用血成就和平
歌羅西1：20
保羅講和平的工已經成了。佇遮伊毋是愛干證人佮上帝和的事，就是愛報咱知成和平是用啥物法度。這句和平就是親像朋友為著事拍歹感情紲無往來，咱牽in 的手予in相牽，怨恨煞，朋友情閣生起。今上帝無要緊人的陷落罪，伊歡喜將伊十字架的血做和平的法度。咱通想兩項：
1、 怎樣上帝歡喜用伊的囝的血佮死來成就和平。
2、 怎樣用十字架的死。
3、 怎樣上帝歡喜將伊的囝的血佮死來成和平。這款的法度tú-tú是合佇上帝的心肝。伊是慈悲的上帝，也是公義的上帝。伊照公義治理天下。人已經陷落罪，今愛成和平的事，無比用伊的囝的血佮死閣較好較合的法度。所以伊歡喜將完全的替永遠死的來死。伊無揀世間人替眾人是因為人袂會，獨獨基督會 nā-tiāⁿ。
基督的死來贖回人，咱通想幾若項來干證是第一合的法度。向望幫贊咱的得救。
(1) 對基督的死人通揣著上帝無限量的疼痛。人的得救無比揣著上帝的疼較要緊的，因為若毋知上帝的疼的，伊也袂知得救的意思。所以對基督的死咱通揣出上帝的疼痛。約翰講，「上帝差獨生的囝入世間，予咱對伊來活，上帝的疼對這个顯明佇咱」。今咱捌上帝的疼咱到按呢，咱也著疼上帝，因為無人愛做忘恩背義的人。
(2) 對基督的死咱才會閃避罪惡。有兩个兄弟仔，小弟常常違逆做錯誤，受拍一日幾若擺攏袂改變，伊的老母想真無法度。這日伊的兄看見伊不止痛疼的款就對伊的老母講，我愛替小弟予你拍，伊的老母chiaⁿ實 共伊拍真thiám，伊的小弟徛佇遠遠teh看。對彼tia̍p 起伊毋敢閣違逆。所以對基督的死予咱毋敢閣親近罪惡，獨獨用心tī-hông，驚了犯罪。若是iáu-kú teh犯罪毋tī-hông 的就是將基督的血囥佇土跤底，閣將上帝所賞賜咱「活命的契約」囥佇土跤踏。
(3) 對基督的死有留濟濟好模樣予咱通學。親像義、謙遜、順趁、吞忍、敬虔的人看見基督的死伊也歡喜為著義來受苦。做大將若歡喜lim伊的苦杯，做兵無毋lim。基督為著咱lim這个苦杯實在無毋是第一好的法度，予咱會出力疼上帝向義這面來出力，向罪惡這面大怨恨。
II、怎樣用十字架的死。保羅有講「khut 家己順服到佇死；甚至死佇十字架」。對基督這款的死，咱毋但愛同情nā-tiāⁿ，猶原愛予咱的信堅固。
(1) 對這款的死來除去咒詛。始祖對樹來犯罪受咒詛，上帝予基督擔當咱所著擔當的咒詛，予咱得著‘自由'所以上帝予伊拄著這款見笑的死。保羅佇加拉太3：13講「基督已經贖回咱脫離律法的咒詛，因為伊為著咱成做咒詛，因為有記載講，見若召佇柴裡的受咒詛」。
(2) 這款十字架的死是用舊約所關照、獻祭。基督未燒的代先著khoà懸佇柴頂。閣銅蛇佇柱仔頂，親像耶穌本身講，親像摩西舉起銅蛇佇曠野裡，人子也欲受舉起。我若受舉起，濟濟人欲向佇我。
(3) 對這款的死，敬虔的人知為著義來死毋是見笑，也毋是通驚惶。耶穌死，學生的驚惶也紲死，無驚見笑，無死的阻擋，直直為著福音到佇柴頂。有這款的阻擋的人著相saⁿ-kap看耶穌十字架的死。
著信，無通僥疑，上帝所用的法度是第一好，第一合，第一完全。 |
