首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 夫婦生活ê新倫理
夫婦生活ê新倫理
卷期：第511卷 本次： 日期：1927/10 刊名：台南府城教會報 頁數：13
篇名：夫婦生活ê新倫理 [ Hu-hū Seng-oa̍h ê Sin Lûn-lí ]
作者：
  顯示 : 漢羅 全羅 並列  

夫婦生活ê新倫理
1927.10 511卷 p.13-15
(Ní-lâm-seng)
1.身軀道德ê大增差舊式就是「支那流」ê道德，是（中國式）將父子ê關係做家庭ê根本；用「孝」字做頭。總是家庭ê根本的ê事實，較m̄是父子ê關係；是夫婦ê關係。因為家庭ê基礎是「性」ê問題，父子ê關係是「性」ê問題ê延長nā-tiāⁿ。這個根本ê事實若m̄知影，的確bē thang解決家庭ê問題lah。用父子ê關係做基礎來結婚，所以若無子就離某；這是「孔子流」ê倫理。親像這款辯疑主義，正錄主義，家風主義ê結婚，人生就變成親像機器性，無熱，無活命tī-teh。所以近來bē免得今出生自由戀愛，hit款ê反動；hō͘家庭變做混沌，衝突ê所在。
所以耶穌頭一擺行神蹟ê時，祝福人生生活ê源頭；用夫婦一體ê倫理做上帝所定著ê根本道德。這個「性」ê事實，tī 2000年前就已經看破；將新道德ê基礎下tī chia ê,就是新倫理ê創作者耶穌。所以現代人所要求ê就是這款新家庭ê倫理。
2.一夫一婦ê新道德。若用「性」做根本來想ê時，一夫多妻ê不合理m̄免講；男尊女卑ê偏僻道德也是bē thang滿足。設使家己有30個婦人人，敢攏會平等款待In？也30個婦人人敢會盡忠節？所羅門也家己嘆氣，講，tī 1000人ê中間伊無thang發見一個真ê婦人人。親像自由變愛主義者，抑是小說家所講hit款空想ê戀愛（Romantic love），tī結婚前kiám-chhái真心適，總是若入tī實在ê生活就真悲慘，艱苦滿滿相續來。
真ê戀愛是一夫一婦ê貞節，結婚後所完成ê愛。破病、勇健、好額、散hiong，攏相佮流汗，流目屎，試苦chiáⁿ 5年抑10年ê戀愛才是真實ê。娶細姨，用暴力來壓迫，無理氣ê所在，決斷bē thang完成真ê戀愛；只有公平，誠實，佮貞節ê所在，伊甸園ê花才會開。
所以現代ê新人所要求ê?是淺薄ê自由戀愛；就是一夫一婦ê神聖戀愛。日本抑是美國，hit款結婚觀念較粗魯ê國，自然離婚數較濟；親像英國較致意tī家庭ê觀念，所以離婚數非常少。無離婚ê夫婦無的確攏較幸福，kiám chhái有真濟悲劇ê事；總是比自由離婚者，穩當有較好過ê事。理氣隨在人做；總是一夫一婦是神聖ê戀愛道德，請免相爭。
3.配偶選擇ê倫理。一夫一婦若是戀愛ê基礎，就配偶ê選擇也著照合意來行。Kan-taⁿ用地位、財產、學歷佮血統做標準來選擇，是著重家庭主義過頭ê結婚觀較有合；總是戀愛神聖ê新道德，án-ni是無到額。以上ê標準，m̄是講全然無必要，因為chiah-ê是附屬物，m̄是根本要素。
根本主義，就是做人ê結婚；比地位、財產、學歷，koh較要緊就是人格。用地位抑是財產做目標ê結婚，m̄是人ê結婚，就是物質佮物質ê結婚。所以做人ê結婚，必要ê倫理性要素就是：(1)人格。(2)理解。(3)生活ê基礎。(4)健康。Chiah-ê是beh製造幸福ê家庭，絕對性必要ê要素；其它家統佮血統ê關係，照優生學上來看也是不止要緊，m̄-thang看輕。為著這個目的，青年男女四正ê理解真必要；所以若有抵好ê人來指導，kiám-chhái thang開一個交際路。男女交際論實在是真深ê議論，koh是真困難ê問題；所以tī chia m̄免議論傷濟；扑算若用家庭做中心，親像基督教家庭主義這款ê方針做頭一步來行；kiám-chhái會thang做一項解決結婚問題ê幫助。向望逐家研究就是lah！
4.做伴侶ê倫理。夫婦間ê新倫理，就是做伴侶（partner)ê倫理。男尊女卑ê倫理是用三從ê教示做根本；基督教倫理是將親像做一體ê伴侶主義做基礎。前者是將服從做婦人人ê好德；後者就是要求理解，協同hit款一體ê資格。新家庭ê理想就是相理解、同情、協力這款ê相疼，服事。強者吞弱者這款舊式ê家庭是不平，不滿佮giâu疑nā-tiāⁿ。
雖是án-ni，新倫理，m̄是親像自然主義，用享樂做目的；是將母性禮讚主義來提倡論「做主婦」，「做老母」ê理想。賢母良妻主義，有時kiám-chhái會生出男尊女卑做動機；總是母性禮讚主義是有承認人格平等這款ê意識，所以無相像。屈服性做某做老母是真受屈辱；總是hō人承認koh尊敬做「某」，做「老母」ê價值；這個是婦人人ê榮光koh幸福。世間有獨身較合ê婦人人；總是婦人人ê天性是在tī做「老母」，做「某」，所以若bē thang發揮hit個本性價值ê婦人人，實在無幸福。所以照家庭倫理，婦人人ê根本義就是做「某」，做「老母」；相像án-ni，家庭ê男子ê本義就是做「丈夫」，做「老父」才著。今仔日ê教育有講，「母道」，無講，「父道」；有講，「妻道」，無講，「夫道」，實在是倫理教育缺陷。
5.婦人職業ê倫理。生理學上獨身較好ê婦人人，抑是姑不chiong著獨身ê婦人人，也有。為著chiah-ê人，in ê職業是必要；這也m̄免講。總是beh結婚，抑是已經結婚了ê婦人人，也有職業問題；婦人職業ê倫理，就是路尾所講這個。
這個問題也是有二個方面：(1)職業，生活上無必要，總是教育上著學職業抑m̄免ê問題。(2)為著吃著chhoē職業，這款婦人ê勞動問題。
頭一款(1)ê婦人人，若受普通教育以外；koh hoō伊修得相當ê職業，就會含養，自覺佮獨立ê精神，發揮人格；準備做合tī in ê使命。
婦人人beh堅固人格佮節操，m̄-nā職業性ê自覺必要；就社會也beh要求婦人人ê職業教育，也著十分ê考慮。婦人人ê結婚期較有這款神經病，kiám-chhái是性ê原因，總是較大ê原因是teh操心等聽候良緣，所以若有抵好ê職業，就會hō͘伊得著獨立ê自覺；這個做精神治療也是有價值。所以看輕職業婦人，這款ê傾向著ái矯正。因為這個傾向，婦人自身佮社會攏有責任；所以逐家反省，來矯正m̄好ê思想；hō͘婦人人自覺職業ê要緊才會用得。
第二款，勞動問題m̄是kan-ta婦人，男子也共通；所以m̄免tī chia議論。
以上所講chiah-ê,向望逐家了解；也向望chiah ê做教育家以及父母ê人koh較留心、研究、指導；就是萬幸ê事。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461