首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 梅牧師ê批
梅牧師ê批
卷期：第537卷 本次： 日期：1929/12 刊名：台灣教會報 頁數：6
篇名：梅牧師ê批 [ Muî Bo̍k-su ê Phoe ]
作者：梅監務 Muî kàm-bū
  顯示 : 漢羅 全羅 並列  

梅牧師ê批
1929.12 537卷 p.6-8
批寄hō͘台南基督教ê中會佮眾兄弟姊妹收。願lín 大家得著咱ê天父上帝ê疼痛佮主耶穌ê恩典，以及聖神啟示氣力ê充滿。
Tuì 相離別到今已經有經過5年較足。是我佮我ê 婦人人toà tī 大雅ê 時，ài鬥設教會，有染著1等號較重ê熱病；hit 個病常常koh 起hō͘我身軀較lám,無力thang tī 這爿傳主道，亦攏bē得thang koh 來台灣。若是阮無làng 日ta̍uh-ta̍uh替lín 逐家祈禱感謝上帝，koh 求主開路hō͘阮會佮所數念ê信者相見面。
1月日前我有接著電報講，中會（就是中會ê議長）託我去赴蘇格蘭教會ê總會，thang 講幾若百年ê中間boē bat抵著親像這pang ê款式。
較無400年前國內ê百姓有同心歸正成做長老教。真無采，皇帝ài勉強教會變做Kam-tok教。教會m̄ 敢降服，ài趁上帝ê命令。皇帝亦bat 赴總會，意思是beh壓制眾牧師長老；in攏m̄ 認皇帝做教王。In所議定無照伊ê 旨意，皇帝就命令總會著四散；in決斷m̄ 。
教會若同心就較m̄ 免驚皇帝ê哄喝。從中有牧師較冷淡、較小膽，koh tī 議院有國議員無tuì 重道理，ài世間ê榮光、歡喜趁皇帝ê命令。Tuì án-ni 200外年前蘇格蘭ê教會有受大窘逐悽慘。主後1662年，寒天時政府有出命令，講tuì 20年前以後上任ê牧師著認hiah-ê kam-tok做主，koh 著hō͘地方ê業主舉薦，才會堪得當職；若無著lut 職，koh m̄ 准in企起tī hit 地方，就是in往過所toà ê拜堂ê近圍。Hit 時國內ê牧師倚1200名，從中上熱心--ê是hiah-ê 20年久以下當職--ê。無扑算400個決斷m̄ 降服，甘願放sak 禮拜堂、厝宅、某子，去四界流，四界bih。禮拜日拜堂濟濟間攏關--teh，信者就走去內山較閃避ê所在，聚集tī 山坑，聽盡忠牧師ê道理；濟濟人煞醒悟、反悔，接納耶穌做in ê救主。
Hit 時代ê牧師、信者真艱苦到極。Tī 山--ni̍h講道理聽道理攏是犯國法ê罪。28年ê中間hông關落監、gí流 、定死罪，以及hiah-ê 為道理走去外國，抑是tī 本國走去bih tī 山穴煞寒--死、餓--死ê牧師佮兄弟姊妹共有倚2萬人（18,000）。
Hit 個災厄已經過--去。教會卻有較安靜，iáu-kú有時受壓制；第一阻擋道理是兄弟無甚物自由thang 揀選牧師。政府猶原ài chhap ，將hit 個揀牧師ê權交代有家業ê人。富戶ê人，若無tuì 重道理，有時揀資格無合ê人做牧師。信者m̄ 願禮拜，來聽hit 號ê 牧師，就獨立起拜堂請牧師。Tuì án-ni一代過一代教會有那分開，hiah-ê ài自由ê人成做新ê教派。Hit 號ê教派m̄ 是自由教，猶原是長老會，佮國教無各樣。
今感謝上帝，這幾10年ê中間國內ê基督徒那有囥相和相疼相讓ê心；自由ê教派幾若個有漸漸合做一體，到主後1900年國內較要緊ê教派偆2個nā-tiāⁿ，就是國教（Established Church）佮合一自由教(United Free Church)；這2個攏是長老教，道理、教法、禮拜相同。Tī 國教陪餐者有倚700,000名，tī 自由--ê有倚500,000名。
Tuì 20年前國教ê牧師長老幾若人大欣慕beh 佮自由--ê聯合一個團體，就佮in hit 爿ê牧師、長老直直議論這層事。M̄-nā án-ni，in有佮政府宰相參詳，求in著設法免tit別日官府chhap 教會ê事。古早教會提起這層事，政府攏m̄ 聽。佳哉這近來差真濟；下議院、上議院同心一意議決tuì 今以後無論皇帝、政府、官府著m̄-thang chhap 教會ê事，煞認講教會有自由權。皇帝准。án-ni-siⁿ 國教到永遠bē 會koh 受甚物政府ê強制手段，抑自由--ê thang 好膽佮國教合一。
所以今年，就是主後1929年10月初，國教ê總會有聚集，議定beh佮自由--ê合群，自由--ê ê總會同時也議定beh佮國教合群。然後國教ê眾牧師、長老成陣出外口行京城ê街路，兩人兩人掠排逐家相toè 。抵好到hit 時自由--ê 眾牧師、長老猶原成陣出門行街路，行到較闊ê所在就佮國教--ê鬥陣，大家tìm 頭tùn手。通城ê百姓e-e 陣陣圍teh 看，koh 吟詩篇歡喜o-ló 上帝。已經鬥陣hiah-ê 聯合ê牧師、長老就koh 行街路，4人4人掠排大家相toè ，行到大間拜堂感謝主。
到下晡聯合ê總會聚集tī 一間公堂，hit 間會坐得萬二人。Tī hia 牧師、長老、受託ê外國人佮受請ê官員、國議員、大學ê先生，以及別教派所派ê牧師、kam-tok、太kam-tok攏有來赴。信者幾若千亦聚集坐到滿堂。皇帝真ài來赴總會，抵著破病ê阻擋就派皇子，m̄ 是親像古早ê款式ài管總會，是ài佮入教ê人認兄弟。Hit 時逐家有聚集幾若點鐘久，聽皇子佮總會ê議長以及濟濟出名ê人演說。Kì-sū亦讀幾若人恭賀ê批、電報，台灣教會大會ê電報亦在內。
阮亦1暗bat hō͘京城ê官府請；又koh一日中晝總會ê議長佮Kì-sū有請台灣、印度、支那、德、瑞士、瑞典、米佮其餘hiah ê國ê教會所派ê人。
眾百姓大歡喜感謝上帝，想講到這時有得著較新款ê教會，就是自由ê國教，koh 國內ê信者較濟攏做一個團體。大家大向望求上帝施恩hō͘信者，án-ni 合一下續合力來備辦主ê路tī 本國佮外國。
現時蘇格蘭教會ê陪餐者 有1,300,000人。
牧師 有 3,000人。
長老 有 34,000人。
宣道師，查甫佮查某倚800人。Koh 有48人做主ê工tī 猶太人ê中間。
請台灣ê眾信者求上帝施恩hō͘蘇格蘭ê教會，會受聖神ê感激，逐家心熱熱，gâu 榮光主，gâu 引chhoā 冷淡、背逆、m̄ ài聽道理ê人來信靠耶穌。
1929年10月15號，梅監務 tī Len noxtown Scotland 寫。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461