印度會外ê人
1929.06 531卷 p.6-7
Srinivasa Sastri是印度1個出名最有經歷ê人，伊是會thang hō͘ 人尊敬做印度實在ê百姓ê代表tek ê人。
Tī 主後1921年有代表印度去赴國際聯盟，koh 受委託去視察奧地利亞，Sin-ngí-lân、加拿大，替伊ê 同胞tī hia 設法in ê問題。伊是樞密院ê顧問官ê一個，是倫敦ê自由民。Thang 講是印度人ê上級ê 一個出名人。論基督教ê道理伊有án-ni 講：
「我m̄ 是基督徒，亦無親像我ê 同胞濟濟人，去tī 基督教ê 學校讀冊。總--是tī 濟濟年中間，我bat觀看基督教ê 活動。M̄-bat 讀基督教ê 冊，所知影基督教ê道理是tuì 我專心致志來研究英國文學佮詩文學。Tuì 我所經驗基督教ê 信徒，thang 講世界宗教中著名ê地位是屬基督教，因為伊有感動力hō͘ 人獻身佮博愛ê奉侍。
基督教有組織宣道會tī 世界逐所在，tī 文明ê國民佮野蠻ê百姓ê中間。Ta̍uh-ta̍uh抵著人無同情、人反對、毀謗iáu-kú無siān無懶，知有甚物物thang 興起人第一懸佮第一高尚ê品性。
印度ê艱苦大面是因為無智識koh貧憚。宣教師teh 教m̄-bat 字ê人也是teh 開闊基督教。因為in無惜錢佮氣力完成chiah-ê 重要ê事，基督教teh 征服世界，將來會koh 較大成功。
基督教iáu 有濟濟著造成ê事。交戰iáu boē廢止。耶穌基督ê宗教，是平安王ê宗教，boē廢止交戰ê心bē thang 講是完成伊ê 主旨。
印度宗教者攏著實行克己。因為án-ni，基督教ê宣教師盡克己甘願出力tī 下級佮受壓制--ê中間，無掠世間ê奢華事情做要緊，伊是hō͘ 印度人尊敬poâⁿ過逐人ê頂面。」
Chiah-ê 話那想，那知影，十字架ê力今仔日無輸使徒hit 時代ê力--lah。 |
