青盲學
1897.08 149卷 p.59
Tī 這近日有接著日本 ê每日新聞雜報；其中有講起音樂會 ê 事情，今 ài將較要緊ê 大意摘起來報hō͘ 逐家知。咱台南府幾年前甘牧師設一間訓瞽堂 beh 教青盲人學讀冊，亦有叫幾若個青盲囡仔來讀。照甘牧師 ê意思ài差幾個去日本 ê 青盲學thang讀較深，向望後來較大路用；m̄-kú 無夠額所費。有寫批問台北teh 管學 ê 官看怎樣。這個管學ê 官無偌久倒去日本有講起這層事；有一個青盲 ê 樂師聽見大大體貼這個事誌，就舉議著召音樂會聚集來作樂hō͘人聽，所趁 ê 錢攏幫贊台南青瞑囡仔。所以台灣管學ê 官佮幾若位 ê 先生，也有西國ê 先生一位，in 攏大出力設法 hō͘ 這個音樂會聚集。這個音樂會，就是日本有人刁持去學習音樂到真精光來設成這個會；凡若有甚物好事ài 贊成，in 就聚集作樂 hō͘ 人聽，所趁 ê 錢就thang做成好事。人若 beh 去聽樂 in 著出錢買一張單才有位thang去聽。這pang聚集作樂有濟濟百姓去買單，也有皇宮內ê 王親去買上等位ê單100 張。Tuì án-ni這koè ê 音樂會所趁 ê 錢有500外箍，攏寄去東京青盲學，beh做甘牧師tuì台南差去 ê 青盲囡仔 ê 所費。Hiah-ê主事佮贊成ê人，看著皇宮內ê 王親也買hiah濟張單，in 大歡喜到極，因為皇帝常常愛開恩賜來贊成好事。
當hit日台灣管學 ê 官姓伊澤名修二也續起來講：「甘牧師是前咱日本人tuì 地理冊 bat 台灣 ê 名，伊就來tiàm chia ê 海嶼，出力慇懃教示這海嶼 ê 人；25年久tiàm chia 若親像1日久，今伊ê 年歲濟是老成 ê老大人。」Tī 6月20日甘牧師所差3個青盲囡仔已經落船去日本；就是屬府城入教 ê陳春、蔡溪、郭主恩。咱有時著數念in，求上帝hō͘ in 進步，別日做主 ê 大路用。 |
