傀儡戲
1918.11 404卷 p.7
(陳添旺記。)
漢高祖坐位ê時，胡人號做匈奴來圍高祖 tī 一個城。有一個奸巧ê人臣叫做陳平勸高祖，著差一人去kā hiah-ê對敵ê頭人講：「若准伊tuì城裡出--去，就beh 送伊一個中國真suí ê婦人人。」Hit 個頭人近倚來看，就看有suí giang-giang ê查某囡仔 tī 幾若個親醒 ê婦人人ê中央攏 teh行徙 tī 城頂，就允hō͘ 皇帝離開hit 個城。高祖佮伊跟toè ê人緊緊出城。匈奴ê頭人就入城，去hiah-ê婦人人teh 行ê所在，到位就知是假m̄ 是真，是婦人ê像nā-tiāⁿ，人暗chīⁿ 創活軌 teh 振動若親像活人一樣。中國ê傀儡戲是對這tia̍p 設起。高祖逃走，匈奴jip bē著。若無án-ni 瞞騙匈奴，kiám-chhái hit時漢朝會liâm-piⁿ無--去。照án-ni 看--起來，高祖用虛華ê騙計，來保伊ê國，抵著匈奴ê人好色hō͘ 人騙才了功力。到今仔日愛看戲ê人也是án-ni，in 用空空ê名位來趁錢，抵著好邪事ê人來了錢、了精神、了光陰，是親像匈奴人。 |
