數念故林Lîn長老
1935.07 第604卷 p.30
芥菜子第114號
(鄭鐵)
林Lîn長老是里lāng教會員林書襄兄的老父。看囝兒的熱心佮信德，就知老父的信德佮熱心，通數念來歸榮光主上帝。
佇3月7日，伊的第3囝林書啟君佮潘--氏月金女士欲舉行結婚式。今年拄是伊61歲，順這个機會伊的囝欲共伊祝壽。不幸佇未享受雙喜的前初4，暗車去玉里買辦，彼暗佇旅館起病 (腦溢血)。到天光初5早起 8點，看著長老娘佮伊的囝的時，安心永眠好睏，享壽61歲。3月初6 e晡2點，佇伊的厝舉行告別式；赴式的人有200左右。
若是講起林Lîn長老，就南部較老的先生抑是牧師攏捌--伊。因為伊18 歲的時離開本鄉去斗六，彼時佮劉Bān-kiàm長老，吳Lo̍k長老做朋友；對按呢熱心服事上帝。佇22歲的時，受舉薦讀神學。佇26歲出來傳主的福音。佇32歲的時，拄著先生娘過往；閣有3个囝、查某囝，不得已著辭傳道的工，來東部蹛佇萬人埔；佇遐閣得著現時的長老娘。伊有7个囝、4个查某囝；論伊的囝兒佇萬人埔是通呵咾的模範青年，第一大家族閣熱心。主講：「歹樹袂會結好果囝。」實在看伊的囝兒就通數念林長老的信德佮熱心。 |
