Kò͘ Toh Chong-khèng ê Sió-toān
1927.01 502 koàn p.9-10
(So͘ A-kun)
Chong-khèng-peh sì kù iàu-kín ê uî-chiok
Chong-khèng-peh chhut-sì tī Thô-hn̂g-kūn, Png-chhiū-chng Niá-téng. Saⁿ-hè lāu-pē kè-sin, bô ki-hoē thang tha̍k-chheh, só͘-í m̄-bat jī; it-seng sī keng-lông.
I tit-tio̍h tō-lí ê in-toaⁿ, sī tuì Niá-téng soá lâi Lâm-khàm biō-kháu, kap in tiūⁿ-ḿ toà saⁿ-kūn ê só͘-chāi. I ê tiūⁿ-ḿ , Chng--sī Khit, sī pài Siōng-tè ê lâng, chiū siông-siông chio i ê kiáⁿ-sài kap cha-bó͘-kiáⁿ khì Lâm-khàm Pài-tn̂g thiaⁿ tō-lí. Tuì hit-tia̍p Chong-khèng-ḿ chiū siông-siông chhoā i ê kiáⁿ sim-pū khì lé-pài thiaⁿ tō-lí kap tha̍k Chú-ji̍t-o̍h.
Hit-tia̍p Chong-khèng-peh iáu-bē sìn, chóng-sī m̄-káⁿ chó͘-tòng lé-pài; ka-kī pài sîn-bêng. Chong-khèng-ḿ siông-siông bián-lē, chio i tio̍h khì lé-pài thiaⁿ tō-lí. I ìn i, kóng, "Choè lé-pài kiám oē pá mah?" Kè bô joā-kú chiū tú-tio̍h phoà-pīⁿ, Chong-khèng-ḿ chiū sūn ki-hoē khó͘-khǹg bián-lē i tio̍h choan-sim ho̍k-sāi Siōng-tè, chiah oē-tit pêng-an.
Tuì án-ni siū-tio̍h i ê hū-jîn-lâng chhim-sìn, jia̍t-sim thoè i kî-tó ê kám-hoà kap bián-lē, chiū siū kám-kek, chin hoaⁿ-hí tû ngó͘-siōng, chiū choân-ke tâng-sim sìn Chú, tit-tio̍h pêng-an hok-khì.
Tī 1898 nî tuì Kai Bo̍k-su niá soé-lé. Tī 1906 nî tuì Lâm-khàm soá lâi Hoe-liân-káng Cha̍p-la̍k-tó͘ choh-chhân. Hit-tia̍p Hoe-liân-káng iáu-bē siat- pài-tn̂g, bô thang chū-chi̍p lé-pài. Tī 1907 nî koh soá lâi Kun-ui-chng. Hit-sî Niû Kong-liōng Tiúⁿ-ló choân-ke iā soà khì toà hia. Tuì án-ni chiū kau-poê saⁿ se̍k-sāi. āu-lâi chiū saⁿ-chio khì Hoe-liân-káng, Kai Pat-pó Sian-siⁿ ê chhù, choè lé-pài.
Kàu 1910 nî koh soá lâi Hōng-lîm Hang-lô͘-chhuì khai-khún sì nî kú. Hit-tia̍p chhiⁿ-hoan chin kiap. I ê kiáⁿ khì chhân-ni̍h chò-sit, hō͘ chhiⁿ-hoan khui chhèng phah bô tio̍h, chiū cháu lī. Chhiⁿ-hoan chiū khì chhù-lāi lia̍h ti khì thâi, si̍t-chāi chin guî-hiám, iā chin kan-khó͘. āu-lâi siūⁿ bô thò-tòng, chiū soá khì Ta̍k-kai-phīⁿ. Hit-tia̍p ū tām-po̍h pún-chîⁿ, chiū tī-hia boé thó͘-toē khai-khún, chéng-lí; kàu kin-á-ji̍t ū toā sêng-kong.
Hit-sî tī Hōng-lîm lâng chin chió, bô koe-chhī, bô pài-tn̂g thang lé-pài, chiū tī ka-kī ê chhù chá-àm chhoā ke-lāi toā-soè chū-chi̍p ka-têng lé-pài, ho̍k-sāi Siōng-tè.
Lūn i ê sìn-gióng chin chhim. Tì-ì toā-soè chá-àm choè ka-têng lé-pài. I ê choè lâng khûn-khiām tiong-hō͘, kap it-poaⁿ ê lâng hô-bo̍k. Bat i ê lâng ta̍k-ê o-ló i ê láu-si̍t tiong-hō͘, gâu thiàⁿ lâng. I siông-siông kà-sī kiáⁿ-jî, kóng, "Lán sìn Chú ê lâng tio̍h niū lâng phiⁿ, m̄-thang phiⁿ lâng, chiah ū hok-khì." I iā gâu chun-kèng thoân-kàu-chiá.
Tī 1926 nî chiâⁿ-ge̍h khí, uī-pīⁿ put-chí siong-tiōng, chiū khì Hoe-liân-káng Pīⁿ-īⁿ, chha-put-to saⁿ lé-pài kú chiū hó. Kàu 5 ge̍h pīⁿ koh khí, tī liâu bô-hāu, 7 ge̍h 8 ji̍t, hō͘ Chú kéng-tiàu lī-khui sè-kan, hióng-siū kú-tn̂g ê hok-khì; kin-nî 76 hè. Bē lîm-chiong ê sî ū kiò i ê kiáⁿ, sim-pū, sun, oá tī chhn̂g-chêng; ū kóng sì kù ê uî-giân chin ū kè-ta̍t:
1.Tio̍h thoân-pò thian-lí.
2.Tio̍h saⁿ-hô saⁿ-thiàⁿ.
3.Tio̍h kám-siā Siōng-tè ê siúⁿ-sù.
4.Kā kiáⁿ-sun chiok-hok, pêng-an hù-kuì bān-bān nî.
Taⁿ ǹg-bāng i ê kiáⁿ-sun oē chiàu i ê uî-giân. Lūn i ê hō͘-è, hiān-cāi la̍k ê kiáⁿ, gō͘ ê sim-pū,nn̄g ê cha-bó͘-kiáⁿ; sun cha̍p-it ê ; sun-lú poeh ê ; ióng-lú saⁿ ê.
Tē-jī kiáⁿ Toh Khai-ji̍t kun, jia̍t-sim choè Chú ê kang chin kú, hiān-jīm tī Siang-khoe thoân-tō. Tē-la̍k ê Toh Hêng-lī kun, hiān-chāi tī Tâi-lâm Sîn Ha̍k-hāu, lâi-nî 4 ge̍h chiū chut-gia̍p. Chong-khèng-peh thang kóng chin ū hok-khì. Beh lîm-chiong ê sî, i ê ka-cho̍k lóng tī i ê sin-piⁿ kap i kóng oē. I ê keng-kè put-chí ū thang hō͘ láng iú-kám ê só͘-chāi. Goá siá kuí-jī hō͘ láng thang siàu-liām kap o̍h i ê hó só͘ kiâⁿ.
