Hán-iú
1925.11 488 koàn p.9-10
(Ông Siú-ióng)
Ji̍t-pún thang kóng sī Pu̍t-kàu kok, chóng-sī tuì Bêng-tī chho͘-tāi chiū tām-po̍h-á bat Iâ-so͘ Ki-tok. Tuì hit-tia̍p liáu-āu siū Ki-tok-kàu ê éng-hióng si̍t-chāi oh-tit chhek-to̍k. Tē-it hō͘ lán thang chù-ba̍k--ê, chiū-sī tī gō͘ nî chêng lán ū khui Sè-kài Ji̍t-iàu Ha̍k-hāu Tāi-hoē (tē-poeh hoê Sè-kài Chú-ji̍t-o̍h Tāi-hoē ) tī Tang-kiaⁿ, ū toā-toā éng-hióng tī Pu̍t-kàu.
Tuì hit-sî í-āu in ū toā kak-chhíⁿ, chai tio̍h kà-sī gín-ná lâi bat in ê tō-lí ê iàu-kín. Só͘-í chiū thàn lán Ki-tok-kàu ê hoat-tō͘, siat Ji̍t-iàu Ha̍k-hāu ( chiàu Pu̍t-kàu teh kóng in ê Ji̍t-iàu ha̍k-hāu tuì tē La̍k Sè-kí chiū í-keng ū, m̄-kú... ? ) In teh chìn-pō͘ ê siaⁿ, si̍t-chāi hō͘ lán thiaⁿ-liáu kàu oē kiaⁿ. Phì-lūn lâi kóng, hiān-sî in ê ha̍k-seng chóng-sò͘ ū iâⁿ-kè lán ê saⁿ, sì pē. In ê sian-siⁿ ê chóng-sò͘ ū iâⁿ lán têng-pē khah-ke ( che sī hiān-sî tī Ji̍t-pún ê pí-kàu ).
In ū put-sî teh o̍h lán ê khoán, chiong lán ê bêng-gī khioh khì choè kà-sī. Chhin-chhiūⁿ lán ū Chàn-bí-koa ( á-sī ióng-sim Sîn-si ) ; in chiū siat Chàn-pu̍t-koa ( hoan-e̍k sī ióng-sim Put-si ) , á-sī Chheng-liân-hoē, Hū-jîn-hoē, í-goā ū chin-choē khoán. ia̍h ū ēng hong-khîm gîm-si, lé-pài, kóng tō-lí. Chin hán-iū !
Goá teh siūⁿ chiong-lâi in kiám-chhái oē pìⁿ-choè Pu̍t-kàu-phê ji̍p Ki-tok-kàu-āⁿ ê khoán. Kó-jiân nā-sī án-ni, ún-tàng bô khah-su hit khoán Ki-tok-kàu-phê ji̍p Pu̍t-kàu-āⁿ ê Chong-kàu.
Thiaⁿ-kìⁿ kóng tī Kiaⁿ-to͘, tē-it tāi-seng chhù-téng ū koà toā ê Sî-cheng ê chhù, chiū-sī Tông-chì-siā. Chit ê Sî-cheng iáu tī-teh, kó͘-chá ū kâiⁿ, chit chūn iā teh kiâⁿ, khah chá ê lâng lia̍h-choè kî-koài, hong-siaⁿ pòng-iáⁿ, sì-bīn ê lâng oe-oe tīn-tīn lâi khoàⁿ, bô chi̍t-ê bô tio̍h-kiaⁿ. Chin hán-iú ! Tuì ū chit ê sî-cheng, sì-bīn ê peh-sìⁿ ke chin heng, in-uī sī bûn-hoà ê kng-teng, boē bián-tit ū chin-choē ha̍k-seng, tì-kàu boē mi̍h ê tiàm-phò͘ ke chin-choē keng. Taⁿ hiān-sî ha̍k-hāu khiok put-chí toā-keng, in-uī kiàn-siat ê ki-chhó͘ sī ēng Ki-tok-kàu ê cheng-sîn, Sin-tó Sian-siⁿ ēng huih-koāⁿ lâi chiaⁿ--ê, só͘-í tuì siat liáu-āu, ti̍t-ti̍t heng, hiān-sî ha̍k-seng ū sì, gō͘ chheng.
Koh bô loā-kú tī Kiaⁿ-to͘ teh-beh siat chi̍t ê put-chí toā ê Sî-cheng tī Tè-kok Tāi-ha̍k, chiū-sī Tiān-khì Sî-cheng. Sî-cheng-kè ê koân pah-jī chhioh, chí-sī sî-kan ê jī chi̍t jī ti̍t-kèng chhioh-saⁿ, ta̍k-jī ū ji̍p tiān-kiû. Té-chiam sī saⁿ-chhioh-poàⁿ, tn̂g-chiam gō͘-chhioh poeh tn̂g, chit nn̄g ki chiam ha̍p-teh ū sì-cha̍p poeh koàn ê tāng. Tn̂g, té, chit nn̄g ki chiam iû-goân ji̍p tiān-kiû, só͘-í sui-bóng sī àm-sî, tuì hn̄g-hn̄g ia̍h oē khoàⁿ-kìⁿ sî-kan. Chit khoán ê sî-cheng tī Sè-kài iā sī bô kuí-ê. Si̍t-chāi Chin hán-iú !
Kiám-chhái ū lâng beh kóng, cháiⁿ iūⁿ ū chit hō sū, thái-thó ū lâng oē choè chit hō khì-khū ? M̄-kú ū, chóng-sī lán tio̍h chai, " Lâng koh-khah gâu iā boē kap Thiⁿ choè tuì-thâu. " Siōng-tè chāi-chá chhòng-chō ji̍t-thâu, kàu chit-tia̍p m̄-bián chūn, ia̍h m̄-bián chhiâu. I ū toā koân-lêng, chhuì kóng-chhut chiū sêng. Cháiⁿ-iūⁿ bān-lâng boē hiáu chun-kèng ? Lâng nā ná bûn-bêng, bô tek-khak hit ê seng-oa̍h chiū oē ná khoàⁿ-oa̍h. Pù--ê chiâⁿ pù, sàn--ê chiâⁿ sàn, pah-poaⁿ seng-lí chin oh-tit thàn. M̄-kú sui-bóng put-kéng-khì, iáu-kú put-chí choē lâng ài khoàⁿ hì, tì-kàu liáu-gîn, bô bîn koh sit-sîn, kiam thâu-khak hîn. Só͘-í hì-hn̂g á-sī oa̍h-tāng siá-chin-koán, uī-tio̍h ài lán ê gîn, chiū chhē-phāng, ēng hoat-tō͘ lâi bê lán ê cheng-sîn, chiong chong-kàu-te̍k ê hì á-sī siá-chin, poaⁿ hō͘ lâng khoàⁿ, lâi choè thàn-chîⁿ ê chhiú-toāⁿ. Hiān-sî chit khoán ê Chong-kàu Siá-chin put-chí liû-hêng tī it-poaⁿ ê hì-kài. Phì-lūn lâi kóng Nî-lô-ông khún-tio̍k kàu-hoē, Mô͘-se ê Cha̍p-kài, Sat-lô-bí kiû Iok-hān ê thâu-khak, á-sī Só͘-to-má, Gô͘-mô͘-lia̍p, chit khoán ê siá-chin tī sì-koè teh poaⁿ. Sui-bóng lâng kàu-ke̍k ài-khoàⁿ, chóng-sī ǹg-bāng tuì án-ni lâi siū kám-hoà, hoán-hoé koé-pìⁿ--ê, káⁿ chhē bô chi̍t sió-poàⁿ.
Hiān-sî tī Ji̍t-pún ê Pu̍t-kàu-thoân ū teh-beh cho͘-chit chi̍t khoán pò͘-tō ê Chong-kàu oa̍h-tāng siá-chin. Só͘-í tī Kiaⁿ-to͘ Tang Pûn-goān-sī, í-keng ū teh siat-hoat tī cha̍p-ge̍h tiong, beh chiong " Mô͘-kong " ê siá-chin la̍k koàn, lâi soan-thoân in ê chong-kàu tī thong-kok. (" Mô͘-kong " ì-sù chiū-sī ēng thâu-mn̂g lâi phah ê soh-á, chi̍t toā tīⁿ pá-pá ). Chit hō soh-á, chiū-sī khah-chá chi̍t keng biō hō͘ hé sio-khì, āu-lâi teh-beh koh khí, chóng-sī bô hit khoán kàu-ke̍k ióng ê soh-á thang luī hiah ê toā sam-thiāu, só͘-í hiah ê jia̍t-sim ê hū-jîn-lâng, kam-goān chiong in só͘ pó-sioh ê thâu-mn̂g hiàn hō͘ in ê Pu̍t choè lō-ēng. Chit-khoán ê thâu-mn̂g soh-á, chit-chūn iáu gō͘, la̍k tiâu tī-teh, lâng nā kàu Kiaⁿ-to͘ ê sî , suî-piān thang khoàⁿ. Che si̍t-chāi teh hián-bêng in Pu̍t-kàu ê sìn-chiá ê jia̍t-sim, kam-goān hiàn in só͘ tuì-tiōng só͘ pó-poè ê mi̍h hō͘ in ê Pu̍t-kàu sím-mi̍h khoán. Chin hán-iú !
Taⁿ chit khoán ê siá-chin ùn-tàng oē choē lâng khoàⁿ, chóng-sī beh tuì che lâi tit-tio̍h sìn-chiá káⁿ chhē bô chi̍t poàⁿ. In-uī tāi-ke lia̍h choè sim-sek, boē hiáu beh o̍h tō-tek, kiat-kio̍k iû-goân ia̍h sī bô lī-ek.
