小傳
Tīⁿ Gím-sam.
1920.11 428卷 p.7
(陳添旺記。)
Chit人是Bâ-û教會鄭Teng-thiam長老ê 第三子，今年18歲。淡水中學三年生，入學了後tī淡水受洗禮入教會。今年歇熱回家iáu有佮阮去赴佈道會，無扑算7 月尾起寒熱病，到9 月27 號 hō͘主召伊離開世間。28號tī大甲安葬。失chit號青年輩聽見ê人無m̄傷心。父母親人也憂悶boē了。
(1)品行當正。對父母順情、有孝，m̄ bat hō͘ 序大人氣苦。對厝邊、嬸、姆、朋友有禮數，言語溫純、正氣hō͘人欽服o-ló。
(2)Gâu吞忍。破病hiah 久，無啍呻、無khiâu人、無叫艱苦。
(3)志望高大。Hit時beh入中學，也hō͘學校先生叫去試驗師範部，有及第。總--是ài入教會ê學校，就入淡水中學校，ǹg望將來去內地留學，成名來榮光教會。
(4)信仰真深。伊ê同窗講，Tī校中早暗定時間讀聖經祈禱。Tī家內苦勸親人著熱心服事上帝。對朋友苦勸in著信基督。到破病倒床iáu深掛慮Bā-û ê教會真少人，也掛慮家內bē深信上帝。我幾若擺寫批苦勸伊m̄ thang過頭勉強，身体若無康健，學問無路用。傷tang ê 擔是難擔。到破病倒床也暝日掛慮讀冊ê事。
保羅講，盡力跑走，走到插鏢hit-- nih,iáu-kú著抵好chiah會得著賞。請看報ê兄姊替in ê父母親人來祈禱，求聖神安慰。 |
