Thong-ti-su

  Tī 1925 nî 6 ge̍h 10 ji̍t, Ka-ná-tāi Bí-í-bí-hoē, Cho͘-ha̍p kàu-hoē kap Tiúⁿ-ló hoē ê chi̍t pō͘-hūn ū liân-ha̍p chiâⁿ-choè Ka-ná-tāi Liân-ha̍p Kàu-hoē. Chóng-sī Tiúⁿ-ló-hoē bô choân-pō͘ kap in liân-ha̍p, iû-goân chiàu-kū hō-choè Ka-ná-tāi Tiúⁿ-ló kàu-hoē.

  Taⁿ iu-uī kàu-hoē ū hun-khui, só͘-í Kàu-hoē ê châi-sán, chhin-chhiūⁿ pài-tn̂g, Ha̍k-hāu, Ki-pún-kim kap īⁿ-pang ê Kàu-hoē iā soà tio̍h pun.

  Bē liân-ha̍p í-chêng, Ka-ná-tāi Tiúⁿ-ló Kàu-hoē ū siat-kàu tī-kuí-nā kok, chhin-chhiūⁿ Tiong-kok, ìn-tō͘, Lâm-bí, Tâi-oân, tī chiah ê só͘-chāi ū chi̍t chheng sì-pah bān lâng.

  Taⁿ chit pang Liân-ha̍p Kàu-hoē kap Tiúⁿ-ló hoē ū chham-siông hun-koah īⁿ-pang Kàu-hoē ê sū, chiū-sī chiàu ē-toé án-ni koat-tēng.

  Pun hō͘ liân-ha̍p Kàu-hoē.

• 1. Tiong-kok Hô-lâm séng.
• 2. Tiong-kok Kńg-tang séng.
• 3. Tiâu-sián pak-pō͘ kap Boán-chiu.
• 4. Lâm-bí Tek-nî-tap hái-sū.
• 5. Tiong ìn-tō͘. (Khàu-tû Lâm-bí-lú, kap Sai-nî-má ê só͘-chāi).

Pun hō͘ Tiúⁿ-ló-hoē.

• 1. Tâi-oân pak-pō͘
• 2. Gī-a-ná (tī Lâm-bí ê pak-pêng).
• 3. Tiong ìn-tō͘ ê Lâm-bí-lú, kap Sai-nî-má.

Liân-ha̍p kàu-hoē só͘ pun tē-it toā ê só͘-chāi, chiū-sī Tiong-kok Hô-lâm séng. Tiúⁿ-ló hoē só͘ tit-tio̍h tē-it toā ê só͘-chāi, chiū-sī Tâi-oân pak-pō͘. Chit pang án-ni hun-koah sī tuì kok hong-bīn lâi gián-kiù, iā ū chim-chiok siūⁿ Kàu-hoē ê lī-ek. Só͘-í 2 ê Bú-hoē ū kóng án-ni siat-hoat si̍t-chāi sī kong-tō kap ū tì-sek. Taⁿ lióng-pêng í-keng hoaⁿ-hí chiong chiah-ê só͘-chāi siat-hoat hun-koah kàu chheng-chhó, chiong-lâi tek-khak hō͘ Kàu-hoē oē toā hoat-tián. Tiúⁿ-ló hoē ê chú-gī chiū-sī beh toā chéng-lí in só͘ pun tio̍h ê só͘-chāi, só͘-í chiong-lâi lán pak-pō͘ ê Kàu-hoē tek-khak oē tit-tio̍h toā lī-ek.

    Koh chi̍t-hāng chiū-sī tī Liân-ha̍p kàu-hoē só͘ pun-tio̍h ê só͘-chāi, iáu ū Tiúⁿ-ló-hoē ê Soan-kàu su tī-teh, iā tī Tiúⁿ-ló hoē só͘ pun tio̍h ê só͘-chāi, iā ū Liân-ha̍p kàu-hoē ê Soan-kàu-su tī-teh. Só͘-í khah bān nā soan-kàu-su īⁿ-tōng khì in ka-kī ê só͘-chāi, chhiáⁿ lia̍t-uī m̄-bián kî-koài, in-uī chit 2 ê kàu-hoē ū chim-chiok siūⁿ ài ēng hó kám-chêng lâi liāu-lí Kàu-hoē, só͘-í nā ū sím-mi̍h piàn-chhian ê só͘-chāi, iā-sī lióng-pêng ū chham-siông kàu hó-sè chiah ū si-hêng, si̍t-chāi thang kóng Ki-tok kàu ū kong-tek-sim, ū jîn-ài, ài hô-pêng, só͘-í chit pang hun-koah Kàu-hoē í-ki̍p châi-sán, hiah-nih choē, iā sī siang-pêng hoaⁿ-hí kam-goān. In ū toā khoà-lū Thian-kok ê sū só͘-í chiah toā tāi-chì chiah ū hiah khoài kái-koat. Taⁿ toā ǹg-bāng chiong-lâi 2 phài oē hia̍p-le̍k uī Chú chhut-la̍t lâi liāu-lí in ê sèng-hoē tī īⁿ-pāng(pang).

Kai Joē-liâm kì.