PE̍H-HIĀ Ê SIĀ-HOĒ
Lâng só͘ chai tī tōng-bu̍t tiong keng-êng siā-hoē seng-oa̍h ê khun-thiông ū 3 chéng-luī. Chiū-sī káu-hiā, phang kap pe̍h-hiā. Lūn in ê siā-hoē, ū saⁿ-tâng ê só͘-chāi－ū kang-thâng, bú-thâng, kap choè kang ê thâng. Nā-sī káu-hiā kap pe̍h-hiā, choè kang ê thâng phó͘-thong (誤植phó͘-tong) ū hun nn̄g-khoán－pêng-siông choè kang ê thâu kap choè peng--ê. Koh-khah hok-cha̍p ê chéng-luī ū nn̄g-saⁿ khoán ê choè peng ê thâng－ū ê kò͘-siú m̄-bián hō͘ tuì-te̍k lâi chhim-ji̍p, ū ê khì kong-kek tuì-te̍k.
Chit 3 khoán ê tiong-kan, siā-hoē seng-oa̍h choè hoat-ta̍t--ê chiū-sī pe̍h-hiā. I ê siū lāi chiàu chéng-luī ū bô saⁿ-tâng. It-poaⁿ tāi-seng chi̍t-tuì ông kap lú-ông tiàm choè-hoé, ka-kī chiām-chiām sêng-tióng; í-goā iáu ū in ê soè-soè choè kang ê thâng kap choè peng ê thâng-á kiáⁿ tī-teh. Choè kang ê thâng siⁿ-choè siâng-khoán, nā-sī choè peng ê thâng i ê gê-chô sī tn̂g koh toā. Gê-chô khí khah toā ê sī tî-hông (誤植ti-hông), kap phah tuì-te̍k ê chit-bū; khah soè--ê sī tiàm tī siū-lāi kiâⁿ -khì kàm-tok choè kang ê thâng choè kang. Choè peng ê thâng ū chi̍t-khoán thâu khak-téng ū chi̍t-ki chin tn̂g ê khì-khū, nā tú-tio̍h tuì-te̍k ê sî chiū peh (誤植pe̍h) khí i ê seng-khu-téng lâi chha̍k i ê phê-hu hō͘ i kan-khó͘. Koh-chài pe̍h-hiā siū-lāi, kang-bú thâng choè kang ê thâng, choè peng--ê í-goā ū koh chi̍t-khoán hoat-si̍t ê, miâ kiò toā chuí hiā－ū 2 chéng-luī: chi̍t-chéng si̍t khah tn̂g, seng-si̍t (誤植seng-sio̍k) khì-khū bô hoat-ta̍t miâ hù-seng sio̍k thâng, koh chi̍t-chéng si̍t khah té, seng-si̍t (誤植seng-sio̍k) khì-khū ū khah hoat-ta̍t miâ seng-sio̍k thâng. Chit nn̄g-khoán ê thâng pêng-sî tī siū-lāi lóng bô choè sím-mi̍h kang. Nā-sī siū-lāi lú ông á-sī ông uī-tio̍h chióng-chióng ê goân-in, he̍k sī sí-sit ê sî, in chiū liâm-piⁿ ki-koan ta̍k-uī hoat-ta̍t lâi téng-kheh; thang kóng in sī ông kap lú-ông hāu pó͘-chiá. Nā kàu chit ê sî toā-chuí hiā pe chhut-khang lâi iû uî-tēng kha oán-jiân chiâⁿ chit ê hûn-bū, chin chòng-koan. Lūn toā-chuí hiā pe-chhut khang bô tú-tú sī choè toā chuí ê tiāu-thâu. Phang kap káu-hiā ê kang-bú nā chhut-siū sī uī-tio̍h (誤植uî-tio̍h) seng-si̍t (誤植seng-sio̍k) ê in-toaⁿ, nā-sī toā chuí hiā seng-si̍t (誤植seng sio̍k) ki-lêng sǹg sī bô hoat-ta̍t ê thâng, in ê chhut-siū iā bô tú-tú sī án-ni; thang kóng sī iáu m̄ chai iáⁿ ê sî-tāi. Toā chuí-hiā nā pe chhut-lâi bô kú i ê si̍t chiū phah tn̄g kàu si̍t-kó͘, hit-sî boē koh-chài pe tī khong-tiong; āu-lâi kang-bú sio-chhē, bú--ê choè thâu, kang--ê choè āu-bīn nǹg-ji̍p tī tek-tiong ê khang hia̍p-le̍k choh-siū. Siū ê toā-soè, khoán-sit (誤植khoán-si̍t) chiàu chéng-luī bô sio-tâng; chóng-sī khí-thâu chiah choh ê siū lóng sī soè-soè. Lú-ông siⁿ nn̄g kap ông lâi chiàu-kò͘ chia̍h mi̍h iā sī ka-kī chhē; kàu āu-lâi choè kang ê thâng nā chhut-sì kàu chiâⁿ thâng ê sî, ū ê (誤植ē) tio̍h choh-siū, ū ê tio̍h chiàu-kò͘ thâng-kiáⁿ, ū ê khì chhē chia̍h-mi̍h. Tuì án-ni ông kap lú-ông, chē-teh chia̍h lâi siⁿ-thoàⁿ nā-tiāⁿ. Chiàu án-ni lâi khoàⁿ chi̍t ê siū lāi ū ông, lú-ông, toā chuí-hiā, choh-kang ê thâng kap choè peng (誤植pêng) ê thâng; kî-tiong choè kang ê thâng sǹg sī siōng-choē.
Siū ū ê sī chin toā, tī Ò-chiu (誤植Gô͘-chiu) ū chit-uī miâ Queen Land, tī hia oē thang khoàⁿ choē-choē chin koân ê siū,－ū ê 3 tn̄g-koân, khoah, kāu iā sī siong-tong; tio̍h ēng-kuí-nā lia̍p ê pōng-chí chiah oē phah-hoāi. Siū só͘ ēng ê châi-liāu sī chhâ kap thô͘. Siōng ū chhù-sū ê siū, tī tiong-ng ū lú-ông-sek, piah put-chí kāu, chiu uî ū khûn nn̄g-saⁿ têng ê pū-hoà-sek, tī hia thang toé nn̄g kap siōng-soè ê thâng-á-kiáⁿ. Koh chi̍t-têng chiū-sī tiàm-pâng iā sī chèng-choh pâng, thang toé khah-toā ê thâng á-kiáⁿ, toā-chuí-hiā iā thang chèng-choh ko͘-luī (hiuⁿ-ko͘ (誤植hiuⁿ-kò͘), siông-liông, bo̍k-ní) choè tang-thiⁿ ê niû-chháu. Koh khah goā-uî iā ū nn̄g saⁿ-têng. Lūn pâng-keng ê uī-tì, khoán-sit (誤植khoán-si̍t) sī chin choē khoán.
Siū-lāi só͘-tiàm ta̍k-chéng ê pe̍h-hiā lóng hun-gia̍p choè kang, in ê siā-hoē put-chí chéng-tùn. Chhin-chhiūⁿ ông-sek ê lāi-bīn, lú-ông kap ông ê chiu-uî ū peng-thâng teh pó-hō͘, choè kang ê thâng chài chia̍h-mi̍h lâi iúⁿ-chhī ông kap lú-ông, iā sàu-tû ông kap lú-ông seng-khu ê lâ-sâm, ūn-poaⁿ lú-ông só͘-siⁿ ê nn̄g khì hu-hoà-sek (誤植hù-hoà-sek), tī hia ū ê pâi-nn̄g tī tek-tiong ê só͘-chāi, ū ê tio̍h ài chiàu-kò͘ nn̄g, tī chèng-choh pâng lāi ū ê tio̍h chèng-choh; í-goā ū ê tio̍h khí-chhù kap siu-lí－choè sai-hū kap sai-á. Lūn pe̍h hiā teh khí-chhù ê sî tuì ta̍k-bīn lâi khí kàu hō͘ chhù oē ti̍t, siu-oá; si̍t-chāi sī pí phang kap káu-hiā khah chìn-pō͘.
Chi̍t ê siū lāi khah choē sī chi̍t-tuì ông, ū sî iā ū nn̄g tuì, iā bat ū chi̍t chiah ông kap kuí nā chiah lú-ông, koh-khah hi-hán iā bat chi̍t-chiah lú-ông kap kuí nā chiah ông tiàm choè-hoé.
Sui-jiân sī choè hā-téng tōng-bu̍t ê pe̍h-hiā, lūn in ê siā-hoē ê chhù-sū, ū sî pí jîn-luī ê kok-ka khah chìn-pō͘. Tû-khì toā chuí-hiā (ông á-sī lú-ông ê hāu-pó͘ chiá) í-goā ta̍k-chiah ê pe̍h-hiā teh tín-tāng, lóng ū ì-sù, oē lī-ek in ê siā-hoē. Lâng siông-siông só͘-choè ê sū ū sî m̄-nā bô lī-ek siā-hoē, hoán tńg soà choè siā-hoē ê hāi-to̍k. Lâng kiám thang su pe̍h-hiā mah?
