小傳：澎湖許統執事
1921.11 440卷 p.4
(李存州記。)
統伯是屬西嶼ê教會。1902年受洗禮，今年受揀做執事。對入教會了後，熱心拜上帝，勤守聖日。雖然對著真濟ê khún-tio̍k 也無餒志；有時魚掠掠hō͘世俗人搶搶--去，也無beh佮人計較，做人真親切，厝邊人人好；真正是真ê基督徒。西嶼ê教會攏是倚靠伊1人teh料理設法，本身真甘願做主理，招人來禮拜；真正是西嶼教會ê光燈。
今無--lah! 10月7 日，就hō͘主召伊離開世間，享壽51歲。攏總破病20外日久，10外日bē講話。Tī teh-beh 死ê時，iáu會開嘴苦勸會友著熱心拜上帝，著有智識。厝邊聽著伊死，逐人無m̄吐氣流目屎講，可惜--ah,無采chit個人；án-ni就thang知伊做人的確無打緊1。總--是有一項thang 安慰咱ê心，就是伊有熱心拜上帝，的確得著主賞賜伊大平安快樂ê所在。有一項通煩惱，就是伊ê 子兒猶細漢，道理無甚物會明白，koh kan-ta 插雜tī世俗人ê中間，驚了會較餒志。請看報ê兄姊替in 1 家祈禱。 |
