NN̄G KHOÁN Ê KÉ-CHÍ
Sèng-keng ū kóng-khí nn̄g-khoán ê ké-chí, chiū-sī Sèng Sîn ê ké-chí kap Mô͘-kuí ê ké-chí.
Sèng Sîn ê ké-chí chiū-sī: Jîn-ài, hô-pêng, hoaⁿ-hí, thun-lún, chû-pi, siān-liông, tiong-sìn, un-jiû, chún-chat chiah-ê. Chhiáⁿ thak Ka-lia̍p-thài 5:22－23.
Mô͘-kuí ê ké-chí chiū-sī: Saⁿ-chiⁿ, kiat-oàn, kan-chà, kuí-khiat, giâu-gî, oàn-hūn, kiat-tóng, hun-pêng, hām-hāi, oàn-tò͘, huí-pòng chiah ê. Chhiáⁿ tha̍k Ka-lia̍p-thài 5:20－21.
Sèng Sîn ê ké-chí kap Mô͘-kuí ê ké-chí, saⁿ tuì-hoán. Sèng Sîn ê ké-chí sī hó ê, Mô͘-kuí ê ké-chí sī pháiⁿ ê. Sèng Sîn ê ké-chí sī sio̍k tī Siōng-tè, Mô͘-kuí ê ké-chí sī sio̍k tī Sat-tàn. Sèng Sîn ê ké-chí lī-ek kàu-hoē, Mô͘-kuí ê ké-chí hāi kàu-hoē. Sèng Sîn ê ké-chí heng-khí Siōng-tè ê kok, Mô͘-kuí ê ké-chí soe-bî Siōng-tè ê kok.
Taⁿ, lán kàu-hoē só͘ teh kiat ê, m̄-chai sī Sèng Sîn ê ké-chí á-sī mô͘-kuí ê ké-chí? Lán kàu-hoē ê ké-chí m̄-chai sī sio̍k tó chi̍t khoán? Chhiáⁿ lán siūⁿ khoàⁿ-bāi cheh! Phah-sǹg Sèng Sîn ê ké-chí khah-choē, m̄-kú Mô͘-kuí ê ké-chí mā káⁿ boē chió.
Kàu-hoē m̄-chai ū heng-khí, chìn-pō͘, á-sī soe-bî thè-pō͘?
Kàu-hoē ê sū-gia̍p m̄-chai ū teh lī-ek á-sī teh sún-hāi? Tāi-ke m̄-chai ū chīn-la̍t, jia̍t-sim, hi-seng á-bô? Tāi-ke m̄-chai ū tuì kàu-hoē ū hōng-sū lô-le̍k á-bô? Nā ū Sèng Sîn ê ké-chí, chiū lán kàu-hoē toā-toā hēng-hok. Nā ū Mô͘-kuí ê ké-chí, chiū lán kàu-hoē toā-toā put-hēng. Chhiáⁿ tāi-ke siūⁿ khoàⁿ-bāi chiū oē chai-iáⁿ.
Siat-kàu kàu-taⁿ 50 goā nî ê kú lah! Só͘ kiat ê ké-chí, m̄-chai choē á chió, m̄-chai sī tó chi̍t khoán ē ké-chí, m̄-chai hāu-kó toā á soè?
Pa̍t-uī ê kàu-hoē chin heng, chin jia̍t, chin oa̍h-tāng! M̄-chai lán ê kàu-hoē ū án-ni á-bô? Káⁿ ū chiah tio̍h! Pa̍t-uī ê kàu-hoē Hoē-tn̂g ti̍t-ti̍t khí, choè kang ê lâng ti̍t-ti̍t ke-thiⁿ, sìn-chiá ti̍t-ti̍t choē, pò͘-tō ti̍t-ti̍t khòng-tiong! M̄-chai lán ê kàu-hoē cháiⁿ-iūⁿ? Káⁿ ū án-ni chiah tio̍h! Lán ê kàu-hoē mā sī tio̍h ū án-ni chiah ha̍p-gî, chiah sī eng-kai. Á-sī lán ê pài-tn̂g ná hoè, Thoân-tō chiá ná chió, kàu-hoē ná hi-bî, sìn-chiá bô sím-mi̍h ke-thiⁿ?
Goá m̄-sī choân-bûn tī Kàu-hoē Chèng-tī, iā m̄-sī Thoân-tō-kio̍k ê chit-oân, só͘-í bô sím-mi̍h chai siông-sè, phah-sǹg lia̍t-uī, nā chū-séng chiū oē chai-iáⁿ, bêng-pe̍k. (Chhiáⁿ tha̍k "Tâi-oân kàu-hoē-pò 9 ge̍h hō, goá só͘ siá ê Bān-liân-pit)
Lán kàu-hoē m̄-thang tuì-tiōng goā-khak, tio̍h tuì-tiōng lāi-iông. Lán kàu-hoē m̄-sī beh tián khang-khak miâ, sī beh tián si̍t-chit. Goā-khak bô lō͘-ēng, lāi-bīn sī khah iàu-kín. Goā-phê chng-thāⁿ sī khang-khang. Ū Ki-tok ê cheng-sîn, Sèng-sîn ê la̍t, sī choè tē it iàu-kín!
Só͘-í lán kàu-hoē tiong, nā ū Mô͘-kuí ké-chí, chiū-tio̍h kín-kín khì-sak, Sèng-sîn ké-chí, chiū-tio̍h jú-hoat poê-iúⁿ.
Ki-tok-kàu ê cheng-sîn sī "ài", só͘-í lán bān-sū tio̍h ēng chit-jī choè chún-chîn, chiū oē tit-tio̍h Sèng-sîn ê ké-chí. Lán tio̍h soè-jī, m̄-thang hāi kàu-hoē, chó͘-tòng kàu-hoē, tio̍h lī-ek kàu-hoē, chín-heng kàu-hoē chiah ū ha̍p-gî.
Toā-toā ǹg-bāng kàu-hoē oē tit-tio̍h Sèng Sîn ê ké-chí choē-choē thang êng-kng Siōng-tè ê kok tī Tâi-oân. Nā-bô án-ni, sī siat-kàu 50 nî ê kang, hiàn-sin ê cheng-sîn, sī kui tī khang-khang.
ǹg-bāng lán tāi-ke, oē choè choē-chió thang lī-ek chín-heng kàu-hoē!!
