Kai Bo̍k-su-niû ê Sió-toān
1925.11 488 koàn p.5-6
(T. C. G. siá)
Kai Bo̍k-su-niû, sī sìⁿ Tiuⁿ miâ kiò Chhong-bêng, Tâi-pak Gō͘-kó͘-khiⁿ chng ê lâng, tī Chú-āu 1878 nî, 5 ge̍h 27 ji̍t ū kè Kai Bo̍k-su, tiàm tī Tām-chú put-chí kú, āu-lâi ū poaⁿ lâi Tâi-pak khiā-khí. I bat kap Kai Bo̍k-su chhut-goā sì-koè sûn-sī kàu-hoē, iā bat kap i choè-tīn khì Ka-ná-tāi nn̄g-pái, chi̍t pái sī tuì sai-pêng khì, ū keng-kè kuí-nā kok; chiū-sī ìn-tō͘-kok, Iû-thài-kok, Hoat-kok, Eng-kok, Bí-kok,chiah ê kok-tō͘. Tâi-oân ê hū-jîn-lâng kiâⁿ hiah hn̄g, kap Sè-kài it-chiu, káⁿ-sī i nā-tiāⁿ.
Sèng-keng só͘ kóng ê só͘-chāi, i iā ū khoàⁿ put-chí choē uī. Bat thiaⁿ i kóng, ū khì khoàⁿ Ai-ki̍p ê thah, kap Hoat-ló-ông ê sin-si, iā ū khì khoàⁿ Iâ-lō͘-sat-léng, Pek-lī-hêng, Iok-tàn-hô, Sí-hái; koh ū khì khoàⁿ hui só͘ bat iû ê hé-soaⁿ, kap Pong-pe-a ê kó͘-chek; iā ū khoàⁿ Sè-kài chhut-miâ ê toā-siâⁿ, chiū-sī Lô-má, Pek-lîm, Pa-lí, Lûn-tun. Sǹg chin ū hok-khì, ū khoàⁿ hiah choē ê kó͘-chek kap bêng-só͘.
Lūn i it-seng ê hióng-hok, put-chi chiâu-pī, i ê sin-thé iā chin ióng-kiāⁿ. Bô phah-sǹg tī kū-nî 6 ge̍h 18 ji̍t, hut-jiân tú-tio̍h ló chhut-huih ê pīⁿ, chin siong-tiōng, ū chhiáⁿ Tè I-seng kā i i-tī, kai-chài ū chiām-chiām ná hó, oē khí-lâi kiâⁿ. Kàu chit-pái koh-chài khí, chiū ji̍p tī Má-kai I-īⁿ; Lio̍k I-seng kap Gô͘ I-seng iā chin chīn-la̍t teh kā i i-tī. Khó-sioh bô chhái-kang, chiū tī 9 ge̍h 15 ji̍t, ē-po͘ 6 tiám 40 hun, lī-khui sè-kan; hióng-siū 65 hè.
I ê hō͘-è lóng tī Tâi-oân. I ū chi̍t ê hāu-siⁿ, nn̄g ê cha-bó͘-kiáⁿ; i ê hāu-siⁿ Kai Joē-liâm, teh choè soan-kàu-su, chiū-sī Tām-chuí Tiong-ha̍k-tiúⁿ, i ê sim-pū sī Ka-ná-tāi Ross Bo̍k-su ê cha-bó͘-kiáⁿ. I ê toā cha-bó͘-kiáⁿ, Kai--sī Má-liân ū kè Báng-kah Tân Chheng-gī Bo̍k-su. I ê tē-jī cha-bó͘-kiáⁿ, Kai--sī Í-lī ū kè Toā-tiū-tiâⁿ Koa Î-su Tiúⁿ-ló. Hiān-sî i ê lāi-goā sun, put-chí choē ê , iā ū chi̍t ê ka-ná-sun. Tī i ê sun ê tiong-kan, ū chi̍t ê í-keng tióng-sêng, chiū-sī Koa Siat-kai, hiān-sî teh choè Tām-chuí Tiong-ha̍k ê sian-siⁿ, kî-û--ê iáu teh tha̍k-chheh.
Taⁿ lūn i it-seng ê choè-lâng, put-chí khó-chhú, choē-choē lâng teh siàu-liām i. I chin ū jîn-ài, gâu thiàⁿ lâng, pang-chān lâng, iā gâu khoán-thāi lâng. Chá-sî tī Tâm-chuí ê Sîn-ha̍k-seng kap Lú-ha̍k-seng, ta̍k-ê ū tit-tio̍h i ê khoán-thāi. Sì-hng ê hoē-iú kap thoân-tō-su, nā kàu Tām-chuí, lóng ū tit-tio̍h i ê khoán-thāi, in-uī i sī chin toā-liōng ê lâng.
I ê khoán, siông-siông hoaⁿ-hí, hán-tit khoàⁿ i ū hián-chhut hoân-ló ê khoán, iā bô kiau-ngō͘, bô kek-phài, bô ài kap lâng kè-kàu, chin gâu thun-lún; hoān-nā kap i saⁿ-bat ê lâng, ta̍k ê o-ló i. I tī Má-kai I-īⁿ kè-óng liáu, i ê kó͘ pêng-iú, Gô͘ Bo̍k-su-niû, ū tuì chhin-lâng thó ài i ê sin-si hē tī in tau, i chiū kap i nn̄g ê cha-bó͘-kiáⁿ kā i oāⁿ saⁿ, chhit seng-khu; chiong i ka-kī ê bîn-chhn̂g hō͘ i tó, chiong i ê lâng-kheh-thiaⁿ hō͘ i hē, chin thiàⁿ-thàng i, lóng bô kiaⁿ. Tī Tâi-oân iáu-bē-bat khoàⁿ-kìⁿ án-ni; hoān-nā ài choè lâng ê pêng-iú tio̍h o̍h chit khoán ê bô͘-iūⁿ. Koh-chài Lâu Bo̍k-su chin chhut-la̍t siat-hoat choè koan-bo̍k, sī Se-iûⁿ-sek, ēng o͘-pò͘ lâi piⁿ tī goā-bīn, ū chhòng chi̍t ê khang, ji̍p po-lê, hō͘ lâng thang khoàⁿ i ê bīn; i ê sin-si ū chiam io̍h, khǹg la̍k-ji̍t kú chiah bâi-chòng, in-uī teh thèng-hāu Kai Sian-siⁿ tuì Loē-toē tńg-lâi thang khoàⁿ; tī hit la̍k-ji̍t ê tiong-kan, chin-choē lâng lâi bāi-song.
Chòng-sek hit ji̍t, i ê koan-bo̍k ū tui Gô͘ Bo̍k-su-niû ê chhù, kng kàu Siang-liân thêng-chhia-tiûⁿ, sī i ê chhin-lâng kap thoân-kàu-su kā i kng. āu-lâi tuì hé-chhia chài kàu Tām-chuí ê sek-tiûⁿ, chiū-sī Tām-chuí Lé-pài-tn̂g. Hit ji̍t lâi hoē-chòng ê lâng, chóng-kiōng ū la̍k-pak goā lâng.
Chòng-sek ê Sūn-sū
Chú-lí Lâu Bo̍k-su
1. Sèng si(136) Hoē-chòng-chiá.
2.Kî-tó Siau Bo̍k-su
3.Tha̍k Sèng-keng Chiong Bo̍k-su
4.Soat-kàu Lâu Bo̍k-su
5.Sèng si(38) (Pún-lâng siⁿ-chêng ài gîm.)
6.Lí-le̍k Keh Hi-sìn Bo̍k-su. Lîm Bêng-tē Tiúⁿ-ló Lí Bêng-tē Tiúⁿ-ló
7.Kóng tiàu-sû Pa Phok-sū. Tân Khêng-iâu Bo̍k-su
8.Tha̍k tiàu-sû Chiam Hù-ok Tiúⁿ-ló
9.Tha̍k tiàu-tiān Tân Khoe-chùn Thoân-tō-su
10.Tap-siā Kai Sian-siⁿ
11.Sèng si(164) Hoē-chòng-chiá.
12.Chiok-tó Lâu Bo̍k-su
āu-lâi Tiong-o̍h ê ha̍k-seng ū kng i ê koan-bo̍k, hêng-lia̍t kàu Phàu-tâi-po͘ Má-kai kiōng-tông bō͘-toē, bâi-chòng tī Kai Bo̍k-su ê sin-piⁿ. Taⁿ i ê sin-si kàu-chia tāi-ke teh iu-būn; nā-sī i ê lêng-hûn kàu Thian-tông, tāi-ke teh hoaⁿ-hí. án-ni hō͘ lán thang an-uì.
