Sat-bûn Chè-chō-hoat
1928.11 524 koàn (Koà-chhài-chí Tē 33 Hō) p.19-20
(Tiuⁿ Ki-choân)
Sat-bûn chiàu lán só͘ chai, sī ka-ka hō͘-hō͘ muí-ji̍t só͘ tio̍h ēng ê ji̍t-iōng- phín, hō͘ lán thang soé seng-khu, i-chiûⁿkap ta̍k hāng. Kî-thaⁿ tī kang-gia̍p hong-bīn iā-sī put-chí iàu-kín, chhin-chhiūⁿ chè-choá kang-gia̍p tio̍h engchhīu-ka sat-bûn, ìn-sek, hông-chuí-po͘tìoh ēng アルミニラム sat-bûn, chú iû- chat-iû (boiled oil) ê sî ū ēng マンガン sat-bûn, án-ni thang kóng sat-bûn ê lō͘-ēng sī chin toā.
Chit ê sat-bûn ū lâng kóng chin chá chiū í-keng hoat-bêng, chiū-sī tī Í-tāi-lī kok hái-kíⁿ ū chi̍t ê sió káng-kháu, miâ kiò-choè Savona. Tī hia ê thó-hî lâng tī hái-kîⁿ koâⁿ-thiⁿ-sî àu-hé-tui, chiong hit hé-hu kiáu-chuí, iā hit ê chuí bô phah-sǹg khì lām-tio̍h hî ê iû, soà ngó͘-gû-jiân chiâⁿ sat-bûn. In chiong chit ê sat-bûn khì soé chhiú koh put-chí oē khì lâ-sâm kap iû-káu. Tuì án-ni ti̍t-ti̍t chìn-pō͘, hoat-ta̍t, soà ū lâng choan-bûn teh chè-chō chit hāng mi̍h lâi teh boē. āu-lâi chài kàu Au-chiu ta̍k kok khì boē, put chí hó-ēng, só͘-í goā-kok lâng m̄- chai chit hāng mi̍h sī sím-mi̍h choè--ê, kan-ta chai sī tuì Í-tāi-lī ê Savona lâi, só͘-í Hoat-lân-se lâng kā i hō choè ‘Savon'; lán kiò-choè sat-bûn, sī kóng- liáu cháu im khì, Eng-gú kóng ‘Soap' iā-sī tuì án-ni lâi hō--ê.
Tī Chú-chêng 79 nî Í-tāi-lī ê Vesuvius hé-soaⁿ piak-li̍h ê sî, kūn-piⁿ ū chi̍t ê siâⁿ-chhī kiò choè Pompeii ū hō͘ hé-soaⁿ ê hé-hu khàm-ba̍t. Kīn-nî ū ku̍t-tio̍h hit ê siâⁿ-chhī, iā ū hoat-kiàn--tio̍h teh boē sat-bûn ê tiàm, án-ni hō͘ lán thang chai sat-bûn tī hit sî chiū í-keng ū lâng chè-chō hoàn-boē lah !
Liáu-āu sè-kan chiām-chiām chìn-pō͘,lâng ê tì-sek ti̍t-ti̍t khui-khoah, chè-chō sat-bûn ê hoat-tō͘ iā toā-toā chìn-pō͘ kái-liông; sè-kài bûn-bêng ê ta̍k kok lóng ū teh chè-chō, Ji̍t-pún nî-nî ê chè-chō gia̍h iā-sī chiūⁿ chi̍t chheng-bān kho͘ í-siōng. Hiān-sî sè-kan tē-it hoat-ta̍t, choè tē-it choē, tē-it hó ê sat-bûn chiū- sī Eng-kok kap Hoat-kok, āu-lâi chiah Bí-kok, Tek-kok. Sui-jiân Ji̍t-pún kok ka-kī ū teh choè, iáu-kú ke̍k hó ê hoà-chng sat-bûn iā-sī m̄-ta̍t Eng-kok, Hoat- kok ê chè-phín.
Sat-bûn chè-chō kang-gia̍p, ha̍k-lí-tek ê lí-lūn chhiáⁿ mài kóng-khí, chiong i ê kang-tiâⁿ kap kui-bô͘ lâi kóng, thang kóng sī hoà-ha̍k kang-gia̍p ê tiong-kan tē-it khoài choè ê sū-gia̍p. Toā chu-pún chiū choè khah toā, chhin-chhiūⁿ hoē-siā ê cho͘-chit án-ni. Nā sió chu-pūn, chiū choè khah sió, iā-sī bô siong-kan.
Goá khoàⁿ lán Tâi-oân ê bîn-tō͘ chiām-chiām teh khah koâiⁿ, chū-jiân ka-ka hō͘-hō͘ teh ēng sat-bûn ê lâng nî-nî ti̍t- ti̍t ke-thiⁿ. Pún-chiâⁿ sat-bûn lóng sī tuì Hiong-káng, Ē-mn̂g, á-sī Ji̍t-pún Loē- tē chài-ji̍p-lâi, āu-lâi tī Tâi-pak Báng- kah ū khí chi̍t keng chè-chō sat-bûn ê hoē-siā, chu-pún-kim sī 5 bān-kho͘, bô kuí-nî choè liáu put-chí ū thàn, chiàu khoàⁿ chiong-lâi iā-sī oē thàn, só͘-í chit khùn chu-pún ke-thiⁿ kàu 50 bān. Hiān- sî ū choè choē-choē khoán ê sat-bûn hoàn-boē tī lán Tâi-oân choân-tó. Kî- thaⁿ iáu ū kuí-nā keng soè keng--ê, iā thiaⁿ-kìⁿ Lâm-pō͘ iā ū sió kui-bô͘ ê hoē- siā teh choè. Sui-jiân án-ni lán nā khì tiàm-thâu boé sat-bûn ê sî chiū chai Loē-tē sat-bûn iáu-kú sī ti̍t-ti̍t teh lâi. Mitsu-wa (? ? ? ) sat-bûn, Hoa-ông, Ka-têng, ??? , chiah-ê lóng sī Loē-tē lâi--ê, án-ni hō͘ lán thang chai tī Tâi- oân chè-chō sat-bûn iáu sī put-chí iú- bāng ê kang-gia̍p.
Taⁿ goá chiong goá tī Tiông-kî-chhī Ma-su-ni sat-bûn hoē-siā si̍t-si̍p ê keng- giām, chiū-sī sat-bûn ê chè-hoat ēng sím-mi̍h goân-liāu, sat-bûn ê sek-tī, phang-liāu, sat-bûn hó-pháiⁿ ê hun-piat chiah--ê kán-tan siá-bêng tām-po̍h, ǹg- bāng oē choè it-poaⁿ ê siông-sek kap chham-khó.
Sat-bûn chè-chō ê goân-liāu, thang tāi-lio̍k hun choè nn̄g toā-hāng.
1. Chi-hong kap iû, chóng-kóng sī iû-chi, chit hāng koh thang hun choè A, B, nn̄g khoán.
A.Tōng-but2-sèng ê iû. Chhin-chhiūⁿ gû-iû, ti-iû, iûⁿ-iû,bé-iû, keng-hî-iû, un-á hî-iû chiah-ê.
B.Sit3-but3-sèng ê iû. Chhin-chhiūⁿ chhài-chí-iû, thô͘-tāu-iû, toā-tāu-iû, mî- chí-iû, moâ-iû, n̂g-moâ-chí-iû, à-moâ- jîn- iû, hoan-be̍h-iû, hiòng-ji̍t-kuî-chí-iû, tê-iû, ka-ná-iû, iâ-chí-iû, chiah ê.
(āu-pái koh chiap-soà).
