Kèng Hó-hiaⁿ-tī-á

1925.10  tē 487 hō  p.15-16

1.Chhit goe̍h kèng-hōng Hó-hiaⁿ-tī,

Chit chân tāi-chì ke̍k put-gī,

Sèng-jîn ê chheh ū chí-sī,

Kèng-tiōng kuí-sîn jî oān-chi.

2.iàu-kín jîn-gī toā iú-ek,

Lūn kàu kèng kuí bô tì-sek;

Kuí-á bô-hêng iā bô-siōng,

Siáⁿ-sū kèng I hiah tuì-tiōng?

3.Hiān-hiān ê lâng oh ho̍k-sāi,

Bô-hêng ê huí àn-choáⁿ pài;

Ta̍k-hāng tāi-chì tio̍h séng-chhat,

Chū-jiân ná kú chiū ná bat.

4.Lâng-kheh kàu chhù beh khoán-thāi,

Tāi-seng mn̄g I toh-lo̍h lâi;

Tit chai miâ-sèⁿ kap só͘-chāi,

Jiân-āu hòng-sim saⁿ khoán-thāi.

5.Che sī sian-peng jî-hō͘ lé,

Tî-hông kong-kùn kap chha̍t-bé;

Kau lâng siōng-chhiáⁿ tio̍h séng-chhat,

Kau kuí koh-khah tio̍h saⁿ-bat.

6.Che kuí khí-thâu sī chī-chuī?

Chiū-sī sè-kan ê jîn-luī;

Kuí-á boē sí ia̍h sī lâng,

Kap lán tāi-ke lóng saⁿ-tâng.

7.Chóng-sī chò lâng ke̍k-kî sàn,

Chiū-sī khit-chia̍h kap lô-hàn;

Kàu chhù kiû-khit ke̍k-kî mî,

Khah pun ia̍h sī chi̍t nn̄g-îⁿ.

8.Chi̍t pái nn̄g pái chiū siá-sì,

Saⁿ pài sì pái, koáⁿ I khì;

Khit-chia̍h lô-hàn lín chin khī,

Kàu sí kiò I Hó-hiaⁿ-tī.

9.Boē-sí lâng khòⁿ bô ba̍k-tē,

Sí-liáu sio hiuⁿ teh kā hē;

Thiám-mī kuí-sîn kiû hok-khì,

Che sī choē-ok ê tāi-chì.

10.Muî-nî chhit-goe̍h chiàu kū-lē,

Mi̍h-kiāⁿ pâi kàu bô tàng hē;

iū kóng kuí-á lâi iông-kan,

Bô hàu iau-kuí ē kiò-chhan.

11.Siat-sú kuí-á nā ū chia̍h;

Jīm lí khah hàu bô kàu-gia̍h;

Nā kuí ē chia̍h kui-toh sàu,

āu-nî bô lâng káⁿ koh hàu.

12.Lín taⁿ sio-hiuⁿ teh ho͘-chhiáⁿ;

Siat-sú kuí-á nā ū-iáⁿ,

M̄-kú chhit-goe̍h chiah hàu khí,

Pa̍t goe̍h iau kàu poàⁿ sió sí.

13.Sui-sī lâng-lâng lóng teh hàu,

Khêng-chin sī lâng siūⁿ m̄-kàu;

Sui-bóng mi̍h-kiāⁿ pâi chê-pī:

Siáⁿ-lâng khoàⁿ-kìⁿ Hó-hiaⁿ-tī?

14."It-sim sêng-kèng"siá chāi kî,

ǹg-bāng kuí-á bo̍h the-sî;

Liōng-iok sio-hiuⁿ teh ho͘-chhiáⁿ:

Ki-si̍t kuí-á sī bô-iáⁿ.

15.Lâng kóng, Kau chha̍t chia̍h-liáu bí,

Kau kuí kiám bô chhoā khì sí?

Pêng-an hok-khì Thian sù--lâi,

M̄-sī kuí-á ē pho͘-pâi.

16.Jîn-gī lé-tì nā heng-khí,

Thiⁿ chiong pêng-an siúⁿ-sù lí;

Tiong-hàu liâm-chiat nā tuì-tiōng,

Thian sù hok-khì bo hān-liōng.

17.Chò hó ê lâng kàng pek-siông,

Chò pháiⁿ ê lâng kàng pek-iong;

M̄-sī kèng-kuí thang kiû hok,

Sī khoàⁿ só͘ kiâⁿ ê siān-ok.

18.Hàu kuí tāi-ke kek hong-sîn,

Lī-ek sī-bô; pe̍h-liáu gîn;

Chhài, pn̄g, koe-chí, lóng ké-khang:

Kuí-á khoàⁿ-kìⁿ khiú thâu-chang.

19.án-ni só͘ choè bô si̍t-chāi,

Siat-sú ū kuí koh-khah hāi;

ǹg-bāng kèng kuí kiû pó-pì,

Hoán-tńg jiá I toā siū-khì.

20.Kuí-á ū-ê chin pháiⁿ-phiah,

M̄-nā m̄-chia̍h soà hoah-lia̍h;

Kuí-á pí lâng khah m̄-hó,

Khoàⁿ teh phiàn I soà chhia-tó.

21.Phiàn-lâng siōng-chhiáⁿ phiàn bē khì,

Hô-hòng phiàn kuí ê tāi-chì.

Goán kóng hàu-liáu mi̍h goân-chāi,

Lín kogn2 hàu kuí mi̍h khoài-hāi.

22.Tio̍h chai chhit-goe̍h joa̍h-thiⁿ sî,

Ta̍k-hāng mi̍h-kiāⁿ khoài sit-bī.

M̄-sī bak kuí chhuì-noā-choâⁿ:

Sī lâng ka-tī teh saⁿ-moâ.

23.Goá taⁿ kóng che sī phì-jū,

M̄-sī kó-jiân ū che sū;

Chiàu lín só͘ chai lâi kóng-khí,

Chí-bêng chi̍t chân bô tō-lí.

24.Phì-jū lâng khì pa̍t só͘-chāi,

Hó-ì chhiáⁿ i lâi khoán-thāi;

Pn̄g-táu ē-té hē chho͘-khng,

Téng-bīn chí-ū tām-po̍h pn̄g.

25.Lâng-kheh phâng oáⁿ beh khì té,

Chiah chai chú-lâng teh khau-sé.

Lâng-kheh siū-khì chin bô-kio̍k:

"Siáⁿ-sū kiò goán lâi lêng-jio̍k?"

26.Lí taⁿ m̄-thang kàu goán tau,

Kho͘ káu jiok lí kha-chhng-āu"

Lán lâng siōng-chhiáⁿ ū che tāi,

Khi-phiàn kuí-á koh-khah hāi.

27.Lâng kóng teh hàu hó-hiaⁿ-tī,

Hàu-lâi hàu-khì hàu ka-tī;

Chiong lâng phì-jū Hó-hiaⁿ-tī,

Che sī lêng-jio̍k á m̄-sī?

28.Siōng-tè tō-lí lâi thoân-pò,

Kóng lâng kèng kuí toā choē-kō;

Lín chhiáⁿ hoê-siūⁿ lâi chiūⁿ-chō,

ǹg-bāng pêng-an siau chai-hō.

29.Tha̍k-sò͘ bêng-pe̍k hiù chēng-chuí,

Phiàn-lâng kóng i khoàⁿ-kìⁿ kuí;

ēng chhiú lāng-lâi iū lāng-khì,

Bêng-pe̍k ê lâng ū ki-chhì.

30.Kìⁿ kuí sai-kong pe̍h-chha̍t-hì,

Che sī bê-he̍k gōng peh-sìⁿ;

Khún-kiû Thiⁿ-pē sù tì-sek,

Hō͘ lâng kín-kín tio̍h bêng-pe̍k.