Kàu-hoē ê siau-sit

(A)

Soan-kàu-su

• 1. Sùn ko͘-niû (Miss Hotson) uī-tio̍h sin-thé lám ê in-toaⁿ, koat-tēng tī 6 ge̍h 23 hō ê chûn beh tńg-khì Ka-ná-tāi.

• 1. Lia̍t ko͘-niû (Miss Elliot) kap Hē ko͘-niû (Miss Haig) in ê sù-hâ (賜暇) ê kî-kan í-keng kàu, iuⁿ-goân 6 ge̍h 23 hō ê chûn beh chhut-hoat.

1. Lâu Bo̍k-su kap Bo̍k-su niû tī 6 ge̍h bé beh khì Ji̍t-pún, tī hia hioh-joa̍h kàu 8 ge̍h, Bo̍k-su niû kap in ê kiáⁿ-jî beh tńg-khì Ka ná-tāi: in-uī Bo̍k-su niû ê lāu-bú ê sin-thé bô ióng-kiāⁿ. iā Lâu Bo̍k-su beh tī Karui-xawa(輕井澤) hù Ji̍t-pún choân kok ê soan-kàu-su hoē, nā soah chiū beh tńg lâi Tâi-oân.

1. Bú-hoē ū koh phài chi̍t-uī sin ê Bo̍k-su, kiò-choè Toh Hí-sek (卓喜石-Gladstone Macintosh) beh lâi Tâi-oân. I sī Knox tāi-ha̍k chut-gia̍p--ê. 9 ge̍h 2 hō beh tuì Ka-ná-tāi chhut-hoat.

1. Lê ko͘-niû (Miss Claxie) tī 9 ge̍h beh tńg-lâi.

(B)

Tang-sì-kak Káng-gī-só͘

  Tang-sì-kak sī tuì Hong-goân ji̍p soaⁿ, Tāi-kah khoe pak-pêng khoe-piⁿ. Só͘-chāi put-chí-toā, ū siat Kūn tī-hia, iā ū Kong-ha̍k-hāu, Sió-ha̍k-hāu, Lú-chú Kong ha̍k-hāu, Iù-tī-oân, téng. Koh ū thiaⁿ-kìⁿ kóng, tī-hia ê toē-hng, siū tiong-téng í-siōng ê kàu-io̍k--ê, ū 200 goā lâng. án-ni thang chai hit ê só͘-chāi sui-sī kūn-soaⁿ, iáu-kú bûn-hoà put-chí hoat-ta̍t; chóng-sī iáu khiàm chi̍t-hāng, chiū-sī Chong-kàu.

  Kin-nî pak-pō͘ ê Thân(Thoân)-tō-kio̍k ū gī-tiāⁿ tio̍h khai-siat Káng-gī-só͘ tī-hia, soà phài Chng Sè-kó͘ Thoân-tō; hiān-sî teh chún-pī ta̍k-hāng. Chiân-ji̍t goá ū khì siat-hoat sè-chhù ji̍p-pín, sūn ki-hoē soà thàm Kūn-siù, Sū-bū khò-tiúⁿ, Kéng-chhat khò-tiúⁿ, Chng-tiúⁿ, Hia̍p-gī-oân, téng. Koh tit-tio̍h chi̍t-uī siong-ti ê pêng-iú Chiam Lân-têng sian-siⁿ, i tuì I-ha̍k-hāu chhut-sin, tī Tāi-pak hōng-chit ê sî, bat tiàm tī Báng-kah pài-tn̂g, iā siông-siông lé-pài thiaⁿ tō-lí, chit-tia̍p sui-jiân iáu-bē kong-jīn choè Ki-tok-tô͘, iáu-kú i ū put-chí chàn-sêng Ki-tok-kàu. Chit-pái put-chí tit-tio̍h i ê pang-chān, tàu siat-hoat ta̍k-hāng. ǹg-bāng bô kú oē tit-tio̍h Tāi-tiong chiu ê hú-khó, chiū thang pò͘ kàu khai-sí.

  Chhiáⁿ khoàⁿ-pò ê hiaⁿ-chí tì-ì thoè chit ê sin-siat ê só͘-chāi kî-tó, ǹg-bāng Chú ê tō-lí oē toā kóng pò tī hit ê toē-hng.

(C)

Sin-tiàm hoē-tn̂g kià-hù-kim.

Sin-chng kàu-hoē ia̍h chin tông-chêng thiaⁿ-tio̍h Sin-tiàm ê chhám-chêng sui-jiân in ka-kī ài khí pài-tn̂g teh chún-pī, ia̍h hoaⁿ-hí chàn-sêng kià-hù, ia̍h Suī-hong kàu-hoē siat bô kuí-nî pang-chān pa̍t-lâng ê sū chin chhut-la̍t, ū chit-hāng chin kî-koài, chiū sī só͘-toê ê gûn lóng hiān-kau bô khiàm, thiaⁿ in ê thoân-tō teh kóng, nā ta̍k-pái toê-iân lóng án-ni, che si̍t-chāi thang choè ta̍k-uī kàu-hoē ê bô͘-iūⁿ.

Sin-chng kàu-hoē

Kiōng ￥ 50.00 lāi-e̍k,

Kiōng ￥ 147.00

Tiong-o̍h

Glee Club Hóng-būn

Tông-chì-siā

   Tī 55 nî chêng, chiū-sī 1871 nî, chhiu-thiⁿ ê chi̍t chá-khí, ū chi̍t-chiah chûn kiò-choè "America" ji̍p Kang-hō͘ (江戶) oan－chiū-sī hiān-sî ê Tang-kiaⁿ-oan－. Chûn lāi ū 2 uī, Tang-iûⁿ éng-oán bô boē kì-tit ê uí-jîn tī-teh, －Chi̍t-ê chiū-sī Tông-chì-siā ê khai-chó͘ Davi Phok-sū koh, chi̍t ê, bô pa̍t lâng, chiū-sī lán Tiong-o̍h ê sí-chó͘ Má-kai Phok-sū.

  Lán Tiong-o̍h kap Tông-chì-siā ū bi̍t-chiap ê koan-hē tī-teh ê in-toaⁿ, lán thang chai, m̄-nā kan-ta pîⁿ-pîⁿ sī tuì tī Ki-tok-kàu ê chú-gī lâi siat-li̍p ê ha̍k-hāu; á-sī Tiong-o̍h ê kàu-oân kuí nā-uī sī Tông-chì-siā ê chhut-sin-chiá; he̍k-sī ū choē-choē chia ê ha̍k-seng khì ji̍p Tông-chì-siā ê iân-kò͘; iā thang chai lióng-hāu tuì bē khai-siat í-chêng, chiū ū chhim-chhim ê in-iân tī-teh.

  Só͘-í choè hō͘-poè ê lâng eng-kai tio̍h chhut-la̍t î-chhî chi̍t ê koan-hē, hō͘ chit ê koan-hē it-hoat chhin-bit it-hoat kian-kò͘; thang thé-hê, lâi uī tio̍h Pún-kok, thian-kok chīn in ê sú-bēng. Glee-club (im-ga̍k-thôn) chêng-nî bat khì Gî-lân í-kip Lâm-pō͘ ián-chàu lú-hêng só͘ keng-kè sêng-chek put-chí-hó. Chai Gē-su̍t ê la̍t iông-ha̍p lâng ê sim sī toā, hit-tia̍p khí chiū khǹg hit-khoán ê ǹg-bāng ài lí hong chit ê la̍t lâi chīn só͘ teh bì liōng ê lí-sióng.

  Taⁿ í-keng chiâⁿ. Glee club ū koat-tēng tī 7 ge̍h 1 hō beh khí-sin, kiâⁿ chhin-bit ê tē-it-pō͘; in-uī í-keng ū tit-tio̍h 2 uī ê kàu-siū kap chi̍t-uī pún-hāu ê chut-gia̍p seng Ông Siú-ióng kun ê chàn-sêng kap Sêng-lo̍k, iā hoaⁿ-hí tàu chīn-la̍t. Toā-toā kā in kám-siā.

  ǹg-bāng chit-pái bô sit lo̍h hó-ê ki-hoē, kó-jiân oē tit só͘ chhin-bōng ê kiat-kó.

Tân Chheng-tiong.