首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督教佮佛教的研究
基督教佮佛教的研究 影像(4)
卷期：第 7 號 本次： 日期：1926/8 刊名：芥菜子 頁數：3-6
篇名：基督教佮佛教的研究 [ Ki-tok-kàu kap Hu̍t-kàu ê gián-kiù ]
作者：陳清義 Tân Chheng-gī
  顯示 : 漢羅 全羅 並列  

基督教佮佛教的研究

       世間的宗教，毋但一款，派別真濟，照學者所研究，聚集歸類，通講有3大類。

I. 蠻族tek宗教。

II. 一國 tek宗教。

III. 世界tek宗教。

       啥物號做蠻族tek宗教？就是親像火教，多神教。

       啥物號做一國tek宗教？就是親像希臘教，道教。也啥物號做世界tek宗教？就是基督教、佛教、回回教這款。

       今這三个教，雖然平平稱做世界tek宗教，總是無攏總有救世主義的宗旨佇teh。回回教佇台灣無，毋免講，kan-ta將基督教佮佛教來講：

       照咱所知基督教是救世主義的宗教，佛教是厭世主義的宗教。今將2教來研究幾若款，排列佇下底：－

(1)    論兩教的發源地。基督教的發源地佇猶太國，佛教的發源地佇印度國。國雖然無相同，總是洲相同，平平佇亞西亞洲的內面。人teh講基督教是外夷的教，殊不知佛教也是外夷的教。

(2)    論兩教的教主。佛教的教主是釋迦，閣名，如來，又名釋迦牟尼，是印度摩迦陀國淨飯王的太子，伊19歲出家。論伊出世的日，照查考無相同；有人講是周宗王在位第 9年，有人講是周昭王在位第 24年，攏無相同。論伊的死日，有一說講是代先耶穌2426年，有一說講是代先耶穌370年；按呢精差2056年，真正通予人奇怪；總是照現今一般的學者所講，大概是代先耶穌500年，總是袂得通講是確實。基督教的教主就是基督，閣名耶穌，抑是講耶穌基督，就是上帝獨生的囝，降落世間做人，有神、人兩性。伊30 歲出來傳道，無精差。論伊出世的日，就是1926前，羅馬皇帝該撒亞古士督，佮猶太王希律的時代，無精差。論伊死的日，就是佇1926年前落來33年，拄著釘佇十字架，佇猶太總督彼拉多的時代，無精差。

       論釋迦出世的所在佮死的所在；有人講伊是佇Kiau-sat-lô͘國的迦毗羅城出世，有人講是佇錫蘭島，攏無相同。死的所在，有人講是佇Khu-si城附近的波羅樹園，有人講佇siang樹下，也攏無相同。基督出世的所在是佇猶太國的伯利恆啥，通決斷講；死的所在佇耶路撒冷的郊外各各他，也通決斷講。

       論這2个死了後的狀況怎樣？釋迦死了後就煞，永無閣看見；基督死了後3 日閣活40日上天，濟濟人看見通做干證。

(3)    論兩教的服事神。

       佛教有服事神抑無？照研究無。德國有一个研究佛教的出名人，伊的名Koppen，有講佛教袂有無死無終的神；閣一个名Miier也講佛教毋認有造萬物--的，也毋認有自然而有--的。閣照佛經有記載講，「神佮人的中間，我猶未看見有我應該拜--的」。(神人之間吾未見有吾所當拜者)閣再講 「天頂地下獨獨我第一尊貴」。(天上地下惟我獨尊)按呢通知佛教毋信天頂有一个真神。現今的佛教有改良，紲講in猶原有服事神，我捌聽見一个出名的本島和尚講，in所服事的神號做無極太祖。

       基督教有服事神抑無？有！服事啥物神？獨一真的神，宇宙萬物的大主宰，世界人類的大老爸。

(4)    論兩教的道理。

       佛教的道理，予人oh明，in講in 的法門有八萬四千，人袂得通隨便知影。無奇怪，因為in 的教理有包含真濟種，別的宗教無親像按呢。雖罔佛教的專門家，也袂得通知到徹底。伊的經典是對伊的學生假託佛的喙來做，所以其中無實的話真濟。親像講，「如來升 33天」。這个是屬佇無影的話。

       基督教的教理，只有基督復臨，佮世界末日的預言，這款的教理真深，欲詳細分拆，對古早以來的神學者，也oh明白。除去這款以外，基督教的教理，通明白透徹；因為基督濟濟用譬喻，用平常的話，雖罔無學問的人也通得著了解。伊的經典有66本，就是對天傳授，對神的啟示。彼得講「聖經代先講的話，毋是人所會曉講，因為古早代先講的話，本毋是量約的話，是上帝的聖人受聖神感動來講」。

(5)    論兩教的戒律。佛教的戒律有10條：

1、  毋通thâi活物  勿殺生

2、  毋通講白賊  勿謊言

3、  毋通偷提  勿竊取

4、  毋通淫慾  勿淫慾

5、  毋通lim酒  勿飲酒

6、  著守齋期  守齋期

7、  毋通插花  不可插花

8、  毋通睏懸大的眠床  勿睡高大之牀

9、  毋通聽樂器  不可聽樂器

10、毋通用金銀  不可用金銀

基督教的戒律也有10條；

1、  上帝以外無別的上帝。  上帝以外無別有上帝

2、  毋通雕刻偶像  勿雕刻偶像

3、  毋通lām-sám稱呼上帝的名。  勿妄稱上帝之名

4、  著守安息日  宜守安息日

5、  敬你的父母  敬爾父母

6、  毋通thâi人  毋殺人

7、  毋通行姦淫  毋行淫

8、  毋通偷提  毋攘竊

9、  毋通lâm-sám干證  勿妄証

10、毋通貪人厝宅   毋貪人宅地

將兩爿的戒律來研究，佛教無教示人拜神，也無教示人孝敬爸母。

(6)    論兩教得救的路。

  佛教得救，的路是講人得救著遵守八道：－

1、  真信

2、  真言

3、  真志

4、  真行

5、  真度日

6、  真勉勵

7、  真記心

8、  真默念

以上遮的八道就是佛教得救的門予：攏是對功勞來成。伊所講這个真信，就是信有四諦。

1、  信凡若有活命的的確著受苦。

2、  信苦是對慾來聚集。

3、  信慾是對苦來滅無。

4、  信愛寡慾，著行八道。

       閣再伊所講這个真志，就是講著立志出家。也講真度日，就是講有通食就好，毋通殺生。

       論基督教得救的路，是往人愛得著救，著信和耶穌。聖冊講若喙認耶穌做主，心信上帝予伊閣活，就通得著救；閣講凡若求叫主的名--的，攏通得著救；閣講放sak這个，無捌个救主，因為天下人間無閣賞賜別的名通予人得著救。這个就是基督教得救的門戶；攏是對信來成。

(7)    論兩教的發展地。佛教的發展地佇印度、緬甸、中國，高麗、日本。近來新   聞teh講佛教有發展到美國、德國，這不過是起一半間廟佇遐予人參考ná-tiāⁿ；若是美國加州，佛教佇遐無奇怪，因為內地人佇遐真濟。基督教的發展地，毋免講逐人知影，已經到通世間、大洲、海嶼、群島，較濟攏有到，通看咱所踮這个台灣是細細的海嶼，iáu-kú道理到遮已經60外年久lah！

(8)    論兩教的結局評。

    佛教是憂、悲、自制，的教，是悲觀主義，菲生滅慾；伊所求是滅無。基督教是快樂希望的教，是樂觀主義；伊所求是活命。

    對按呢來看，佛教佮基督教雖然平平是世界tek 的宗教，iáu-kú佮基督教袂比--得。

    基督教有過去、現在，未來的論理。佛教只有過去，未來nā-tiāⁿ。所以in不止掛慮，佇內地常常招基督教佮in聯合，總是基督教毋。近來in有對基督教學不止濟項去，－親像日曜學校、說教、婦人會、青年會、讚美歌等；遮个毋是佛教本然有--的。現時in不止出力teh鼓舞in 的教佇台灣，所以愛寫淡薄予大家小可了解這兩教所無相同的所在，因為常常捌聽見佛教的和尚 teh講，「大家是siâng款無choa̍h；恁基督教是教人拜上帝阮佛教是教人拜無極太祖平平是相同；恁對這个門入阮對彼个門入，結局是平平到位」。若小可研究就知是無siâng條路，相離不止遠。
 
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461