SÎN Ê NŃG-CHIÁⁿ
Lán Ki-tok-tô͘ só͘ sìn ê Sîn sī chin nńg-chiáⁿ ê sîn－kù-chāi lâng bú-jio̍k; hō͘ tuì-te̍k pháiⁿ khoán-thāi, bô ke kóng chi̍t kù oē, iā bô siūⁿ beh pò-siû; siōng-chhiáⁿ tī Si̍p-jī-kè téng lâi siū kiàn-siàu ê sí.
Bô chhin-chhiūⁿ thang kiaⁿ-hiâⁿ ê kuí chiong-kun teh chhú-tī i ê tuì-te̍k, hit khoán ê sîn; iā bô chhin-chhiūⁿ toā táⁿ ê goā-kho-i, bô siūⁿ hoān-chiá ê kan-khó͘, ti̍t-thâi, ti̍t koah. Hoán-tńg ná ka-kī hō͘ lâng koah ê khoán, oē kám-tio̍h pa̍t-lâng ê kan-khó͘.
I bô chhin-chhiūⁿ kiông-kòng, kòng phoà lán ê sim-mn̂g, kiông-kiông ji̍p-lâi. I ê seng-khu hō͘ lō͘-chuí ak-tâm, khiā tī mn̂g-kháu teh soè siaⁿ kiò. I bô kńg-chiūⁿ tîn-ai lâi hián-chhut I ê siū-khì, iā bô chhin-chhiūⁿ luî tân. I sī chin soè-jī soè-siaⁿ tī lán ê hī-khang-piⁿ teh kiò ài ê Sîn.
Chá-sî I tī Se-nái-soaⁿ hián-chhut hō͘ Mô͘-se khoàⁿ-kìⁿ ê sî, sī thang kiaⁿ ê Sîn. Chóng-sī kàu Sin-iok ê sî-tāi sī chiâⁿ-choè chi̍t ê thiàⁿ-thàng ê Thiⁿ Pē, hián-hiān I pún-sin lâi lâu sio̍k-choē ê huih tī Si̍p-jī-kè téng.
Kè-lō͘ ê lâng mā Iâ-so͘ kóng, "Lí nā-sī Siōng-tè ê kiáⁿ tio̍h tuì Si̍p-jī-kè téng lo̍h lâi!" Chè-si tiúⁿ iā sī án-ni kóng, "lí oē kiù pa̍t-lâng boē-oē kiù pún-sin. I sī Í-sek-lia̍t ê ông; taⁿ tio̍h tuì Si̍p-jī-kè lo̍h-lâi!" Liân saⁿ kap tèng ê chha̍t iā ki-chhì--i. Ah, si̍t-chāi chin bô chêng!!
"Goá ê Siōng-tè, goá ê Siōng-tè, siáⁿ-sū pàng-sak goá!" M̄-nā lâng pàng-sak I, chiū Siōng-tè to pàng-sak I!"
Hoān choē ê lâng pàng hòng-hòng, bô choē ê Iâ-so͘ uī-tio̍h i ê choē lâi siū-khó͘. Sè-chiūⁿ só͘ ū ta̍k-khoán ê choē lóng kui tī I－
Bô-hān ê chek-jīm, tāi-piáu-tek ê kan-khó͘!
Lō͘-tek-má-teng kóng, "I chiâⁿ choè chi̍t ê kiông-kòng, kiông-kan, thâi-sí lâng í-siōng ê toā choē-jîn."
"Ah, Pē-ah! Kiû lí sià-bián--in, in-uī in m̄-chai in ê só͘ choè." Cháiⁿ-iūⁿ ná kóng chiah loán-jio̍k ê oē! Cháiⁿ-iūⁿ kán bô chiù-chó͘ tuì-te̍k jiân-āu chiah sí! àn--choáⁿ I bô khah hiat-hàn toā-siaⁿ kiò kóng, "Pē-ah! Tio̍h hêng-hoat--in!"
Ah! Si̍t-chāi I chin nńg-chiáⁿ, in-uī nńg-chiáⁿ chiah hō͘ lâng tèng Si̍p-jī-kè. I hiah nńg-chiáⁿ kàu I boē-oē chiú-chó͘ tuì-te̍k. Siōng-chhiáⁿ ka-kī chi̍t-ê tiām-tiām lâi taⁿ bān lâng ê choē. Sè-kan lâng ū-ê chiong ka-kī ê choē kui hō͘ pa̍t-lâng lâi taⁿ, iā ka-kī hong-sîn choè ióng-béng ê lâng. Siáⁿ-sū I tio̍h uī-tio̍h bān lâng lâi siū-khó͘! Si̍t-chāi I chin nńg-chiáⁿ!
Chóng-sī Sîn ê nńg-chiáⁿ sī khah iâⁿ-kè lâng. I ū tit-tio̍h khah-iâⁿ. THIÀN sī I ê la̍t. "Un-hô ê lâng beh sêng-chiap thó͘-toē." Bô-tí-khòng chiū-sī choè-āu ê sèng-lī-chiá. En̂g-kng ê bián-liû sī I ê.
Suî-sî siū-khì, liâm-piⁿ beh pó-siû ê sîn, sī iá-bân lâng ê sîn. Chin kiông ê khoán, iáu-kú sī chin jio̍k. In-uī boē-oē chè-chí ka-kī ê iân-kò͘. Lán lâng kiám m̄-sī iû-goân án-ni. Sió-khoá ê sū iā giâ-chhut ti-thâu, âng-choá pau-bīn, tòng boē tiâu chiū khí-chhiú, siūⁿ phô͘-kha......kìⁿ-tio̍h khah gâu ê lâng chiū choè-kèng-lé, khoàⁿ-tio̍h koán-hā ê lâng chiū pìⁿ-choè kiông-béng ê lâng, ka-kī choân-tio̍h, pa̍t-lâng choân-chhò. To̍k-toàn lâng, chè-chō choē, hō͘ kha-á taⁿ. Pháiⁿ khoán-thāi bó͘-kiáⁿ, lô͘-po̍k, lú-pī. Ah! Loán-jio̍k ê lâng ah! Lí khoàⁿ-liáu chin kiông, nā-sī kî-si̍t sī choè jio̍k ê lâng lah! Sîn beh thái oē chhin-chhiūⁿ lí ê bô-tio̍k, neh!!
Khin-khin-á ta̍h tio̍h kha chiū ngáu-ngáu háu ê káu chiū-sī lí lah! Chhiūⁿ bô hiah khoài siū-khì. M̄-kú nā siū-khì, chhù iā kiāu-tó, só͘-í chin thang kiaⁿ.
Khi-hū nńg-chiāⁿ ê Sîn ê lâng ah! Bô-kú lín teh-beh thiaⁿ-tio̍h chit-khoán ê siaⁿ lah! "Choè m̄-hó ê lâng ah! Goá m̄-bat lí; tio̍h lī-khui goá khì lah!!"
