Ko Tiong Thong-sìn
VIII. Kò͘ Ông Kang Tiúⁿ-ló Sió-toān
1937.02 tē 623 hō p.14
(Gô͘ Bān-seng)
Tī Chú-āu 1904 nî tit-tit tō-lí, sī tuì Hoe-the̍h kàu-hoē Ko-chhiàng hiaⁿ e5 ín-chhoā lâi sìn Chú. Tuì sìn Chú liáu, só͘ keng-koè ê lō͘-tô͘ chin khi-khu, bô-lūn hó pháiⁿ kéng-gū, bô khoàⁿ lâng, bô khoàⁿ khoân-kéng. Tng Hoe-the̍h chho͘ siat kàu-hoē ê sî, i sī thâu-chuí ê koé-chí, chho͘-tāi ê sìn-tô͘, ū sûn-chuī ê sìn-gióng, láu-si̍t ê I-sek-lia̍t lâng,sim bô khuí-khiat--ê!
Lūn i ê seng-oa̍h chit-gia̍p, sī khiā-khí tī hái-piⁿ, hái-lio̍k khang-khè cha̍p-chhap, hái-siōng ê kan-kí, sī chō chûn, kò chûn, lia̍h hî; lio̍k-siōng sī ba̍k-kang kap thô͘-chuí; thang kóng hái-lio̍k cheng-thong ū keng-giām. Pó-lô kóng, hoān-sū lāu-liān. Ah! Bô phah-sǹg, tī sin-le̍k 10 goe̍h 29 hō ē-po͘ 6 tiám 10 hun, hō͘ Siōng-tè kéng-tiàu chiùⁿ thiⁿ, giám-jiân ná Í-lī-a kap Í-lī-sa saⁿ lī-pia̍t chi̍t-iūⁿ! I hióng-siū 65 hoè.
Lūn hō͘-è, sī ngó͘ lâm sam lú, sun-jî kiōng 21 miâ. Chhù-lâm Ông Heng-bú Sian-siⁿ, hiān-jīm Oân-lí kàu-hoē khîn-bū. Sui-jiân bu̍t-chit sàn-hiong, nā-sī cheng-sîn hong-hù, jia̍t-sim hōng-sū kàu-hoē. Sèng-keng kóng, “Sèng-tô͘ ê ke-gia̍p kap hó-gia̍h.” Ông Tiúⁿ-ló si̍t-chāi ū tit-tio̍h lah! Nā tuì kàu-hoē hong-bīn lâi khoàⁿ, sī sit-lo̍h chi̍t ê tòng-liông. Chóng-sī tuì sîn-kok hong-bīn lâi khoàⁿ, sī ke chi̍t ê pè kàu-hoē ê tāi-piáu ji̍p tī-hia, thang an-sim lah.
Lūn i chò lâng sim phāu tiong-sêng, jia̍t-sim chun-siú é-pài-ji̍t, ū pī soán chò Kî-āu kàu-hoē ê chip-sū. āu-lâi seng chò tiúⁿ-ló, keng-koè kuí-nā jīm, chū-sè bô tha̍k-chheh, chóng-sī gâu chò si-koa, bat chiūⁿ Kàu-hoē-pò, iā sī i it-seng ê toā chhù-bī. o̍h pe̍h-oē-jī chi̍t ji̍t chiū sêng-kong, thang kóng sī chhian-lí-má. Lūn kan-khó͘, gâu thun-lún; lūn khîn-khiām, gâu khek-kí; lūn sûn kàu-hoē, bē-su chiú-keⁿ-peng; lūn chû-siān, m̄-ài hián-jiân hō͘ lâng chai. Í-siōng hiah-ê si̍t-chāi hō͘ lán thang o̍h, goān Chú pó-siú i ê uî-cho̍k. A-bēng.
