"Chi̍t tih chi̍t tih ê chuí"
(Soà-chiap í-chêng)
(7)
Sîn kap Chhià-hu
Ū chi̍t ê lâng sái chi̍t-chiah bé-chhia, chài chin-chē mi̍h, keng-kè noā-kau-bê ê soè tiâu lō͘; in-uī chhia-lián tiâu thô͘-bê., só͘-í bé thoa lóng boē chìn-chêng.
uī-tio̍h án-ni, chit ê lâng. choân-jiân bô lô-le̍k, suî-sî kuī-lo̍h tī thô͘-bê téng, toā siaⁿ hiu sîn lâi pang-chān.
Sîn chiū ìn kóng, "Pîn-toāⁿ ê lâng ah, chiong lí ê keng-thâu khoà tī chhia-lián, chhut-la̍t chiàu só͘ oē lâi sak, án-ni iáu-kú nā tio̍h khiàm-ēng goá ê pang-chān, goá chiū hoaⁿ-hí thiaⁿ lah ! Tio̍h oē kì-tit hit kù sio̍k-gú kóng, "Thiⁿ pang-chān chū-chō͘ ê lâng."
KÀ-SĪ
Siông-siông thiaⁿ-kìⁿ lâng teh kî-tó ê sî, só͘ kiû kap chit-khoán siâng luī--ê put-chí choē. " Pē-ah, Lí ê hok-im kàu Tâi-oân í-keng gō͘-cha̍p goā nî kú lah! nā-sī lâi sìn lí ê lâng sī chin chió. Kiû Lí tio̍h chiong Lí ê sìn khui-khé in ê sim, hō͘ in kín-kín lâi kap goán saⁿ-kap kiâⁿ chit-tiâu thiⁿ ê lō͘, thang lâi tit-tio̍h Lí ê só͘ èng-ún ê hok-khì........" Chit-khoán ê só͘ kiû m̄ chai ū kong-hāu á-bô? Phah-sǹg chió-chió lâng teh siūⁿ. Chit-khoán ê kî-tó m̄-nā bô kong-hāu, hoán-tńg tuì Sîn chin bô lé, sī sio̍k tī bēng-lēng Sîn ê só͘-kiû. Tio̍h ài chim-chiok! Eng-kai tio̍h án-ni kiû: - "Pē-ah, kiû-lí sià-bián goán pîn-toāⁿ ê choē.Siúⁿ-sù goán hó kì-tì, hō͘ goán siông-siông oē kì-tit lí, lâi thé-thiap Chú ê kan-khó͘, pang-chān goán gâu chhut-la̍t choè lí è kang, thang kín chio-ho͘ bē sìn ê lâng lâi kui lí............"
(8)
Pûn ta̍t-á ê lâng
Chi̍t-tuī ê peng, tī chi̍t pái sio-thâi ê sî, thâi su. Chi̍t ê pûn ta̍t-á ê lâng hō͘ láng liah2--khi. Tuì-te̍k beh kā i chhèng-sat ê sî, chiū toā siaⁿ háu kóng. "Ah, lia̍t-uī siáⁿ-sū beh thâi goá? Goá ê chhiú m̄-bat hoān-tio̍h thâi-lâng ê choē."Tuì-te̍k ìn kóng,"Si̍t-chāi ū iáⁿ, m̄-kú lí ēng ta̍t-á kiau-so chèng-lâng lâi hoān thâi lâng choē; só͘-í lí eng-kai iā tio̍h siū siâng-khoán ê ūn-bēng chiah oē choè-tit."
KÀ-SĪ
Siàn-tōng lâng choè phái ê lâng, i ê choē-koà sī kap hit ê khì choè ê lâng pîⁿ-pîⁿ tāng.
(9)
Chhēng iûⁿ-phê ê chhâi-lông
Ū chi̍t-pái, chi̍t-chiah chhâi-lông, chhēng iûⁿ-phê ê saⁿ; tī chi̍t ê tiong-kan, i ê piàn-chong ū toā sêng-kong; só͘-í oē tit-thang tī iûⁿ-kûn ê tiong-kan lâi khó͘-chhó͘ choē-choē ê iûⁿ-á. Chóng-sī kàu lō͘-bé, hō͘ lâng hoat-kiàn--tio̍h; kò͘-iûⁿ ê lâng suî-sî kā i phah sí, chiong i ê sin-si kap só͘ chhēng ê saⁿ, choè chi̍t-ē tiàu tī chhiū-téng, thang choè pat2 chiah chhâi-lông ê kéng-kài.
Hū-kūn ê lâng khoàⁿ-kìⁿ iûⁿ-á án-ni lâi tiàu tī chhiū-nih toā kiaⁿ-hiâⁿ, tiong-kan chi̍t ê mn̄g kóng. "Chiong lí ê iûⁿ tiàu tī hia sī sím-mi̍h lí-iû ?" Kò͘-iûⁿ ê ìn kóng. Hé-iā--sī ! he sī chhâi-lông só͘ lī-iōng teh pau seng-khu ê iûⁿ-phê nā-tiāⁿ."
KĀ-SĪ Lâng boē oē tit thang tuì goā-bīn lâi phoàⁿ-toàn--tit.
(10)
àm-kong kap Chiong-su (sek-sut)
Chi̍t chiah àm-kong chiáu hioh tī khang-khak chhiū ê lāi-bīn teh khùn tàu. Chhiū-kha ê chháu lāi chi̍t-chiah chiong-su toā-siaⁿ teh chhiùⁿ-koa. àm-kong chin bô hoaⁿ-hí chiū kiò i khì pa̍t-uī, Chóng-sī chiong-su m̄-nā bô thiaⁿ i ê oē khì pa̍t-uī, soà kóng, "Chèng-ti̍t ê lâng sī àm-sî chiah ū khùn." Bô soè-jī choè i koh-chài ti̍t-ti̍t khah toā-siaⁿ lâi háu.
àm-kong chiām-sî tiām-tiām, āu-lâi oán-choán i ê oē kóng, "Goá si̍t-chāi sī ài thiaⁿ lí ê koa, m̄-kú chin ài khùn, só͘-í chiah kiò lí khì pa̍t-uī; taⁿ nā kah sī boē khùn-tit, choè lí chhiùⁿ, bián soè-jī. iā goá chia ū tām-po̍h tiⁿ-tê, lim liáu oē chin hó siaⁿ, lí nā bô hiâm peh khí lâi chhiū-téng ê lô͘-khó͘, chhiáⁿ lâi lim, goá beh chiong che choè-lí ê hó siaⁿ-im ê pò-siúⁿ."
Gōng ê chiong-su, suî-sî peh chiūⁿ chhiū-téng beh lim tiⁿ-tê. àm-kong suî-sî kā i the sí; Só͘-i tit-tio̍h thang an-jiân hó khùn.
KÀ-SĪ
iàu-kiû hut-jiân piàn pài-thok, hit-khoán ê lâng m̄ thang sìn-iōng--i.
