衛生kap厝
1918.10 403卷 p.7
(羅乾益記。)
衛生有幾若款，從中來講起厝亦有不止大要緊ê所在。厝是人企起ê所在，若無抵好就人tiàm hit個厝，身體常常boē平安。
本地人ê厝較濟窗仔佮門真細，koh日時日光照boē著，暝--時門戶koh關密，就連一點仔空氣也boē得流通。Hit 個空氣ê中間有幾若項tī--teh，就是酸素 佮chí-sò͘ 佮炭氣，三項ê中間酸素佮chí-sò͘是第一濟。這兩種是無形式，無味素ê氣。地面逐項ê動物抑是植 物若無倚靠這個氣就無活命。所以人著常常補吸新鮮ê空氣入到肺ê所在，就人會振起精神。
Hit個炭氣是有毒，若有好ê空氣，炭氣就較少，酸素就較濟。人所喘出ê有hit個炭氣比空氣中間ê炭氣較濟，所以人若tī 密密ê所在無久hit個炭氣就滿滿，人就boē活。
M̄ -nā人著用hit個空氣，就hit個燈抑是燭會猶原是hit個空氣hō͘ 伊著。án-ni若是一間厝ê內面一葩燈就是親像加3、4個人。4、5枝蠟燭是親像加一個人teh鬥食hit個酸素。
若是厝內烏暗，空氣boē流行就寒熱症，抑是肺病種種ê病ê 虫就真gâu發生。譬喻若提肺病ê虫囥tī 日光ê所在hit個虫就liâm-piⁿ 死。
人若是愛較有衛生就著對厝來修整，第先著創窗仔較大ê,hō͘空氣流通，佮日光會照入來。扑算台灣人ê花窗佮拖窗是不止好，總--是寒天人愛關因為是驚寒。今beh怎樣創hō͘ 伊boē寒？著對內面創一塊枋對窗仔圍趨趨起來，hō͘ 寒氣對窗仔起才boē寒，總--是空氣會流通。因為人所喘出ê空氣是較輕，所以倚天羅板ê下腳著創一個花窗抑是拖窗hō͘ 歹ê空氣會出去。
厝內塗腳佮厝邊ê溝仔若常常tâm就會生蠓仔，抑是逐項毒虫會害人真濟。所以若是愛塗腳boē濕著鋪磚抑是抹洋灰，若是 beh koh起新ê 著貼地板離塗兩、三尺，hō͘ 濕氣boē起--來就人ê身軀會勇。
(台灣教會報第403卷，1918年10月) |
