Ko Sian-siⁿ ê Sió-toān
1912.11 332 koàn p.6-7
Sian-siⁿ sìⁿ Ko miâ Tióng; Choân-chiu-hú Chìn-kang-koān ê lâng; chhut-sì tī 1837 nî. Siàu-liân ê sî koè-lâi Tâi-oân bô͘-seng.
Khí-thâu lāu Má I-seng koè-lâi Tâi-oân khui I-koán siat-kàu, ū tuì Chiang-chiu chhiáⁿ Bûn-peh koè-lâi Tâi-oân chò pò͘-tō-su. Ū chi̍t-ji̍t sian-siⁿ pī-pān kim hiuⁿ chek beh khì hē ông-iâ, tú-gū Bûn-peh teh pò͘-to, sian-siⁿ chiū thêng-kha lâi thiaⁿ ; thiaⁿ-liáu sim siū kám-kek, tuì án-ni bô khì hē ông-iâ chiū sìn Chú.
Hit-sî Tâi-oân sìn-chú ê lâng iáu chió, koh goā-kok ê sian-siⁿ ta̍k ê kiaⁿ--in; só͘-í I-seng ū chhiàⁿ sian-siⁿ lâi liāu-lí tû-pâng ê sū. Bô loā-kú sit chē kang chió, Sian-siⁿ iā sī jia̍t-sim sìn Chú ê lâng, I-seng chiū chhiáⁿ i chò pò͘-tō-su. Sian-siⁿ tī Tâi-oân thang kóng sī thâu chi̍t-ê thoân-tō sian-siⁿ . Tuì hit-tia̍p khí ū 30 goā nî chhut-la̍t chò kang tī kàu-hoē; sui-sī sè-hàn bô ki-hoē thang tit-tio̍h chhim ha̍k-bun, iáu-kú sian-siⁿ uī-tio̍h Chú ū chhut-la̍t lī-ek chē-chē lâng. I chiūⁿ tâi teh ián-soat, á-sī tī ke-lō͘ teh pò͘-tō, kóng liáu chin hun-bêng; goá hó-táⁿ kóng bô khah-su hiān-sî thàu-kha chheⁿ ê thoân-tō. Sian-siⁿ pún-sin bat uī-tio̍h Chú ê miâ tī Hōng-soaⁿ koān hō͘ lâng phah koh koaiⁿ kaⁿ 40 ji̍t; i bô loé-chì iû-goân jia̍t-sim uī-tio̍h Chú chò kan-chèng, ū toà chē-chē uī ê kàu-hoē. I só͘ toà ê só͘-chāi goá bô lóng-chóng chai, put-kò kú-khí kuí-uī lâi kóng, chhin-chhiūⁿ Po͘-lí-siā, āu-soaⁿ chiah ê ke̍k-hiám ke̍k kan-khó͘ ê só͘-chāi, sian-siⁿ lóng bat khì toà. iā bat toà Hú-siâⁿ Têng-á-kha ê pài-tn̂g kuí-nā nî, tng i tī Hú-siâⁿ chò-kang put-chí chhut-la̍t; muí ē-po͘ khui pài-tn̂g pò͘-tō hō͘ sè-sio̍k lâng thiaⁿ, sui-sī hit-tia̍p bô liâm-piⁿ khoàⁿ-kìⁿ toā kong-hāu, chóng-sī chit-tia̍p chit-ê kàu-hoē toā hoat-ta̍t.
Sian-siⁿ só͘ toà ê só͘-chai lâng put-chí kèng-ho̍k--i ; i-ê péng-sèng chèng-ti̍t, lâng chò m̄-tio̍h i chiū tāng chek-pī i , sui-sī án-ni, lâng iáu-kú kèng-tiōng i-ê tiong-ti̍t ngē-khì. Sian-siⁿ iā bat kap Kam Bo̍k-su khì Phê-ô͘ siat-kàu, i-ê kong-hāu chit-tia̍p iáu tī--teh; hiān-sî lán Tâi-oân ê Soan-tō-hoē ū siat tī-hia, ū saⁿ só͘-chāi teh chū-chi̍p lé-pài. Tuì chia ū tit-tio̍h kuí-nā uī ê sian-siⁿ lâi sìn-Chú, chò lán Tâi-oân o̍h-tn̂g ê toā lō͘-ēng.
Sian-siⁿ sui-sī tiong-liân chiah chhoā sian-siⁿ-niû, chit-tia̍p kiáⁿ-sun iā sī chē, kong-chú chhian-kim 7, 8, lâng; lāi goā sun 20 goā lâng. Ū ê chò Bo̍k-su, ū ê chò thoân-tō, ū ê chò i-seng. Nā chiàu jîn-chêng lâi kóng sī hó miā, chóng-sī sian-siⁿ bô lia̍h chiah-ê lâi chò i-ê êng-kng thé-biān; i só͘ ài--ê, khoàⁿ ū sím-mi̍h thang hō͘ kàu-hoē heng-ong i khah hoaⁿ-hí.
Sian-siⁿ-niû koè-óng liáu-āu, sian-siⁿ iā sī lāu-lâng, hit-sî iáu-kú kam-goān koh toà kuí-nā uī ê kàu-hoē, chiū-sī Kong-á-nâ, Bān-tan; in-uī chit-ê lāu-lâng oh-tit thang ka-tī liāu-lí ke-lāi kap kàu-hoē, só͘-í kò-ló hioh-kang. Tng i hioh-khùn ê sî i siông-siông chhoē ki-hoē thang chò-kang, ū-sî an-hioh-ji̍t kap lâng lûn-liû khì chi-hoē chò chú-lí. Kàu chit nn̄g-nî chêng khah sit náu-la̍t, tāi-chì khoài bē kì-tit, tuì hit-sî khah hán-tit chò-kang.
Tī kīn-nî 7, 8, goe̍h kan ū tú-tio̍h lāu-lâng pēⁿ tó-chhn̂g bô koh khí--lâi; tī kin-nî 1912, 9 goe̍h 16 chá an-jiân koè-óng. 23 ji̍t chhut-soaⁿ, hoē-iú kap sè-sio̍k lâng lâi sàng-chòng ê oá 7,8 pah lâng. Sian-siⁿ kin-nî hióng-siū 75 hoè, thang kóng sī tiông-siū.
Goá siá chiah-ê hō͘ lán chai Sian-siⁿ ê lâi-le̍k, thang o̍h sian-siⁿ ê jia̍t-sim toè Chú ho̍k-sāi Chú kàu chīn chi̍t-sì-lâng; iā hō͘ lán tâng chò thoân-tō ê lâng o̍h sian-siⁿ ê hó-iūⁿ lâi lī-ek kàu-hoē.
