前有一人名叫王金龍，伊有將我所 teh備辦ê 體式去印，做了卻好看 koh 合用，可惜伊想愛對這本簿來趁錢，煞無甚物人kā 伊買。不幸這人無偌久就死去。今in 有將chiah-ê 簿來賣咱中學校友會，校友會主張愛hō͘逐家較快買，所以一本定價錢 4角（郵費在外，若較濟人買做夥寄，就 hit個所費會愈省），實在真俗， koh 是咱人人所著欠用ê 物，今若有人愛買thang 對lín本堂ê 傳道先生講，抑是lín佮做夥寫批來hō͘台南仁榮藥房，黃仁榮君，伊就會kā 你寄去。若beh 寄錢來hō͘黃先生，著對郵便局寄振替，振替ê 號就是（臺灣第361番黃仁榮），m̄-thang寄為替，因為有較傷重所費。
若有人愛hit 號較濟頁ê 亦有，有 teh 備辦hit 號比平常3倍濟ê ， koh 再重合布皮較堅固--ê ，這款ê 一本箍8。Kiám-chhái 有人bē 曉家己抄寫，也致意著請人kā 伊抄。因為若無緊緊做，驚了無偌久咱隨人ê 世系，序大人ê 事，煞攏bē 記得了了，這是咱隨人一項要緊ê 事，也thang 塞密外面人這項ê 譏刺。
(台南教會報第403卷，1918年10月) |
