SÈ-KÀI SIAU-SIT
(Bo̍k-su: Bêng Iú-tek).
1954. 04, no. 784, pp. 7-9
Ji̍t-pún.
Chiàu Ji̍t-pún 1953 nî ê pò-kò, Ki-tok-kàu tī siā-hoē ê le̍k-liōng ū pí chiàn-cheng chêng khah ū, chóng-sī kàu-hoē ê hoē-iú bô ke-thiⁿ joā-choē lâng. Chiàn-cheng āu ū ke-thiⁿ chin choē khoán Sin-kàu kàu-pài(sic.) ê soan-kàu-su, chóng-sī í-chêng toā kàu-phài só͘ phài lâi Ji̍t-pún choè soan-kàu-su ê ū khah chió.Chiàu pò-kò, tī Ji̍t-pún ū 17 bān goā ê Thian-chú-kàu ê hoē-iú; Sin-kàu ū khah-choē, ū 23 bān goā. Thian-chú-kàu ê soan-kàu-su ū 1695 ê; Sin-kàu ê soan-kàu-su ū khah chió, ū 984 ê.
Eng-kok.
Tī Lûn-tun ê kàu-hoē choē-choē toā ê kàu-phài, kūn-lâi ū kám-kak sù-bēng tio̍h te̍k-pia̍t koan-sim tī phoà-pīⁿ lâng ê tiong-kan. in ū siông-siông khui kî-tó-hoē, uī-tio̍h phoà-pīⁿ ê lâng kî-tó, iā siông-siông khì thàm in.
Kū-nî chhiu-thiⁿ ê sî, Eng-kok Sèng-kong-hoē ū pī-pān chi̍t pún soè-pún chheh, lâi ìn-tap Lô-má Thian-chú-kàu phoe-phêng Sin-kàu ê sū. Hit pún chheh chi̍t-pō͘-hūn ê lāi-iông sī koan-hē Thian-chú-kàu kin-nî "Má-lī-a nî," in án-ni pài Má-lī-a si̍t-chāi sī īⁿ-kàu.Tī 12 ge̍h, Bí-kok chi̍t ê cha̍p-chì iā ū kóng-khí chit ê īⁿ-kàu ê sū, kóng, Siat-sú Ki-tok-tô͘ nā koan-sim tī chit khoán ê hong-chiam ê sî, in ê sìn-gióng oē pìⁿ-choè kám-chêng-tek, lóng boē chiàu Sèng-keng ê kà-sī kap Chú Iâ-so͘ ê khoán-sit lâi kiâⁿ.
Ka-ná-tāi.
Tī Montreal toā to͘-chhī, chi̍t ge̍h ji̍t chêng Van Dusen Phok-sū (New-york Union Sîn-ha̍k-īⁿ ê īⁿ-tiúⁿ kū-nî lâi thàm Tâi-oân kàu-hoē ê lâng) ū ēng Phó͘-sè Kàu-liân choè toê káng-ián. Tiong-kan i ū kóng, tī sè-kài chha-put-to ū 7 ek ê Ki-tok-tô͘; tiong-kan chiām-chiām teh ha̍p-chok tī kàu-liân ūn-tōng ê, iok ū chi̍t poàⁿ. I kóng, sui-jiân sī chhin-chhiūⁿ ū khuì-la̍t ê khó-lêng-sèng, sū-si̍t tio̍h khàim-ēng Chú Iâ-so͘ ha̍p-it ê cheng-sîn chiah oē tam-tng kàu-hoē ê sù-bēng tī chit khoán chōng-hóng ê sè-kài.
Tang Tek-kok.
Tek-kok Pek-lîm chhī chin chhut-miâ ê Bo̍k-su Niemoller Phok-sū ū khì Tang Tek thàm kàu-hoē, ū siū chin-choē uī ê kàu-hoē ê toā hoan-gêng. Sui-jiân Tang Tek ê chèng-hú ài beh chó͘-tòng i, chóng-sī kàu-hoē ê hiaⁿ-ché chin ióng-kám jia̍t-chhiat chhut-khì thiaⁿ i ê káng-ián kap soat-kàu. I tńg-lâi pò-kò kóng, Tuì kū-nî 6 goe̍h ê sū-kiāⁿ liáu-āu, chèng-hú khah m̄-káⁿ tuì kàu-hoē ap-pek.
Chiat-khek-su-la̍h-hu.
Chit ê kok sī Ngô͘-lô kiōng-sán teh koán ê,só͘-í kàu-hoē bô chhin-chhiūⁿ í-chêng oē thang chū-iû. Chóng-sī chiàu kū-nî nî-bé ê pò-kò, ū chìn-pō͘ ê só͘-chāi. Kū-nî tiong ū 770 lâng lī-khui kàu-hoē, chóng-sī iā ū 1169 ê chin ióng-kám, siū soé-lé ji̍p kàu-hoē.
ìn-tō͘.
ìn-tō͘ lâm-pêng kap pak-pêng sin-kàu ê toā kàu-phài ū liân-ha̍p. Hiān-sî choē-choē khoán í-goā ê kàu-phài teh phài soan-kàu-su khì hia choè kang, chóng-sī liân-ha̍p kàu-hoē khoàⁿ in tiong-kan só͘ choè ê kang-chok khah bô ha̍p-sek. Hiān-sî in khah bô hoan-gêng in só͘ chó͘-chit ê kàu-su-hoē, in khah koan-sim tī ìn-tō͘ lâng só͘-ū ê liân-ha̍p kàu-hoē.
Kū-nî nî-boé Kok-chè Ki-tok-kàu Nāi-pīⁿ tiû-pī-hoē ū chū-chi̍p tī Lucknow.Chha-put-to ū 80 ê lâng lâi chhut-se̍k; in lóng sī choan-ka ê i-seng tuì ta̍k kok lâi--ê, Chit ê kang-chok sī tuì Lûn-tun í-ki̍p Niú-iok teh koán-lí. Keng-chè ê pó͘-chō͘ sī tuì Eng Bí ta̍k kàu-hoē pêng sìn-tô͘ ê hōng-hiàn lâi teh î-chhî. Chiaⁿ-ge̍h tiong Miller Bo̍k-su kap Bo̍k-su-niû, í-ki̍p Fraser Phok-sū(Eng-kok Tiúⁿ-ló-hoē ê soan-kàu-su)tuì Hiong-káng ê Nāi-pīⁿ-īⁿ ū lâi Tâi-oân thàm Ngāu-san-oân kap Sin-chng ê Lo̍k-seng-īⁿ.
Sè-kài hū-lú kong-tó-hoē.
Kin-nî 3 goe̍h chhoe 5, sī tē 67 hoê ê sè-kài hū-lú kong-tó-ji̍t,ta̍k nî ū ke-thiⁿ choē-choē sin ê só͘-chāi, 5 nî chêng ū khui kî-tó-hoē tī 90 ê kok-ka, kin-nî ū ke-thiⁿ kàu 113 ê kok-ka. Tī lán Tâi-oân ia̍h ū choē-choē kàu-hoē khui kî-tó-hoē.Kin-nî chún-pī só͘ ēng ê プロケラム(programme)kap kî-tó-bûn téng-téng ê lâng, chiū-sī ìn-tō͘ ê jia̍t-sim Ki-tok-tô͘ Chakko Ko͘-niû.I sī phó͘-sè kàu-liân ê 5 ê chú-se̍k ê tiong-kan ê chi̍t-ê. Chkko Ko͘-niû choè chit ê kî-tó-hoē ê kang-chok í-āu,bô kuí-ji̍t tú-tio̍h tāng-pīⁿ,ū kè-sin. Goān i ê lêng-hûn kàu tī Chú bīn-chêng.
