著全家拜上帝
咱人踮佇這世間，家內的人數不論濟少，要緊著同心敬拜全能的上帝，做咱的天爸；這个是真要緊的事。可惜現今佇咱教會的中間，有濟濟的，猶未全家拜上帝，致到家內的信仰無相同，常常顯出tōng-tu̍t，大欠缺平安，來失落福氣。若會全家敬拜上帝，信仰相同，行siâng條的路，就真有平安，真有福氣。
這tia̍p愛引幾若个古早的信徒，有全家拜上帝，來做咱的模樣：
1、 Lū-tí-a。這个婦人人有全家拜上帝，伊是Chhui-ngá chhui-lat城的人teh做chi-sek-pò͘ 的生理，平素有拜上帝，信道理；主開啟伊的心，予伊全向保羅所講，全家領受洗禮；求保羅講，「若是看我做信主，就著入我的厝」。這个婦人人是歐羅巴洲頭一个信主--的。這家真有福氣，因為有全家拜上帝。
2、 ga̍k-lī。就是顧監的人，也有全家拜上帝。保羅佮西拉因為傳主的道理拄著關監。到半暝2人祈禱吟詩，忽然地大振動，監門家己開，刑具家己落。顧監--的看見監門開，拍算犯人的確逃走，puih 刀愛自殺，保羅大聲叫講，毋通家己傷害，阮遮个攏佇teh。顧監--的真驚仆佇保羅西拉的面前，問講著怎樣做，才會得著救，隨時用主的道理教示--in，後來in全家有領洗禮；真歡喜，真福氣。
3、 Kek-lí-sū-pò͘。是管會堂的人，也全家拜上帝。保羅佇哥林多傳道理，干證耶穌做基督，猶太人對敵--伊。保羅就離開--in，入拜上帝的人Iû-sū-to͘ 的厝，伊的隔壁是會堂，是Kek-lí-sū-pò͘ teh管理，伊有全家信主。哥林多的人聽見道理，信來受洗禮的也真濟。
4、 Sū-thê-hoán。是初代的執事，有全家拜上帝，真熱心，好膽干證道理，拄著患難攏無驚。保羅捌對哥林多的信徒講，伊有行洗禮予 Sū-thê-hoán家內的人。按呢通知伊佮家內的人攏有拜上帝真福氣。
5、 Ko-nî-liû。是武官，也有全家拜上帝。彼得奉聖神的命令，佮六个兄弟相佮去Ko-nî-liû的厝，用得救的道理，共伊家內的人講；後來全家有領受洗禮。眾人聽見這个，歸榮光上帝。
今咱大家著學以上遮个人的模樣，全家敬拜上帝，就會得著家庭的福祿；也將來通相佮徛起佇咱的爸的國。 |
