批評人
「莫得批評，人chiah免拄著批評。」
馬太7:1節
這句話對咱做真大警戒。批評人，就是講人ê歹喙；這款ê事不但是人真快犯ê罪，也是人自然所teh犯ê罪。無論佇集會ê所在，á是相kap食茶ê時，或是佇路裡相kap行，不管上流ê人、下流ê人所相kap談會ê中間，第一會予人感趣味ê，就是講人ê是非。尚且所批評ê，講人ê歹是比講ê好khah常，khah有趣味ê款。有時用宛轉ê方法來批評，有時親像用真親切ê款來批評，佇時用真面目來批評，也有時liān人ê講話kap行踏ê款續來批評。基督有警戒咱人所有這款ê歹ê蔽病。
1. 人ná愈gâu批評人，就愈快袂記得批評家己。常常清家己ê心肝ê lâ-sâm，也gâu猛省kā-kī ê不德ê人定著袂批評人。自省ê人無有彼款勇氣thang批評人。批評人ê習慣若調新，自然會生起比別人khah贏ê心；就是製造自負心。總是自負心佇上帝ê面前是真袂看得ê罪惡。楹仔柴是比草á幼khah傷重，要緊著事先除傷重--ê。人著會記得，若定人ê罪，上帝teh欲照彼个程度，或是khah重來定in ê罪。
2. 定別人ê罪（批評人），不但是造家己ê罪過，就對彼个人也是不正ê所行。受連累來拄著災阨ê，khah濟是對佇人ê喙來做原因。批評人袂會佇相kap坐遐个人中間來soah，伊ê開闊是非常。一人傳過一人，所傳袂照原形，攏是對細到大，對輕到重。佇火爐邊，古井邊所講ê閒話，連鞭成做這鄉這庄ê風聲謗影；尚且原形攏失落。
3. 定別人ê罪ê第一危險ê理由，就是無十分知識彼个人。人欲捌本身尚且oh，欲汰會捌別人到底。識別人ê一部分，的確毋知別人ê全部：看別人ê前面，就想有續了解後面ê款式；這是毋著。聽別人ê言語，就隨時判斷伊ê思想，這也是輕率ê所做。真gâu講話ê人，無的確伊有善良ê心。講無好聽ê話ê人，隨時欲判斷伊有驕傲ê心，這也是無的確。人袂會直接知人ê心肝。若欲批評人著十份知捌彼个人chiah-thang；總是真可惜欲知捌別人到十分是袂會ê事。
4. 欲定人ê罪，若是彼个材料是對佇聽見ê，thang講是koh-khah有罪過ê所做。雖bóng直接想有捌彼个人，尚且有錯誤，按怎樣會得thang判斷所聽見ê來做事實。對人聽別人ê惡評，心內無歡喜來囥teh ê thang講是無罪過；若是歡喜承受，koh再傳予別人ê，是重犯。試想，為著傳報無實ê批評á是錯誤ê事實，致到予人拄著災難；彼个責任kiám毋是講ê人kap傳ê人著擔mah？
5. 欲想上帝公義ê審判ê時，無的確受人定罪ê人，上帝也欲kā伊定罪；kā人定罪ê人也無的確上帝teh欲報賞--伊。Koh在人無kā伊定，上帝欲kā伊定嘛敢。佇上帝ê法庭，kā人定罪，全然無影響佇彼个人。上帝有上帝本身ê立場來栽判人。伊毋免聽人ê證言，所影響ê毋是別人，是家己。為著定人ê罪，反轉家己著受定。
6. 第一歹性質ê批評就是將濟歸予別人ê批評法。這款khah濟是對怨妒kap怨恨來生出ê。歡喜別人ê不幸，將別人ê苦痛來做爽快ê最劣等ê心情。拍亂團體ê平和、拍破家庭ê和合ê，就是這種ê人。對佇誤解來ê批評，有小可thang體諒ê所在，若是對佇歹意來--ê，斷斷袂赦得。
7. 以上所所講ê，thang得用佇一般ê人普通ê警戒。總是有一個例外就是上帝有特別賞賜人這个地位kap職務來定人ê罪。犯人對判官、囝對父、學生對先生ê款；in攏thang十分來管理，或是著嫌，或是著著栽判。所著行ê義務in thang行；干但一項，欲行ê時著ài誠實（無偏私），著用善意來行chiah有合上帝ê意思。
8. 若是按呢就頂面所講彼个義務以外，無論啥物事情，無論啥物時陣，斷斷毋thang栽判別人，毋thang講人ê歹，著專專講人ê好是毋？也無拄拄是按呢。基督有教示咱講「若是兄弟有犯罪，著本身去kā伊講，伊若聽你，就你得著伊；若是毋聽就著兩三人去thang做干證。」設使知別人有患著真重ê罪，若是干但按呢hiat下teh，確認會做伊本身或是社會ê危害ê時陣，毋thang向別人來kā伊批評，著直接去kā伊注意，這是上帝ê意思。基督講「毋thang批評人...」是講毋thang無斟酌、無親切、殘忍、lām-sám嫌人ê意思。
咱ê心肝若十分有積聚基督ê疼佇teh，就無論佇啥物時陣，著怎樣來講伊欲指示咱。 |
