Ah! 23 nî ê kú!<br />1954. 04, no. 784, pp. 13-14<br />Jī-cha̍p saⁿ nî kú, kiám-chhái ū lâng khoàⁿ choè pêng-siông, bô sím-mi̍h thang kám-thàn ê só͘-chāi. M̄-kú chāi-tī sió-tī, si̍t-chāi sī chin tio̍h toā kám-thàn. In-uī tuì chhut-sì kàu Sîn-ha̍k-īⁿ pit-gia̍p, siū phài khì Tang-pō͘ chiap-siu tuì Lâm-pō͘ kàu-hoē î-kau hō͘ Pak-pō͘ ê Gio̍k-lí kàu-hoē, chho͘-hun, chiū-sī 23 nî ê sū. iū-koh tuì Bān-hoâ choán-jīm lâi Thô-hn̂g kàu-taⁿ, iā-sī 23 nî ê kú. Pí-phēng tho̍k-chiá chu-uī thiaⁿ-tio̍h chi̍t ê thoân-kàu ê toà chi̍t uī 23 nî, ún-tàng iā oē kám-kak chin kú, 23 nî kú, tī Thô-hn̂g choē-choē lâng toā sêng-kong, khiok iā ū chi̍t-poàⁿ lâng sit-pāi. 23 nî kú, tī Thô-hn̂g kàu-hoē choē-choē lâng sêng-kong, chóng-sī bô poàⁿ lâng sit-pāi.<br />Chêng-jīm thoân-kàu-su toà chia 11 nî poàⁿ, sió-tī hi-bāng toà 12 nî, bô phah-sǹg ke toà hiah kú. Taⁿ ài ióng-thè, niū-hiân, koat-tēng kap Sin-chng Lâu Bo̍k-su tuì-oāⁿ. M̄-sī m̄-ài cháu, sī hāu bô bo̍k-su thang lâi, taⁿ beh ta̍h-ji̍p sin sù-bēng. Kî-thāi pún kàu-hoē toā io̍k-chìn.<br />Hoê-kò͘ 23 nî chêng lâi chiap-jīm ê sî, chiàⁿ-sī jī-pat siàu-liân-sî, hiān-chāi í-keng sī lióng-pin suî. Chit tiong-kan lī-pia̍t a-má, lī-pia̍t lāu-pē, lāu-bú, liân chho͘-hun ê loē-chō͘ iā lī-pia̍t--khì. Hiaⁿ-tī 3 ê lóng choè thoân-kàu--ê, toā--ê sí, soè--ê thè-chit. Ti-kí ê tông-liâu iā ū sí--ê, iā ū sî--ê. Chit tiong-kan tāi-chiàn 8 nî, kong-ho̍k liáu 10 nî; siā-hoē toā piàn-kek, hiān-chāi koh ji̍p tī hui-siông-sî lah. Tuì ji̍p-o̍h chiū o̍h Ji̍t-gú, kong-ho̍k āu o̍h Kok-gú, it-seng 3 pái o̍h kóng oē, hiān-chāi iáu teh o̍h kóng oē.<br />Thô-hn̂g kàu-sè, tò-jīm ê sî, hoē-oân 97 miâ, chóng-sī 20 goā miâ hêng-hong put-bêng, só͘-í suî-sî chhut tī Pún-pò, phah-lô chhē lâng, kiat-kó choē-choē chhē bô, chiū chhat-miâ. Hiān-chāi chāi-che̍k 150 miâ, ke-thiⁿ chin chió, chin kiàn-siàu, put-kò 23 nî tiong lâi niá soé-lé--ê 138 miâ, sió-tī soé-lé--ê 73 miâ, pêng-kun muí-nî tú-tú ke-thiⁿ 6 ê niá soé-lé.<br /> Lūn keng-chè hong-bīn, tò-jīm ê sî, in-uī keng-chè tó-hoāi, só͘-í m̄-nā muí-ge̍h bô thang hū-tam sok-kim, hoán-tńg khiàm chêng-jīm--ê 109 kho͘, tio̍h koh toê hêng--i. Kai-chài chiām-chiām khí-sek, tē 9 nî khí-thâu oē thang to̍k-li̍p chū-tī, kè-sio̍k kàu taⁿ 14 nî.<br /> Gō͘, la̍k nî lâi, pa̍t kàu-hoē chhin-chhiūⁿ lo̍h-hō͘ liáu ê sún-á hoat--khí-lâi; ū Sèng-kàu-hoē, Ki-tok-tô͘ chū-hoē-chhù, chìm-lé Sèng-keng-hoē (hiān-sî hoè-chí), iā ū Thian-chú-kàu. Chóng-sī lán chia lóng bô cháu kah chi̍t-ê.<br /> To̍k-to̍k ū chi̍t hāng choè thòng-sim--ê, chiū-sī lé-pài-tn̂g ê goā-koan tè sî-sè boē tio̍h. Thô-hn̂g sī Koān-chèng-hú só͘-chāi toē, kiàn-tio̍k-bu̍t siong-tong suí, sin-khí 3 chàn iā chin choē. Sèng-kàu-hoē iáu-bē sin-khí í-goā, lóng sin-khí lah. Chí-ū lán ê pài-tn̂g sī 50 goā nî chêng khai 1,000 goā kho͘ khí ê thô͘-kat chhù. Tī 15 nî chêng bat chi̍t pái tiû-pī beh kái-tiok, uī-tio̍h chhiok-chìn to̍k-li̍p, só͘ siu ê chîⁿ chí-ū boé-siu pài-tn̂g keh-piah chi̍t keng sió-chhù nā-tiāⁿ.<br /> Kin-nî sī Thô-hn̂g siat-kàu 70 chiu-nî, 2, 3 nî lâi sió-tī chiū teh hoah-hiàm "Tio̍h kái-tiok," khó-sioh sió-tī put-châi put-tek, hoah boē kiâⁿ, put-kò chit ê bāng, bô kú tek-khak oē si̍t-hiān. Sió-tī iā ǹg-bāng it-seng tiong ài kiàn-tiok chi̍t pái Sèng-tiān, bô lūn tī toh-lo̍h lóng hó. Bô lūn siáⁿ-lâng, iā tio̍h khǹg chit hō sim chiah hó. Jîn-seng 50 nî, Tâi-oân ê lé-pài-tn̂g, phó͘-thong 50 nî tio̍h ài kái-tiok. Nā m̄-sī te̍k-sû ê goân-in (Siang-liân pài-tn̂g oá 50 nî, khí 3 pái), chi̍t lâng boē-tàng khí nn̄g pái. Siōng-tè chún i khí Sèng-tiān, hit lâng ū hok-khì. Chhin-chhiūⁿ Tāi-pi̍t hiah khó-chhú, Siōng-tè to m̄-chún i khí. Chí-ū chún Só͘-lô-bûn khí tiān, lâi siúⁿ-sù i tì-huī, hó-gia̍h, êng-kng. Toā ǹg-bāng hiaⁿ-tī chí-bē oē bêng-pe̍k chhim-sìn chit ê tō-lí, ta̍k lâng hoaⁿ-hí chham-ka tī khí pài-tn̂g.<br /> Sūn-soà pò chu-uī bat sió-tī ê chū-chí chai-iáⁿ, Sin-chng pài-tn̂g sī tī (新莊鎭榮和里四七七號). Tuì Tâi-pak chē bah-suh bián 20 hun; soà chhiáⁿ chu-uī kong-lîm chí-kàu. Chhiáⁿ thoè kám-siā, 23 nî kú bô toā-kò. Chhiáⁿ thoè Thô-hn̂g, Sin-chng chit nn̄g keng thoân-kàu-su īⁿ-tōng ê kàu-hoē kî-tó, toā-toā pài-thok.<br />(Chhoà Tiông-gī pò).<br />
