祈禱
1、 有一款的植物，若是日落的時，伊的葉佮花就合teh；若日出較燒lō 的時，彼个花佮葉就閣開(親像土豆抑是見笑草的款)按呢植物對日頭吸收燒氣佮活命來大叢。Tú-tú親像按呢，佇祈禱的時，咱的心門大開向佇義的日頭，會通閃避攏總的艱難佮重擔，來長大佇主耶穌完全的體。
2、 照人所teh想，對祈禱咱袂會變換上帝的計畫；總是teh祈禱的人伊本身有變換。雖罔佇這个無完全的生活中，咱的大體的形象，對祈禱逐日漸漸ná向佇完全。且想雞母teh孵卵的事，雞卵內面是無形象，清清的款，總是雞母若孵ná久的時，雞卵就koh樣變做雞仔囝，親像雞母的款式。按呢毋是雞母有變換，就是姬卵變換。所以咱對佇祈禱會變換咱親像上帝榮光的形象。
3、 水蒸氣，為著日頭的熱，對地面爬peh上空中。雖罔有引力的法則，iáu-kú無順伊的法度。水蒸氣peh上空中，後來變做雨閣落來地面上ak田園做人的路用。親像按呢聖神的火迎接咱的祈禱到上帝的面前，贏過罪惡佮歹代，後來受上帝的祝福，閣落來地面上做人的利益。
4、 有一款海裡的植物叫做‘sea gooseberries，'是到極軟弱，一潑的海湧會共伊拆到碎kô͘-kô͘。總是若有風颱的風聲，伊就沉落海底，佇遐風颱袂得到，海湧潑袂著，極安穩。祈禱的人tú-tú是親像按呢，設使佇這世間，若有罪惡佮艱難的風颱欲到；伊就隨時chǹg入上帝的疼的大洋，佇遐永遠平安閣自在。
5、 有一个哲學者去揣一个神秘家坐。In攏無講話，恬恬坐tiap仔久；後來哲學者peh起來欲轉去的時，神秘家共伊講「我敢著你所想--的。」若是哲學者應伊講「毋kú我袂會知你所感著--的。」按呢是明。地面上的智識未會感著，也未會了解上帝的存在，kan-ta用祈禱佮上帝交陪的人，才實在會捌上帝。
6、 祈禱的人佇祈禱的中間所得著的平安，攏是對用盡心盡意佇大體上佮上帝交陪來得著--的。對魚池所peh上空中的水蒸氣，袂會成做大的雲通變做雨；kan-ta對大海的，才會成大的雲變做雨落來地面上做路用。所以佇祈禱的中間所得著的平安，毋是對咱的智識來--的，獨獨是對佇上帝無限量疼的大海才有。
7、 日頭不時teh照光，日暝的分別，四季的變換，毋是對日頭的關係，就是對地球的運轉所致。Tú-tú親像按呢義的日頭「昨日，今仔日，同一樣，直到代代。」(希伯來13：8)設使咱有時歡喜，有時憂悶，這攏是對佇咱對上帝的態度的精差所致。咱若開心門向上帝用冥想佮祈禱，義的日頭會醫好咱的罪過的傷痕，也予咱會得著完全的好。(馬拉基 4：2)
8、 自然的法則是上帝的手段，欲幫贊人佮別項的動物的進化也做利益。神跡毋是反對自然的法則，猶有不止濟較懸的自然法，咱平常毋知。若會用遐个權的自然法，就會得通行神跡。對祈禱咱漸漸通知遮个闊懸的自然法。第一懸的神跡就是用平安佮歡喜來充滿咱的靈魂；kiám-chhái咱欲想講，佇這个罪惡，苦難的世間，敢有這款的平安？總是有lah！袂會欲成做會 lah！！蘋果佇熱的國種袂起，抑是檬果（印度產果子)佇gâu落雪的國袂會種得。設使遮个果子若是佇無合的所在種會起，咱通講這是奇蹟。毋kú設使in 的條件若有設備好勢，雖bóng熱帶地的植物，佇寒的所在猶原種會起。
9、 設使萬人若會àⁿ耳空來聽上帝的聲，就無欠用先知佮傳道理的人去四界宣傳上帝的聖旨。因為萬人無按呢，所以著四界宣傳上帝的福音是最要緊。總是有時對祈禱會比對講道理彼个功效閣較大。佇密房暗靜專心的祈禱慧幫贊利益人真大。對彼个感化力到極有功效，到佇萬人，宛然親像無線電信，毋免倚靠電線；所以咱所祈禱的話，會大影響到佇別人。
10、有時佇無雨水礁燥的所在iáu-kú通看見青翠的果子真gâu 生。一下chim-chiok 共伊研究，就知伊的葉青翠，茂盛，gâu生果子，是因為伊的根有soan佇土底 teh流的活泉。有時咱欲大gông-ngia̍h，看見祈禱的人，雖罔佇這个罪惡貫滿的世代，伊逐日的生活到極平安，面笑容，不時歡歡喜喜。這就是對祈禱，伊的信仰的根有soan入佇活泉的源頭，對遐來得氣力佮活命通結永遠活的果子。(詩篇1：2，3)
11、 樹仔根的尾溜，對伊的本能到極內，伊的感覺真好；設使若無肥土的所在，伊的根就soan走，若有肥的所在有通得著食物的時，伊就soan去。祈禱的人，猶原有分別好歹路；著，毋著的力佇teh。伊有夠額的智識佇teh，通閃避奸詐，詭譎佮錯誤，來揣性命所倚靠的上帝。
12、若毋捌用祈禱佮上帝交陪的人，實在袂堪得講是人。這款的人是親像一款的動物受鍛鍊到會知一定的時間，佇一定的所在來做一定的工nā-tiāⁿ；袂堪得稱呼是人，這款的人有時比遐的動物閣較慘，因為毋限定無盡in 的義務佇上帝，尚且會褻瀆上帝。總是祈禱的人有權通成做上帝的囝，因為上帝創造咱人形狀佮伊相同，咱漸漸會長成親像伊的款式。 |
