首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 著怎樣來受聖神
著怎樣來受聖神 影像(4)
卷期：第 6 號 本次： 日期：1926/7 刊名：芥菜子 頁數：2-5
篇名：著怎樣來受聖神 [ Tio̍h cháiⁿ-iūⁿ lâi siū Sèng Sîn ]
作者：陳清忠 Tân Chheng-tiong
  顯示 : 漢羅 全羅 並列  

著怎樣來受聖神？

 I       上帝約束欲予人。上帝是靈，是人格；上帝是hùn出的思想。所以著顯現佇伊本身以外。彼个就是默示，就是天的啟示。若是按呢伊怎樣來發表？是用雷tân？抑是用野獸？毋是。上帝用人將伊的喙來顯出。伊揀第一聖，第一溫純的人做器具來指示伊的所想，伊的熱情，伊的計畫佮將來所欲生起的事。

先知就是伊的器具，伊的通譯；所講kan-ta上帝nā-tiāⁿ。伊佇以西結(36章有約束欲用清的水hiù--咱）：－ 「用清水hiù恁，予恁成清氣，見若拜偶像，行污穢的代誌，攏總洗除去。」以賽亞35章有用真媠的話講出：－ 「曠野無水的所在欲put-íⁿ，親像山chû-ko，的確有歡喜唱歌的聲；這裡的土產真在昌盛，比黎巴嫩，迦蜜，Sa-lûn閣較昌盛；... ... ... ...曠野的大，水泉流出來。」約ní 2章有講：－ 「末日，我欲將我的神賞賜萬人予恁的後生，查某囝講未來的代誌，少年人看見各樣的形象，老人夢見夢。當彼日我欲將我的神賞賜奴僕女婢............」

到新約的時代，佇約旦河行洗禮的約翰代先開嘴：－ 「我看見聖神親像鴿仔降臨佇伊的頂面。」「恁teh欲看見聖神降臨佇人的頂面，這就是受聖神洗禮的人。」耶穌本身也有講：－約翰用水行洗禮，我teh欲用聖神行洗禮，予恁。」

到五旬節，這个預言果然應驗，成伊的約束。聖神親像火燄降臨，佇in 的頂面。佇五旬節，聖神的降臨，對有人類以來，算是一个驚天動地的大事世界的歷史，人類的運命；為按呢有一變。對彼tia̍p著到今，聖神有常常佇濟濟所在來降臨。Kiám-chhái有人想，彼款的事是屬佇過去事，將來袂得通閣拄著。總是毋是按呢，讖語猶未完成。人類猶攏袂得著清氣。五旬節的事，甚物人共伊限定是過去的事？約耳的預言佇世末欲閣一擺照文字所講按呢來應驗。

II      聖神的賞賜。

聖神平平是一个，總是所賞賜，人人無siâng款。有的成信仰的形，有的成智慧的話，有的醫治，有的講未來的事。上帝用啥物目的欲將聖神賞賜咱？

1、  欲予人佮伊親像，通得著上帝的形象，上帝的性質，來成新的人。

2、  為著欲宣傳福音。通傳福音佇萬民的面前。若得著聖神的傾注，的確袂得著效果。

3、  為著欲建設教會的德行。雖罔反悔罪來得著福音的基督徒，若毋是有得著聖神充滿的牧師，傳教者來培養，的確袂得著成長。

III    聖神內在

聖神毋但 kan-ta是對外部的感化，也有踮佇信者個人的中間。神者逐人的確著做聖神的殿才會用得。「敢毋知恁是上帝的殿，上帝的神踮佇恁內面mah？」「所交託你的好事，你著倚靠踮佇咱的聖神來顧守伊。」「獨獨上帝的神若徛起佇恁，就恁無踮佇肉體，是踮佇神；無有基督的神的，毋是伊的人。」

聖神的人格是活--的，所以會離開，會拄著搶提。為著驕傲佮怠慢的結果，雖罔聖神捌踮的所在，也會變做空虛的場所。亞拿尼亞佮撒非拉有試聖神。無信仰會予聖神憂慮，會消無聖神，會逆聖神。到尾拍lâ-sâm聖神，致到做永遠滅亡的囝。實在真通驚...... 「侮慢施恩的聖神，你想彼號人應該受的刑罰著加偌重 ah？！」

IV    受聖神的準備。

著怎樣，也著啥物時陣，佇啥物款的人，聖神欲臨到？欲受聖神的祕訣是啥物？

1、  神復活上天的主，來服侍伊，佮伊交陪。請看彼得的說教。五旬節的說教，無僥疑是大的說教。以後的說教，聽眾得著聖神的時，無論佗一擺，攏是主講的復活，主的上天，主的閣來，審判的主，活的基督。若是論起伊的人格，教訓的教會，抑是個人；毋捌聽見得著聖神的例。佇使徒行傳第 10章所記，佇哥尼流的厝的聚會，彼得講啥物話，怎樣所聽的人攏得著聖神？主的十字架佮伊的復活nā-tiāⁿ mah？講：「人人召伊佇柴裡來thâi死，上帝3日予伊復活紲出現，毋是予眾百姓看，是予上帝代先所揀選，為著伊做干證的人看，就是阮遮个，佇伊對死人中復活的了後佮伊相佮lim食的人。伊閣命令阮傳予百姓，干證這个是上帝所入定做活人死人的審判司。」以上所傳單純的說教，到底有得著啥物結果？看44節，－ 「彼得iáu-kú teh講遮个話的時，聖神降臨佇見若聽道理的人。奉割禮的信徒，佮彼得saⁿ-kap來的，因為聖神的賞賜也降落佇外邦人，就攏奇怪。」

看見主的使徒ah，恁真有福氣，真通欣羨！初代的基督徒ah，恁有福氣，因為恁有受著聖神的灌ak。因為實在有得著人最大的特權lah！！

主共多馬講，「你看見才信，無看見也信的人有福氣！

現代咱無彼款的特權通看見主的肉體，也袂得通拜復活的主上天。總是大家攏免失望。因為主講，「無看見來信的人較有福氣。」是！咱若使 kan-ta信就會得著較贏的特權佮福氣。Ah，實在通歡喜。信活的主，佇伊的面前逐日來歡喜的人，無僥疑teh欲得著聖神親像雨水，親像油來潤澤咱的心。

2、  祈禱無煞。專心祈禱。日日悔改來綴主，就會得著聖神。

V     受聖神的記號。

聖神常常比並做風，做人的氣。「講按呢用氣共伊歕。」「著受聖神。」Kan-ta復活的主欲用氣歕，將聖神予咱。這毋是教會所會學得的所在，是因為全然有佮耶穌的人格袂相分離的關係佇teh 的因端。

VI    受聖神的結果。

1、  人格的根本欲變換。受聖神，軟弱的信者會成做真勇健的人。較贏迫害。大聲來講。曉悟真理歡喜滿滿。

2、  愛讀聖書。祈禱的火ná著；

3、  生起傳道的心。無論啥物人無傳福音會擋袂牢。

4、  奇蹟、異能會出現，歹鬼會走出，病痛會好。親像按呢主teh欲漸漸加添得著拯救的人。
 
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461