高萬展的小傳
新店教會的長老高萬展佇8 歲就領洗禮，伊的老母高霞嫂，北部歷史中有名的婦人人。新店的拜堂是伊發起來設，用伊的厝做拜堂2年久。萬展有承接老母的教示，熱心佇教會，到今有4代人攏信主。伊佇這家nih，算是第一的名望家，有當保正佮郡的協議會員，予官廳真信任--伊。佇3月28日過往。會葬的日有幾若位的牧師，傳道師及本堂的會友；會外有郡守，課長，學校以及通街的名望家；共300外人次序行列。看的人大感激傷心。本教會算失落一支大柱！！
Ko bān-tián ê sió-toān
Sin-tiàm kàu-hoē ê tiúⁿ-ló Ko Bān-tián tī 8 hè chiū niá soé-lé, i ê lāu-bó Ko Hâ só, pak-pō͘ le̍k-sú tiong iú-bêng ê hū-jîn-lâng. Sin-tiàm ê pài-tn̂g sī i hoat-khí lâi siat, ēng i ê chhù choè pài-tn̂g 2 nî kú. Bān-tián ū sêng-chiap lāu-bó ê kà-sī, jia̍t-sim tī kàu-hoē, kàu taⁿ ū 4 tāi lâng lóng sìn Chú. I tī chit ke nih, sǹg sī tē-it ê bêng-bōng ka, ū tng pó-chiàⁿ kap kūn ê hia̍p-gī hoē-oân, hō͘ koaⁿ- thiaⁿ chin sìn-jīm--i. Tī 3 ge̍h 28 ji̍t koè-óng. Hoē-chòng ê ji̍t ū kuí-nā uī ê Bok2-su, Thoân-tō-su ki̍p pún-tn̂g ê hoē-iú; hoē-goā ū kūn-siù, khò-tiúⁿ, ha̍k-hāu í-ki̍p thong koe ê bêng-bōng ka; kiōng 300 goā lâng chhù-sū hêng-lia̍t. Khoàⁿ ê lâng toā kám-kek siong-sim. Pún kàu-hoē sǹg sit-lo̍h chi̍t-ki toā thiāu!!
