首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 成聖
成聖 影像(6)
卷期：第 3 號 本次： 日期：1926/1 刊名：芥菜子 頁數：7-12
篇名：成聖 [ Chiâⁿ-sèng ]
作者：陳清忠 Tân Chheng-tiong
  顯示 : 漢羅 全羅 並列  

成聖

 　　「人若毋是成聖袂會見著主」

希伯來12章14節。

　　人已經得著基督ê拯救，著koh進一步來想成聖ê恩典。

(A)   著求成聖ê理由，thang想有5項：－

1.      成聖是上帝所命令。

　　「我是聖，恁也著成聖」「恁著盡心、盡性、盡意、盡力疼主你ê上帝；也著疼別人親像家治。」上帝無濫糝命令人，伊ê命令定著有合佇人ê生活，也人穩當行會到ê；koh再是人應該著行--ê。

2.     成聖是上帝佇聖冊中所約束--ê。「主來世間是為著欲除咱ê罪過，這是恁所知。伊本身是無罪，凡若踮佇伊ê人無犯罪。」「凡佇所做ê好事，平安ê信teh欲予恁著完全。」

3.     予有罪ê人得著清氣siùⁿ（成聖）這是基督來世間ê大目的。

「基督因為為著咱來放sak身軀，對按呢來屬咱所有ê罪。」koh再「基督來世間是beh拍破魔鬼ê計策。」

4.     成聖是濟濟人ê實驗。

　　古早挪亞、亞伯拉罕、摩西á是以賽亞，in佇上帝ê面前攏有經營成聖ê生活。

5.     成聖，koh再是咱ê必要。

　　雖然講已經得著拯救，猶久心內若根若猶佇teh，驚了有時會koh莩新ê芛起來。犯罪就反悔，反悔就koh犯，心內攏袂得著平安。保羅佇羅馬第7章有寫伊心內ê艱苦講：「因為我所意愛ê好，我無去行；我所毋ài ê歹，反轉去行。獨獨我若行所毋ài ê，彼个teh行ê，taⁿ毋是我，是踮佇內面ê罪惡。按呢我得知有一個法，就是tng我ài行好ê時，歹kap我佇teh。因為我照心內ê歡喜上帝ê律法。若是我看百體中有別個法kap我心志ê法相交戰，掠我降服百體內罪惡ê法。苦ah，我ê做人！Chī-chūi欲救我脫出這个致到死ê體ah?」以上所講ê，就是人干但得著重頭生ê恩典，猶未到成聖ê人，佇逐世代所經驗--著，相同ê艱苦。若是按呢成聖ê恩典到底是啥物？

(B)   猶未想成聖是啥物ê事先，著知成聖毋是啥物，就khah袂生起誤解。

1.      成聖毋是kap上帝，kap天使siāng樣ê意思。神有神ê完全，天使有天使ê完全，人有人相應ê完全。所以人的確會得做完全ê人。佇彼款ê狀態就是叫做成聖。

2.     成聖，毋是講做無過失ê人，是干但做無koh犯罪ê人若定。人若做所毋-kai做--ê, á是看見好毋去做，這就是犯罪。成聖ê人bōe koh hōan這款濟，毋過對伊ê智慧判斷無夠額ê所-tì,常常家治拍算是好，到做了-後chiah發見tio̍h錯誤。成聖毋是講免這款ê過失續無去ê意思。

3.     成聖毋是講永袂拄著試煉ê意思。干但成做khah贏試煉ê人若定。亞當猶未陷落濟ê時有受魔鬼所試；無罪ê基督，佇曠野也拄著試。雖然人得著成聖，有時受試煉是比以前koh khah傷重。干但成聖會得著khah贏遮个試煉。

　　路德馬丁有講一句話，「鳥佇頭殼頂teh飛，這是袂免得；總是毋thang允准伊作岫佇頭殼內。」魔鬼佇頭殼頂teh飛，永有；總是成聖會得著這款ê力來毋准魔鬼佇頭殼來作岫。

4.     成聖毋是講成做身軀勇壯ê人。為著做上帝有路用ê工；上帝特別醫好伊ê病，予伊得著勇壯，這款例是有。總是若想成聖了，猶未拄著破病，身軀ê弱點攏會消滅，是錯誤。

5.     成聖毋是成做永袂陷落濟ê人。毋知濟ê亞當陷落濟，續予上帝趕出樂園。保羅講：「家己想會徛ê人，著謹慎毋thang予伊倒落去。」文約翰講：「佇天國ê門也有thàng到地獄ê路。」這款ê警戒實在真合佇咱。予咱知影佇信仰ê生活要緊著「警醒來祈禱。」

6.     成聖毋是成做免koh進步、成長ê人。病人食真補ê物反轉無啥物功效；若是勇健ê人，目睭thèng看見伊加添伊ê健康。成聖ê是khah贏過干但得著拯救--ê。伊ê靈魂上ê成長進步是非常。

C.若是按呢成聖到底是啥物？Kiám-chhái意思無完全，總是thang照下面按呢來說明，－

  「成聖就是對心內提出所有ê罪，也將愛來kā伊充滿。」

　　上帝是ài，koh再基督ê宗教是疼上帝，疼人ê宗教。所以成聖ê人逐時逐刻疼上帝，疼人。

　　對疼來想、對疼來講、對疼來做、對疼來生、來死。人若一旦入佇這个境內，無koh有僥疑，無koh有誘惑、功名心、怨妒心、好lio̍k心，予十字架見笑ê所想、假好、疼世間、倚靠家治；親像這款ê念頭攏會無去。「所以恁著純全親像恁ê天父ê純全。」「我猶久teh活，毋是猶原我，就是基督踮佇我teh活。」「完全ê拯救」「清氣心肝」「完全ê疼」「對聖神來行」「受聖神充滿」攏是指這款ê事。Taⁿ來比較拯救kap成聖ê無相同。

1.      佇重頭生無予罪過管轄。

佇成聖罪過踮袂tiâu。

2.     佇重頭生是罪過投降咱。

佇成聖罪過受拍滅。

3.     佇重頭生會壓制受氣、自高、不信，怨妒遮个歹ê念頭。

佇成聖遮个攏提出。

4.     重頭生是束縛舊ê人。

成聖是趕出舊ê人，沒收伊所有--ê

5.     重頭生起工。

　　成聖是完工ê款式，

　　耶穌ê學生佇五旬節以前是做未成聖ê人ê標本。In已經得著拯救，總是猶未得著成聖。所以佇in ê中間有怨妒、有相爭、有光明心、快受氣、有失望、有僥疑。總是佇五旬節一旦予聖神清氣in ê心了後，無驚死，替欲害死in ê人祝福。In ê心內所有ê罪攏清出來，以後干但疼上帝、疼人；疼ê神佇in ê中間自由自在teh做工。完全ê成聖，實在拄是按呢

D. Ài得著完全成聖ê條件。

若是按呢，咱著怎樣chiah會得著完全ê成聖？有3項要緊ê條件：－

1.      咱著棄sak所有ê罪kap thang僥疑ê行為。聖經有講：「有罪ê人ah恁著清氣恁ê手；兩樣心ê人ah，恁著清氣恁ê心！」「恁遮个出in ê中間，離開in；莫得墨著污穢。我欲接納恁，做恁ê父，恁欲做我ê囝、查某囝。就是這个意思。

2.     著獻身。獻身軀靈魂，所有ê予上帝。全然做上帝ê所有。干但趁伊ê旨意。「為著主來活，為著主來死。」或是啉、或是食á是無論行啥物代誌攏會榮光上帝。在早約伯講：「雖bóng伊欲刣我，我也欲擒伊。」美國南北戰爭ê時，有人kā大統領林肯講：「佇這个時陣咱所要緊--ê，就是上帝會近倚佇咱ê身邊，」伊應講，「有影！總是我想有一項koh-khah要緊，就是咱著近倚佇上帝ê身邊。」

3.     著信上帝這陣會予咱成聖。

　　成聖是上帝所命令，是伊所約束；予人清氣siùⁿ，是基督降世ê大目的，又koh是濟濟人所經驗--ê。是咱所著有ê祝福，所以咱若用真實來求，的確會賞賜咱。著ài有這款ê信仰。「凡恁teh祈禱ê時，恁若信的確會得著，就的確得著。」「恁若求，恁ê父teh欲用聖神賞賜恁。」

E. 著佇啥物時來得著成聖？成聖是即時，即刻會得著ê祝福。無論啥物人，若tòa頂面3條件，親像飫、嘴乾來求；的確隨時欲得著。

1.成聖毋是漸漸chiah會得著ê福氣。論成聖，上帝所命令所約束攏是現在即時ê意思。「我是聖，恁也著聖。」「著予聖神充滿。」「上帝ê旨意是恁ê成聖」對遮个話就明明thang知毋是漸漸來得著成聖ê意思。

2.成聖毋是濟濟年積聚信仰上ê經驗，然後chiah會得著ê恩典。予人清氣siùⁿ是上帝，上帝所看ê一日就是一千年；一千年就是一日。著經過偌久ê靈魂chiah會得著成聖。全然無這款ê制限。已經得著拯救ê人，想著koh真一步來成聖；tòa三個條件，熱心來求，的確隨時teh欲得著。

3.成聖毋是照有人teh拍算佇欲離開世間ê時chiah會得著ê福氣。「這陣就是恩典ê時。」「今仔日若聽見伊ê聲，毋thang猶久硬心。」上帝ê時間就是「這陣。」

請大家，毋thang想thèng候teh欲臨終ê時，著這陣緊來受成聖ê大福氣。

 ...MORE
 
 
 
 
 
...MORE
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461