Lâi-khoàⁿ.
Tī Iok-hān it chiuⁿ 46 chat. Ū kì-chài chit 2 jī. Chiū-sī Hui-le̍k kiò Ná-tàn-gia̍p lâi khoàⁿ Iâ-so͘, tng-sî Chú Iâ-so͘ tī Sè-kan, ū kéng-tiàu lâng lâi choè i ha̍k-seng, tāi-seng ū kéng-tiàu An-tek-lia̍t, Pí-tek, Hui-le̍k, iā Hui-le̍k siū kéng-tiàu liáu-āu, chiū soà chio i ê pêng-iú Ná-tàn-gia̍p, chóng-sī Ná-tàn-gia̍p m̄ sìn, giâu-gî kóng Ná-sat-le̍k sī phí-iá ê só͘-chāi, thài oē chhut Sèng-tek ê lâng. Hui-le̍k bô ài kap i piān-pok, iā bô sím-mi̍h chèng-kù hō͘ i. Kan-ta kā i kóng, lâi-khoàⁿ, án-ni nā-tiāⁿ, kóng chit-kù put-chí ū ì-sù, hō͘ lán thang bat kuí-nā hāng; pâi-lia̍t tī ē-toé.
1. Hui-le̍k kóng chit-kù, chin hó hoat-tō͘.
Lâng tī giâu-gî boē-bêng ê sî, ēng kóng ê, khah oh liáu-kái, tio̍h ēng khoàⁿ khah khoài bêng-pe̍k. Phí-jū kā lâng kóng Hui-hêng-ki, oa̍h-tōng-siá-chin, Thok-im-khì, lâng thiaⁿ-liáu chin oh bêng, nā kiò i lâi khoàⁿ, suî-sî oē liáu-kái.
Hui-le̍k kā Ná-tàn-gia̍p kóng. Kó͘-chá ê Sian-ti kap Mô͘-se só͘ kóng ê Ki-tok, goá í-keng khoàⁿ-kìⁿ i. Ná-tàn-gia̍p boē bêng-pe̍k, kàu khoàⁿ-kìⁿ, chiah bêng-pe̍k, lán ū-sî chio lâng lâi lé-pài in boē bêng-pe̍k lé-pài sī sím-mi̍h khoán, nā chio in lâi khoàⁿ suî-sî oē liáu-kái. Só͘-í ēng khoàⁿ ê sī chin hó hoat-tō͘.
2. Hui-le̍k kóng chit kù, chin ū tō͘-liōng.
I m̄-nā ka-kī tit-tio̍h. Koh pò pa̍t lâng, i ka-kī tú-tio̍h Ki-tok, lâi tè i, iā ài i ê pêng-iú soà lâi tè i. Chit ê bô͘-iūⁿ, bān-sè-tāi ê Ki-tok-tô͘ tio̍h o̍h i, lán m̄ thang siūⁿ ka-kī nā tit-tio̍h kiù chiū hó, tio̍h koh kiù pat-lâng, chiū-sī tio̍h chio pa̍t lâng lâi thiaⁿ, lâi sìn, tâng choè Ki-tok-tô͘, tâng-kiâⁿ thiⁿ-lō͘.
3. Hui-le̍k kóng chit kù, chin ū hāu-kó.
Hō͘ i ê pêng-iú Ná-tàn-gia̍p chiâⁿ-choè Chú ê ha̍k-seng, suî-sî jīn Ki-tok si̍t-chāi sī Siōng-tè ê Kiáⁿ. Í-sek-lia̍t ông, suî-sî pài i choè Sian-siⁿ.
Lán tio̍h o̍h Hui-le̍k ê bô͘-iūⁿ, chīn-la̍t chio lâng lâi choè lé-pài thiaⁿ tō-lí, gián-kiù Ki-tok ê sū, chiū oē hō͘ lâng jīn Ki-tok choè Kiù chú, lâi chiâⁿ-choè Ki-tok-tô͘. Goān lán tāi-ke, tì-ì lâi o̍h Hui-le̍k ê bô͘-iūⁿ, siông-siông kiò lâng lâi khoàⁿ Iâ-so͘.
