Cha̍p-lio̍k
I. Kò͘ Ko Chài-chiok Tiúⁿ-ló ê Sió-toān
1937.01 tē 622 hō p.20-21
(Kong-san Kàu-hoē)
Tiúⁿ-ló Ko Chài-chiok, Bêng-tī 20 nî 11 goe̍h 15 ji̍t chhut-sì tī Tâi-lâm chhī. Lāu-pē Ko Tióng, sī Tâi-oân Tiúⁿ-ló Kàu-hoē chho͘-tāi ê thoân-tō-su, lāu-bó Chu--sī Eng, ū 5 ê hāu-seⁿ 3 ê cha-bó͘-kiáⁿ. Chiū-sī Ko Kim-seng Bo̍k-su, Ko Tok-hêng Bo̍k-su, Ko Chài-tek Tiúⁿ-ló, kò͘ Ko Chài-chiok Tiúⁿ-ló, Ko Chài-hok Tiúⁿ-ló, kò͘ N̂g Siù-hui Kàu-su-niû Ko--sī A-kim, Gô͘ Chhiu-bî Sian-seⁿ-niû Ko--sī Siù-îⁿ, Lí Péng-bûn Sian-seⁿ-niû kò͘ Ko--sī Siù-lí.
Ko Chài-chiok Tiúⁿ-ló chū sè thian-chu chhang-miâ, sin-thé ióng-kiāⁿ, sèng-chêng oa̍t-phoat, gâu ūn-tōng chò soán-chhiú, chiū-tiong cháu sok-le̍k kap Tek-ko-thiàu ū te̍k-tiám. Bêng-tī 37 nî 3 goe̍h, tit-tio̍h iu-siù ê sêng-chek chut-gia̍p Tiúⁿ-ló-kàu Tiong-ha̍k. Hit-sî lāu-pē khó͘-khǹg I ji̍p Sîn-ha̍k, uī-tio̍h lāu-pē chò thoân-tō ka-kè khùn-lân, chiū chì-goān chò i-seng lâi chū-kip thoân-tō. Bêng-tī 42 nî 3 goe̍h chut-gia̍p Tâi-oân Chóng-tok-hú I-hak2-hāu, soà lâi Tâi-lâm Pēⁿ-īⁿ hōng-chit chi̍t nî. Keh nî 4 goe̍h chiū lâi Kong-san khai-gia̍p, khui Kiàn-an I-īⁿ. Ko Tiúⁿ-ló tuì hoān-chiá chhin-chhiat, hō͘ lâng hó chhin-kīn, i-su̍t koân, tì-káu miâ-siaⁿ thoân kàu sì-hng. Hoān-chiá hong-phêng kóng,”Nā thiaⁿ-tio̍h Sian-seⁿ ê siaⁿ, pēⁿ chiū hó saⁿ-hun,” tuì án-ni hoān-chiá ta̍k ji̍t káng pah miâ.
Ko Tiúⁿ-ló kàu Kong-san khai-gia̍p ê sî, Kong-san boē ū kàu-hoē. Tuì Tiúⁿ-ló ê jia̍t-sim thiàⁿ Chú, ū chio Lâm-chú kàu-hoē lâi oān-chō͘. Chiū tī Bêng-tī 43 nî 12 goe̍h, siat-chiâⁿ Kong-san Ki-tok Kàu-hoē. Tāi-chèng 2 nî 6 goe̍h siū kéng chò Tiúⁿ-ló, lâi kè-sio̍k chīn-la̍t tī kàu-hoē. Ū kin-á-ji̍t ê Kong-san kàu-hoē, che sī Chú ê in-tián lâi chiâⁿ, iā thang kóng sī tuì i ê thiàⁿ Chú ti̍t-chiap kàn-chiap ê oān-chō͘, thâu-boé 20 goā nî.
Ko Tiúⁿ-ló m̄-nā chīn-la̍t tī Kong-san kàu-hoē, tuì goā kàu-hoē iā chin chīn-la̍t. Tuì kok kàu-phài i bô hun-piat, chin ū tō͘-liōng, put-lūn sím-mi̍h kàu-phài ê sian-seⁿ kàu i ê ke, i bô sioh kim-chîⁿ, hoân-gêng hō͘-thāi, iā chīn-la̍t kap i ha̍p-tông chò kang. Tuì kok-ka, siā-hoē i sī chi̍t ê kong-lô-chiá. Kán-tan kí kuí hang: tuì Tiúⁿ-ló-kàu Tiong-ha̍k, Lú-ha̍k, Sin-lâu Pēⁿ-īⁿ, Sèng-kiat kàu-hoē, Ji̍t-pún Chhiah-si̍p-jī-siā, Chāi-hiong Kun-jîn-hoē, kî-thaⁿ ê kong-kiōng thoân-thé kià-hù kim-hāng bē chió. Chiau-hô 3 nî 2 goe̍h 21 ji̍t, ū tit-tio̍h Tâi-oân Chóng-tok-hú Siā-hoē sū-gia̍p kong-lô-chiá ê piáu-chiong.
Bêng-tī 44 nî 4 goe̍h 21 ji̍t, kap Khó͘ Hān ê tióng-lú Khó͘--sī Bí kiat-hun, chiâⁿ-chò hēng-hok ê ka-têng, thâu-boé 25 nî kú. Ū 7 ê hāu-seⁿ, 4 ê cha-bó͘-kiáⁿ. iāu-tong tī 日本齒科醫學專門. iāu-se tī 東京高等工學校. iāu-chhong tī 京都同志社中學部. iāu-seng tī 長老教中學. iāu-bêng tī Kong-san Sió-ha̍k-hāu. iāu-jiân, iāu-bîn iáu sè-hàn. Tì-bí Chiau-hô 10 nî 8 goe̍h 16 ji̍t, kap I-ha̍k-sū Âng Ngá-lia̍t kiat-hun. Chû-bí sī 東京帝國音樂學校 chut-gia̍p, í-keng phèng-tiāⁿ Tâi-pak Lí Chhiau-jiân. Ngá-bí tī 下關梅光女學院. Sèng-bí tī Kong-san Sió-ha̍k-hāu.
Ko Tiúⁿ-ló pêng-sî sī ióng-kiāⁿ, i-gia̍p í-goā ū chhù-bī chē-chē hāng, kî-tiong choè chhù-bī sī tha̍k-chheh kap pò͘-tō. Chiau-hô 8 nî 2 goe̍h 11 ji̍t àm, hut-jiân khí bông-tn̂g-iām, ū keng-koè Tâi-lâm Pēⁿ-īⁿ, Tâi-pak Pēⁿ-īⁿ, Tang-kiaⁿ Sèng Lō͘-ka Pēⁿ-īⁿ, chiân-hō͘ toā chhiú-su̍t 6 hoê, kuí-nā pái siū i-seng soan-giân bô bāng lah, chóng-sī tit-tio̍h Chú te̍k-pia̍t ê in-tián, kiâⁿ koân-lêng hō͘ i pêng-an koh tò-lâi Kong-san chiàu-kū hêng-i. Lō͘-ka 9:23, Chú kóng, “Ū sìn ê lâng ta̍k hāng lóng ē.”
Pún-nî 5 goe̍h 10-17 ji̍t, Kong-san pài-tn̂g ū khui liân-iā pò͘-tō-hoē. Tiúⁿ-ló sui-jiân sin-thé iáu-boē cha̍p-hun ióng, iáu-kú chin chhut-la̍t tàu káng-ián. Koh 6 goe̍h 2-4 ji̍t tāi-kí pò͘-tō, Ko Tiúⁿ-ló kap Tiúⁿ-ló-niû lóng chhut-se̍k tàu chò-kang, kui êng-kng hō͘ Chú.
Ko Tiúⁿ-ló ū kám-liām Chú ê in, koat-sim ài uī Chú kan-chèng, jia̍t-sim ài koh gián-kiù Sèng-keng, chiū tī 6 goe̍h hā-sûn koè Kó͘-lōng-sū, beh hù Cha-keng-hoē, liáu-āu iā siūⁿ beh khì Lâm-kiaⁿ koh gián-kiù pò͘-tō ê kang. Khó-sioh tī chhut-goā, thiⁿ-khì joa̍h, oa̍h-tāng lô koè-thâu, sin-thé chiām jio̍k, chiū tī 8 goe̍h 18 ji̍t kui Tâi. Goán lóng teh ǹg-bāng i tò-lâi, thang koh saⁿ-kap uī Chú chò kang. Bô-phah-sǹg Chú ê chí-ì chiâⁿ, chiū tī 10 goe̍h 31 ji̍t ngó͘-chiân 11 tiám, soah i sè-kan ê tio̍h-boâ, ji̍p tī Chú éng-oán khoài- lo̍k ê an-hioh, hióng-siū 50 hoè.
Khó-siong ah! Khó-siong ah! i ê ka-têng sit-lo̍h chi̍t ê pó-poè ê thâu-lâng; kàu-hoē sit-lo̍h chi̍t ê lêng-kài ê ióng-sū; siā-hoē sit-lo̍h chi̍t ê bêng-i. Ah! Ko Tiúⁿ-ló ah!! Tī chit ê hui-siông-sî, Kong-san Kàu-hoē lâi sit-lo̍h lí, koh ná béng-lâng phah-chi̍h i ê keng, ióng-sū sit-lo̍h i ê chìⁿ. Thiaⁿ-tio̍h ê lâng, ta̍k ê to m̄-kam, ū thang an-uì i ê uî-cho̍k kap goán--ê, sī lán ê Chú. Tng i beh lîm-chiong ê sî, ū kóng, “Tio̍h khoàⁿ, goá ê sim-koaⁿ chin pêng-an, chin hoaⁿ-hí, goá beh tò-lâi chhoē Thiⁿ-pē, gîm Sèng-si tē 8 siú hō͘ goá thiaⁿ.” Kóng-soah, chiū an-jiân kap Chú saⁿ-kap khì.
Keh ji̍t sī 11 goe̍h 1 ji̍t, ngó͘-chêng 9 tiám, tī Ko chài-tek Tiúⁿ-ló ê ke chò kò-pia̍t-sek (hoé-chòng). Tâng 11 ji̍t ngó͘-āu 2 tiám, tī Thài-pêng-kéng lé-pài-tn̂g chò chòng-sek. Hoē-chòng-chiá 1000 goā lâng, tiàu-sû tiàu-tiān 300 goā thong, hoe-khoân liân-te̍k chin-chē. Sek-āu, tāi-ke sàng i ê uî-kut kàu Tâi-lâm ia̍h, 5 tiám goā kàu Kong-san, 6 tiám tī ka-tī ê ke khui Tui-tō-hoē, Loē Tâi-jîn 200 goā miâ chhut-se̍k. Pè-hoē kán kì tām-po̍h tī pò-choá-chiūⁿ lâi siàu-liām kò͘ Ko Chài-chiok Tiúⁿ-ló, kiû Chú an-uì i ê uî-cho̍k, chhoa7 in toè i ê kha-pō͘. A-bēng.
