首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 數念故吳添友長老
數念故吳添友長老
卷期：第607卷 本次： 日期：1935/10 刊名：台灣教會公報/芥菜子 頁數：40
篇名：數念故吳添友長老 [ Siàu-liām kò͘ Gô͘ Thiam-iú Tiúⁿ-ló ]
作者：潘毛里 Phoaⁿ Mô͘-lí
  顯示 : 漢羅 全羅 並列  

數念故吳添友長老
1935.10 第607卷 p.40-42
芥菜子第117號
(潘毛里)
南崁教會的吳添友長老，佇8 月25日有受主揀召離開世間倒去天堂，享壽81歲。吳長老的做人是樸實忠厚，對教會、對國家真出力奉事，有頭、有尾，真誠實清廉、清氣，熱誠信主；予人人所數念，一下聽見伊離開世間，真毋甘。1 3歲的時就無老爸，得著賢母的牽成，到9 歲的時，有入書房讀冊。到14 歲的時就出佇社會來擔當1家的生計，踮佇南崁店仔做淡薄的生理。到26歲的時，有轉業來佇現時的所在經營農業，直直到佇伊過身的日，做1个篤農家佇南崁。
論吳長老對國家、對教會、對家庭的貢獻，我愛排列淡薄，通予咱相佮榮光上帝的名。
A.對國家的職務。佇帝國領台當時，明治29年，有擔當分結守，佇32年有當選做總結守。33年受命做臨時土地調查委員。34年受選做保正，（保甲制度對這年創起），直直繼紲到佇現今，攏毋捌踉站。38年受命做南崁公學校學務委員。39年受命做土地整理委員。大正9年，有擔當區總代。佇大正4年，有出力鬥招呼勸勉人來加入南崁信用組合，紲受揀做評訂委員。其他受10外團体的囑託，講袂盡。對佇伊有忠實，伊的工有貢獻佇社會，致到有總督的表彰5擺。閣再總務長官、州知事、廳長、郡守、庄長、其他各團体的表彰數10擺。遮的通證明吳長老的盡忠報國。
B.對教會的職務。吳長老原來是熱心信偶像宗教的人，不止有宗教心。佇明治23年，南崁初設基督教會的時，對佇伊的宗教心的表現，有勇敢來研究道理。到知這个宗教是真的時，就放棄伊前所服事的，來領受主的福音。雖然予人恥笑，攏無搖泏，益發熱心；佇明治35年受揀做執事，盡力佇執事的工，出力佇拜堂的改築。明治38年受揀做長老，直直到佇臨終的日，攏無斷站。常常去赴中會，也捌去赴大會，捌--伊的人攏呵咾伊的信德。伊近年較濟歲，耳空重，所以無去赴中會；總--是伊路尾擺的赴中會是7年前，拄拄是伊的後生吳天命受設立做教師的時，上帝的攝理真奇妙。
C.對家庭的職務。通講吳長老有大興起的家族。伊佇3歲的時老爸過身，伊的老爸兩兄弟，只有見伊1人通傳嗣。佇這款的時，得著賢母的牽成佮上主的致蔭，伊有長成，建置家庭。伊佮長老娘結婚已經60年久，人teh講毋捌看見in相加話。通講真和睦，相佮奉養老母，養飼牽成序細。相佮信主領受主的恩典。對in這款完滿的家庭，上帝有賜in 50外个序細佇in的身邊，60年久對in兩人有傳，若含外孫紲算，有倚80外人。對遮的序細，伊真gâu牽成教育，雖然伊的家計毋是富裕，猶過gâu成持序細。大囝細囝有設法紲接伊耕農。第2囝做醫生，第3囝做藥局生幫贊二兄。第4囝獻予主，現時擔任台北神學校教師。查某囝的中間也1个獻予主，現時佇淡水女學院做舍監，栽培女子。其他的孫也是攏棟樑--的。大孫有擔任南崁教會的執事。大囝這擺有受揀來接伊做保正。閣再伊真致意引chhoā遮的序細來拜上帝，不時掛慮序細的信德。實在通講對家庭的職務有盡。
有幾若項通予 咱數念伊：--
1.熱心信主。吳長老毋捌歇睏禮拜日頂e晡的聚會，若有歇睏，是出外抑是身軀無爽快。常常佮傳教者去佈道，伊較常是用聖詩來傳道理。真gâu体貼傳教者，若捌去南崁擔任的傳道者，就攏知伊的疼心。
2.清氣心肝。熱心信主的結果，有予伊的心肝清氣，伊攏是講出好話，我來南崁頭尾5年久，毋捌聽見伊講粗魯的話，無對講話來跋倒。吳長老實在有純潔佮美麗佇社會人群中，無毋超過眾人。逐人欣羨伊的清氣相。
3.上帝盡忠的奴僕。吳長老真gâu鬥幫贊教會的工。做長老也歡喜鬥幫贊執事的工。真克己，甘願降低來服事人，所做有利益--人。看世人teh枵，teh喙礁，常常將主的道理予人啉，予人食。通講伊是主所疼的新娘。
4.Gâu行孝伊的老母。我有聽人講，南崁有出2个孝子，1个是吳長老，閣1个是張執事。伊常常佇子孫的面前，來講明伊的老母的事，勸勉in來數念--伊。吳長老這款的信徒，有得著主大祝福--伊，予伊長歲壽，得著紀念鑽石婚的日子。閣伊的序細攏有綴伊的跤步服事上帝。通講伊是主的新娘，內外攏媠，佇早早就予耶穌過訂，到佇8月25日就予耶穌娶去。伊欲過世的時攏無掛慮，因為世間的事伊攏創明白，喙攏是講頂面的事，跤phoat來phoat去，人問伊kán欲按呢，伊講耶穌佮我佇--leh，聖神佮我佇--leh，我teh行路欲來去天堂，全然無chi̍t屑仔的憂愁。實在真感謝上帝的所在。
人一下聽見伊死，真毋甘，眾議一決，就扑四塊石碑來chhāi佇伊的墓--裡，做久長的紀念。庄長1塊寫講「奉公至誠」。保甲聯合會1塊寫講「克職廉正」。信用組合1塊寫講「始終一貫」。南崁教會1塊寫講「為主忠僕」。伊實在會堪得受這4款的稱呼。
佇9月3日有告別式，有官廳、民間、以及教會幾若百人來會葬，有濟濟人讀弔詞，也有弔電幾若十張。對台北方面有幾若个牧師來會葬。韋彼得牧師、神學校學生攏有備辦弔詞來哀弔。咱有這款先輩來造就這站的好歷史佇教會，真正是榮光的所在。今伊猶有長老娘佮遺族，向望上主安慰--in，頭到尾，gâu綴in的序大的跤步來行天路。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461