婦女tháu-pàng
現時男女平等的議論，毋但佇社會上宣傳地位、教育、權利、平等；就佇咱教會內閣較著代先開放；因為男女平等是人類同享的福氣。
1、婦女的地位。婦女的性受男性壓迫，彼个歷史有3000外年；若是稽考社會學，古早的社會用女性做主宰，就母系的時代，當時所生的囝兒只知有老母，毋知有老爸；因為老爸規年出外，囝兒罕得見伊的面；老母10月日懷胎，3年久飼奶，無一時離老母，老爸無擔當責任所以較毋bat--伊。後來家內人ná 濟，婦人人因為生育的關係，袂會出外趁食；一概所欠用的食穿攏對丈夫來，按呢可憐的婦人人失落獨立的氣力；就將母系變做父系；對遮漸漸失勢，做成一个無形的寄生蟲，chhut-chāi人thún踏，閣親像一種無活氣的產兒機器，chhut-chāi人使用；所以古早講女子著趁人，在家趁老爸，出嫁趁丈夫，丈夫死趁囝；閣再死某嗡閣娶是著，死翁，某，袂會閣嫁得，著佮翁saⁿ-kap死，無死叫做未亡人；若閣嫁就是失節，按呢看婦人人的地位低親像奴俾。
2、 婦女的權利。照禮記講，男女無參插坐，無siâng 衫架，無siâng 才柴梳面巾；無授受往來；嫂、叔毋通saⁿ-kap講話；外面的話毋通入來內面，內面的話毋通出外面。已經嫁出，無事故袂使倒去外家；若倒轉外家袂使佮兄弟同桌食；送人客毋通出到門外；兄弟去，出來見兄弟著佇戶碇內。出門著掩面；暝時行路，著點燈，燈火熄，袂使閣行。婦人人受這號薄待的起點，是野蠻的時代男女無教育、無智識、無德行、邪淫的人，放縱私慾。聖人講婦女是歹，奪婦人的權利，用逐項共伊藩圍；看婦女親像鬼怪、毒蛇；禁佇房間親像關豬關牛；予伊無出外面一步；萬不得已著出外，也著遮蓋伊的耳佮目，毋通聽毋通看；只有著保貞節；無自由無權利。詩人Tiàu Lâm-to-lō͘講將女子禁佇房間是第一好的計。
3、 婦女的教育。古早是無讀冊的教育。婦女10 歲以後就關佇厝內，教伊製麻袋、紡絲繭、做衣服、學祭禮。毋予伊讀冊的因端，是驚了看淫書、小說，來變換伊的德行。無禁in 歹冊，反轉毒害婦女的耳目。
4、 婦女的 tháu-pàng，頂面所論是未領台以前3000年的歷史，婦女受歹款待的慘狀。31年來台灣教育男女平等；權利開放；地位提懸漸漸得著自由自主的權利。論佇教會的婦女的幸福，南北有高等女學、婦學；也有婦女家己創設女宣道會做設教50年的記念；經過的效果不止好聽；也南部今年也有人提議神學校男女共學。前年大會有准設女執事，今年大會，准設女長老。已經准女長老就是佮男長老平等會赴獨會，會赴中會，會赴大會，做議員有議決權。按呢婦女得著大開放。Kiám-chhái後來會到有女牧師也敢。這是前途教會婦女的大幸福。
緊寫幾字共各位ko͘，姊妹慶祝將來女界大發展佇天國。 |
