oa̍h-chuí
Ū chi̍t ji̍t tī Tām-chuí Tiong-ha̍k ê Sèng-keng gián-kiù-hoē, goán ū teh gián-kiù chi̍t chām Iok-hān hok-im-toān, tē saⁿ chiuⁿ gō͘ chat, kàu cha̍p-sì chat. Ná kap ha̍k-seng chim-chiok siūⁿ ê sî, ná khoàⁿ ū chiàu ē-bīn só͘ siá ê ì-sù tī-teh.
Chi̍t ê ha̍k-seng kóng, tī chit chām ū tām-po̍h chhin-chhiuⁿ Khóng-chú ê kà-sī tī-teh, ū pa̍t ê ha̍k-seng mn̄g kóng, Khóng-chú kà-sī nā-sī chhin-chhiūⁿ Iâ-so͘--cháiⁿ-iūⁿ Se-iûⁿ lâng chiong Iâ-so͘ ê kà-sī, thoân-ji̍p Tang-iûⁿ? Chit ê ha̍k-seng mn̄g liáu, goán saⁿ-kap siūⁿ chit-kù sī tú-tú chhin-chhiūⁿ Sin-iok ê lāi-bīn só͘ kì-chài hit-ê Sat-má-lī-a ê hū-jîn-lâng mn̄g Iâ-so͘ chi̍t-iūⁿ. Hit-sî bô tú-tú chiàu i só͘ mn̄g lâi ìn. Phah-sǹg Iâ-so͘ ê ì-sù m̄-sī lia̍h kà-sī choè iàu-kín, chit ê put-kò sī teh pang-chān hō͘ oa̍h-miā thang khah hoat-ta̍t.
Taⁿ beh thiah-bêng hit ê ì-sù hō͘ tāi-ke thiaⁿ:－ "Iâ-so͘ ê pêng-iú lī-khui Se-iûⁿ lâi kàu Tang-iûⁿ tio̍h tuì Tiong-kok keng-kè. Tuì án-ni kàu Tiong-kok chi̍t ê siâⁿ, miâ kiò Siōng-hái, kūn Khóng-chú só͘ tiàm ê só͘-chāi; tī-hia ū Khóng-chú ê chuí-chíⁿ. Iâ-so͘ ê pêng-iú kiâⁿ lō͘ siān, chiū chē tī chíⁿ-piⁿ. Hit-ji̍t iok-lio̍k ji̍t tiong-tàu, ū chi̍t ê Tiong-kok ê hū-jîn-lâng lâi chhiūⁿ chuí, Iâ-so͘ ê pêng-iú kā i kóng, Chhiáⁿ hō͘ goá lim. In-uī i ê pêng-iú í-keng ji̍p siâⁿ khì boé mi̍h thang lâi chia̍h. Tiong-kok hū-jîn-lâng kā Iâ-so͘ ê pêng-iú kóng, Lí sī Se-iûⁿ lâng, cháiⁿ-iūⁿ tuì goá Tang-iuⁿ lâng thó chuí lim ah ? Sī Se-iûⁿ lâng kap Tang-iûⁿ lâng bô kāng-khoán. Iâ-so͘ ê pêng-iú ìn i kóng, Siat-sú lí bat Siōng-tè ê un-sù, kap tuì lí kóng hō͘ goá lim ê sī sím-mi̍h lâng; lí tek-khak kiû i, i chiū ēng oa̍h-chuí hō͘ lí. Tiong-kok lâng kóng, Sian-siⁿ ah, lín bô chhiūⁿ chuí ê khì-khū, chíⁿ koh chhim, tuì tah-lo̍h ū hit hoán(khoán) oa̍h-chuí ah? Goán chó͘ Khóng-chú lâu chit-ê chíⁿ hō͘ goán, i ka-kī kap kiáⁿ-jî kap ha̍k-seng kap cheng-siⁿ lóng lim chit ê chíⁿ ê chuí, lín kiám pí i khah toā mah? Iâ-so͘ ê pêng-iú ìn i kóng, Lim chit chuí ê lâng beh koh chhuì-ta, to̍k-to̍k kìⁿ-nā lim goán só͘ hō͘ lín ê chuí ê, éng-oán boē chhuì-ta, in-uī goán só͘ hō͘ lín ê chuí beh tī lín ê sim-lāi chiâⁿ-choè chuí-choâⁿ, ti̍t-ti̍t chhèng kàu éng-oán oa̍h"
