白話字的問題
1949.10 第730卷 p.3
(南投：謝經)
青年團契的代表對台南的夏令會倒--來，有teh報告講，關係白話字的問題，有一部份的人teh主張講：「白話字是無必要。」我聽了不止艱苦。講「白話字無必要」就是講「台灣話無必要」。因為白話字佮台灣是袂通分離--得的。（請看台南冊房所發行巴博士的傳記《バアクレイ博士の面影》）。
以前我也捌聽見有台灣的青年teh講：「白話字的聖經無合用；因為讀了較袂通明白彼的意思。」我聽也不止gông-ngia̍h，因為伊毋知，袂通明白意思的原因，是因為毋捌台灣話的緣故。伊也毋知，白話字的聖經是台灣話最好的文學。
實在今仔日的台灣，普遍的現象；就是台灣人袂曉講台灣話，也袂曉聽台灣話，這一个悲慘的現象，這就是台灣50年久受日本統治的結果。日本人禁止咱講台灣話，禁咱使用台灣名姓。In也禁止咱的主日學教白話字。In的意思就是講，咱著完全改變成做日本人，才會通得著生存。In想佇日本帝國的內面，台灣人是無必要。總--是現時已經無人teh禁止咱講台灣話，也無人teh禁用白話字--lah，咱敢毋愛除去這號悲慘的現象--mah？
逐擺我掀開白話字聖經的時，就會得著一款親像佇老母的胸前，彼號溫暖的感覺。這號感覺是對別號文字的冊所袂-通得--著-的。我想台灣人應該著用台灣話祈禱，也應該著讀白話字的聖經。 |
